Read Kambera PABOWANGU 8 Bible Online

PABOWANGU 8 - Kambera bible

PABOWANGU 8

¹Ba nabera-yaka na henggilu papihu wàda paraïna Ana Mbimbi kahàna-nanyaka la awangu, ràkangu pera dua njàmuna.

²Hàla ita-nggunjaka da papalewa tau mapihu da ma-ndolaku la hanggana i Ala, tàka nyuda hi wuanja pihu mbua taropitu.

³Na papalewa na haàtu, na mangàndi kanai dupa àmahu rara, namai hi na-ndolaku la hangga ngia pawotu maraku. Lai nu nyuna pawua padangu-maya kaminyangu da patungu la hamaya - hamayangu-na mbuu ndàbana na banjaru-na i Ala la pa-maraku-wànja la ngia pawotu maraku àmahu rara na maninya la hangga kanjàka.

⁴Pa-karia-nja da hamayangu-da ba hapajia-ha da banjaru-na i Ala, na kutu dupa na ma-talànga roka na-hanjulangu hu dita welingu la limana na papalewa na ma-ndolaku la hanggana i Ala.

⁵Tunaka nu nuna na papalewa napiti-ya na kanai dupa, dàngu hi na-paihi-nya epi welingu la ngia pawotu maraku, hàla hi na-patàda-nya la pinu tana. Ka ndu - nduru-naka na kanduruku dàngu bi - bila-naka na kabilaku, dàngu ka tungu-nanyaka na upungu.

⁶Hàlaka nu, da papalewa mapihu da ma-katangu pihu taropitu, ehingu-danyaka la pahapui-ha.

⁷Na papalewa kawunga-na hapui-nanyaka na taropitu-na, ka puru-nanyaka na ura watu dàngu epi pa-korungu wai ria na mambangatu la pinu tana. Ka mutu pa-mbutangu-nanyaka na ha-kawàri tailuna na pinu tana; hamanai na ha-kawàri tailuda da pingi ai, dàngu nimbihu-da da rumba muru.

⁸Hàla na papalewa na padua wàda hapui-nanyaka na taropitu-na, tàka ninya na hangia na mambana bokulu-na ba hama palindi rokaya hi patàda-nya hu daa la tehiku. Na ha-kawàri tailuna na tehiku na-pambeli-ya wai ria,

⁹ka meti-danyaka da ha-kawàri tailu welingu la dika - dika da maninja la tehiku; tuna numbu ba da-molungu da ha-kawàri tailuda da kapalu.

¹⁰Tunaka nu na papalewa na patailu wàda hapui-nanyaka na taropitu-na, na hau na kandunu bokulu, na maduru hama tuna epi hulu, kanabu-nanyaka welingu la awangu, hi na-pinjalu-nja ba ha-kawàri tailuda da luku dàngu da mata wai.

¹¹(Na tamuna na kandunu nuna “Paita”-ya.) Ka paita-nanyaka na wai ba ha-kawàri tailu-da dàngu meti padangu-danyaka da tau ba daunu-nyaka nuna na wai paita.

¹²Hàla na papalewa na papatu wàda hapui-nanyaka na taropitu-na. Ka nggàna-nanyaka na ha-kawàri tailuna na matalodu, ha-kawàri tailuna na wulangu, dàngu dahakawàri tailuda da kandunu, ka àlingu-danyaka da ha-kawàri tailu welingu la hapajia-ha da maharii-ka. Tumbuna ba ha-kawàri tailuna na harii dàngu tumanai ba ha-kawàri tailuna rudungu.

¹³Hàla ita-nggunyaka, kurongu-ya na ma-hawurungu ranjawali ba talànga hawuru pa-janggangu-na la kuru awangu, na-warangu, “Ura pàku-naka! Ura pàku-naka! Ura pàku-naka na tau la pinu tanaka jàka rongu-haka da papalewa matailu napa jàka dahapui-haka da taropitu-da!” wàna, wàna wàmu.