Read Kambera PABOWANGU 9 Bible Online

PABOWANGU 9 - Kambera bible

PABOWANGU 9

¹Hàla na papalewa na palima wàda hapui-nanyaka na taropitu-na, kuita-ya na hau na kandunu na ma-kanabu welingu la awangu la pinu tana. Nuna na kandunu pa-wuangu-ya kuhi rokapu meti.[5]

²Ka bunggahu-nanyaka na rokapu meti paraïna kandunu, ka luhu-nanyaka na kutungu weli dalungu ba hama tuna na kutungu welingu la tuluru bokulu. Na mata lodu dàngu na kuru awangu kapàtangu-nanyaka paraï kutungu welingu la rokapu.

³Hàla weli dalungu la kutungu luhu-danyaka da kabala da mapuru la pinu tana. Nuda da kabala pa-wuangu-ha kuaha hama tuna na pa-wuangu-ha da tamihiku.

⁴Nyuda pa-hiringu-ha la pa-paruha-ha da rumba, jàka ndia da pingi ai, jàka ndia da pa-pamula hawiangu. Nyuda mbulungu-ana ba pahia-nja patungu la tau da manda ningu tanda henggilu-na i Ala la kaba matada.

⁵Da kabala nda pa-pahiangu-aha la pa-pameti-ha da tau nuda, mbulungu la pa-mayila-aha la dalu lima mbua wulangu. Na ma-karàngi rukuda da kabala hama karàngi-mada da ruku tamihiku.

⁶Lima mbua wulangu mandaina, da tau nuda da himbu wihu la pameti, tàka nda peku metida; darinjungu pameti, tàka na pameti wàngu namarau-maanja.

⁷Na hadada da kabala hama tuna njara mawai rehingu la pa-pabera. La katiku-da ningu mahama tubuku marara-ya ba itaya. Na matada hama mata tauha.

⁸Na lunggida hama lunggi kawini-ha, dàngu da ngànduda hama ngàndu hingaha.

⁹Na kuruda pa-pandàda wàngu ma-paerungu la kalembi bàhiha. Na lingu ruu kàpada hama lingu hau pauhi bokulu kareta njara da manjungu la pa-pabera.

¹⁰Nyuda ningu kikuda dàngu tarada hama tuna tamihiku. Dàngu nu daa la kikuda lai nuya na pangia-na na kapàru-da la pa-pajàra-ya na tau la dalu lima mbua wulangu.

¹¹Nyuda ninguma hanganji maparetaha, na hanganji-da jia-duyaka na papalewa na makata-nya na rokapu meti. Na tamuna la hilu Imbarani Ambandongu; dàngu la hilu Yunani Apuliungu (Ma-paruha, wànda nyuta).

¹²Na kawunga manjurangu làpahu-nanyaka. Hàlaka nu hilu ninjapa ba dua ngiada da manjurangu da manàmu-nja.

¹³Tunaka nu na papalewa na panomu wàda hapui-nanyaka na taropitu-na. Ka rongu-nggunyaka na lii welingu la patu mbua kabihu ngia pawotu maraku àmahu rara na maninya la hanggana i Ala.

¹⁴Na lii nuna napanii-nya na papalewa panomu wàda, “Pahàla-hawa da papalewa tau mapatu da pahondu la Luku Epuràtu!” wàna.

¹⁵Ka pahàla-danjaka da papalewa tau mapatu nuda. Nyuda pa-payema kahaungu-mahaka nduma njàmu, lodu, wulangu dàngu ndaungu la pa-pameti-ya na tau ha-kawàri tailu welingu la banjaru tau pinu tana nggubulu-na.

¹⁶Nyungga dapeka-ngga, nggubulu-da da pamba tau la njara ningu dua ngahu pàkuda.

¹⁷Nu la harii mata, kuita-ha da njara dàngu da tau ma-kaliti-ha. Da ma-kaliti-ha datungu kalembi bàhi marara handoraku, kawuru hama watu nilamu dàngu mapawingiru tana lirangu. Da katiku-da da njara hama katiku hingaha, dàngu welingu la ngaruda luhu-nanyaka na epi, na kawuu dàngu na tana lira.

¹⁸Ha-kawàri tailuna na dedi tau na-pameti-ya paraï ba tailu ngiana na pa-manjurangu wàngu, nu na epi, na kawuu dàngu na tana lira da maluhu welingu la ngaruda nuda da njara.

¹⁹Na pamàka wàda da njara ninja la ngaruda dàngu la kiku-mbuda. Da kikuda hama tuna ularu ningu katikungu-ha. Dawànja da kikuda nuda da njara ba da-pamayila-ya na tau.

²⁰Tàka na rihina na dedi tau na panda pameti wàngu manjurangu, jiamaya ba nda da-dunjaku-nja da ruku lima wikida. Nda da-pànjangu-ma palumu-nja da wàndi akatu dàngu da marapu àmahu rara, àmahu bara, wudu, watu, dàngu ai da manda ngita, da manda rongu dàngu da manda pangga.

²¹Nda da-dunjaku-mbunja da paruku-da da ma-akatu, la pa-pameti tau, la patuu hiwaru, la pa-njuraku dàngu la pa-manganga.