Read Kambera PABOWANGU 7 Bible Online

PABOWANGU 7 - Kambera bible

PABOWANGU 7

¹Hàlaka nu, ita-nggunjaka ba tau mapatu-ha da papalewa da ma-ndolaku la patu mbua kabihu pinu tana. Nyuda da-dimbaku-ha da ngilu ba patuda la pinu tana ka àmbu ningu ngilu ma-maruru la mara jàka ndia la tehiku, jàka ndia la pingi ai - pingi ai, ba wàda.

²Hàla ita-nggunyaka na papalewa haàtu na ma-mumuku welingu la pahunga lodu. Nyuna nangàndi henggilu welingu lai Ala maluri. Nawàngu pawara pa-kodungu nuna na papalewa ba na-paau-nja da papalewa tau mapatu da pambàda wuangu kuaha welingu lai Ala la pa-paruha-ya na mamara dàngu na tehiku.

³Nuna na papalewa napanii, “Àmbi paruha-ha kàdi na mamara jàka ndia na tehiku, jàka ndia da pingi ai, jàka ndedi matungu tanda henggilu la kaba matada da atana na Alanda,” wàna.

⁴Hàla peka-danggaka nyungga, ba ningu tau 144.000-ya na tau na patungu tanda henggilu welingu lai Ala la kaba matada. Da tau nuda papiti-ha welingu la hakambulu dàmbu kabihu banjaru Ihirailu;

⁵hau kabihu - hau kabihu tau 12.000-ya. Nu welingu la kabihu Yahunda, Rumbingu, Nggàtu,

⁶Ahiaru, Nàputali, Manahi,

⁷Hamiungu, Lewi, Ihakàru,

⁸Hembulungu, Yuhupu dàngu Mbanyamingu.

⁹Hàlaka nu hili ita-nggunyai, na tau ma-kapàparu na manda uku danguna — nda ningu ndoku haàtu mataü padiha-ya nggubuluna. Nyuda jia-haka da tau welingu la nimbihu banjaru, kabihu, nanggara dàngu hilu. Nyuda dapaki kalembi bara bokulu dàngu da-kawàra kawanangu pàpa wola la limada, nuda da tau dangu ndolaku hangga-danya na kanjàka dàngu hangga-danya na Ana Mbimbi.

¹⁰Hàla ba dàngu pa-kodungu-da ba dawara, “Na mànangu-nda nyuta ma-pawelingu la Ala-ndanya, na ma-mandapu la kanjàka dàngu welingu la Ana Mbimbi!” wàda.

¹¹Mbuu ndàbada da papalewa ndolaku winggiru-danya na kanjàka dàngu ba hapajia-ha da liku uru hamadai nuda da patu banda. Da papalewa nuda da-maràbaku la hangga kanjàka hi da-marubuku-nya i Ala.

¹²Nyuda nu dawara, “Amingu! Pa-wotungu-ya na Alanda na ma-bokulu dàngu na ma-manggàna. Ràka-mana Nyuna jàka pabundu-nya pamalangungu dàngu patembi wàngu. Nyuna na-kuaha dàngu namàka lundu nu - nu! Amingu,” wàda.

¹³Na haàtu welingu la liku uru na-paàrangga, “Da tau da mapaki kalembi bara bokulu, nggamuha dàngu nggi welida?” wàna.

¹⁴“Nda kupi-anya, umbu. Nyumu dumu mapinya,” hi wànggunya. Hi napanii-ngga, “Yiada jia-haka da tau da mambàda mànangu, da malànga-nya na rehi mayila na ma-mbàringu. Nyuda dabaha-mahaka da kalembi bokulu-da, hi dapabara wànja na riana na Ana Mbimbi.

¹⁵Nunaya na pakiri-na hi da-ndolaku la hangga kanjàka-na i Ala, hi dalumu-nya lodu rudungu daa la Uma Ala. Tàka Nyuna na ma-mandapu la kanjàka napa na-mandapu dànja la paangga-ha nyuda.

¹⁶Nda dahili pàdangu-apa manjiu jàka ndia madau; na mata lodu jàka ndia na hambàti mbana lodu nda nahili tuni-ahapa nyuda,

¹⁷nadu na Ana Mbimbi na ma-mandapu la padua kanjàka, Nyunaka na mapawa-nja nyuda. Napa Nyuna nairu ngàndiha nyuda la matawai na ma-wuangu luri. Tàka i Ala napa na-podahu-ha da wai mata welingu la matada,” wàna wàmu.