Read Kambera PABOWANGU 6 Bible Online

PABOWANGU 6 - Kambera bible

PABOWANGU 6

¹Hàlaka patuna nu ita-nggunyaka na Ana Mbimbi ba nabera-ya na kawunga henggilu welingu la mapihu-da. Hàla rongu-nggunyaka heu na banda da mapatu-da, “Mai!” wàna. Na talia nggoruna hama lingu kanduruku-ya.

²Ka ita-nggunyaka, ba nawuwa na heu na njara bara. Na Ma-kaliti-ya, na-katangu hapungu tandai pana, dàngu hi wuanya hau tubuku. Nyuna na-ndàharungu ba tau matalu-ya na malaku pahilu wàhiya na patalu wàngu.

³Tunaka nu na Ana Mbimbi nuna berananyaka na henggilu na padua wàda, dàngu hi kurongu-ya na banda padua wàda ba napanii, “Mai!” wàna.

⁴Hàla hili luhu-nanyaka na heu na njara. Njara raraya. Na makaliti-ya pawuangu kuaha-ya la pa-pamolu-nya na papeku wàngu la pinu tana, ka na-pameti dàngga anguna na tau. Nyuna pa-wuangu-ya hapungu hapanda bokulu.

⁵Hàla na Ana Mbimbi hi nabera-ya na henggilu na patailu wàda. Dàngu kurongu-ya na banda patailu wàda ba napanii, “Mai!” wàna. Kuita-ya ba naluhu na heu na njara mitingu. Na ma-kaliti-ya na-katangu ba hamawa-da da timbangu la limana.

⁶Kurongu-ya na habata, ba patingi-nya hama talia nggoru mawara-ya welingu la padua-da nuda da banda mapatu. Na warana, “Na hau litaru uhu nggàndumu mahàmu, hama bilana na wunda ràma hau lodu, dàngu tailu litaru uhu nggàndumu hawiangu jia-mayai ba hama bilana na wunda ràma hau lodu. Na nyuna àmbi paruha-duha da pingi haitungu dàngu da woka angguru!” wàna.

⁷Tunaka nu na Ana Mbimbi hi nabera-ya na henggilu papatu wàda. Hi kurongu-ya na banda papatu wàda ba napanii, “Mai!” wàna.

⁸Kuita-ya, ba nawuwa na heu na njara wàla. Na ma-kaliti-ya Metiya na tamuna. Nàmu luangu la kajia-na ndutu lihi-mananya paraïna Pangia Mameti.[4] Na hau bika patuna na kuaha la pinu tana, pa-pakatangu-ha nyuda, ka da-pameti wànya pabera, wànya rehi rimbangu, wànya panyaki panggàbalungu dàngu wànya mabohu - mabohu.

⁹Hàlaka patuna nu na Ana Mbimbi naberaya na henggilu palima wàda. Kuita-ya la lumbu ngia pawotu maraku ninja da hamangu tau meti pa-pameti, nadu ba da-pamàndu wànya pa-hakahingu-da na lii langu welingu lai Ala.

¹⁰Nyuda da-kaladaku pa-kodungu, “Dou Miri Mahupu-mbiha, ma-matua dàngu ma-deningu! Lupa pirangu-mapa Nyumu bau patanda-nya wai ngerana na tau pinu tana dàngu kau hukunja ruku pameti-da-nggama nyuma?” wàda.

¹¹Nyuda pa-wuangu màra haàtu-ha hawàla kalembi bara bokulu. Hàla hi paràha-nja ka dahangahuki hawutu, ka lupa datoma dihada da angu pa-jàrungu-da, dàngu da anguda napa da pa-pameti hama tuna nyuda.

¹²Hàla ita-nggunyaka na Ana Mbimbi ba nabera-ya na henggilu panomu wàda. Ka tungu-nanyaka na upungu na ma-mbangatu halawàla. Na mata lodu na-mitingu hama tuna na tera mitingu halata, tàka na wulangu hi narara hama tuna na wai ria.

¹³Da kandunu damunju welingu la awangu la pinu tana hama tuna na wua kapilitu da mandedi rara ba damunju welingu la kapuka ba na-kàduku-nja ngilu mbangatu.

¹⁴Na awangu namolungu hama tuna na karàta pa-kulurungu, dàngu mbuu ndàbada da palindi dàngu da nuha pa-panggihiru-ha welingu la pangia-da.

¹⁵Hàla da hanganji pinu tana, ba hapajia-ha da tau bokulu, da mini la ngora, da tau wulu, da tau ma-kuaha, dàngu da tau hawiangu, ka ataya ka kabihu-ya, mbuu ndàbada da-winingu wikida la kubu liangu dàngu la panga kaba watu palindi.

¹⁶Dawaranja da palindi dàngu da kaba watu, “Pinjalu àru-nggama! Wini àru-nggama welingu la mbara matana Nyuna na ma-mandapu la kanjàka, dàngu welingu la hànggana na Ana Mbimbi! wàda.

¹⁷Na lodu mbàringu tàka-nanyaka, nàhu huburu-danyaka na karaü etida, dàngu nda ningu-apa haàtu matara pa-pajàrungu la hanggada nyuda!” wàna wàmu.