Read Kambera RUTU 1 Bible Online

RUTU 1 - Kambera bible

RUTU 1

¹La handàka-na ba ndedi ningu maràmba-na na banjaru Ihirailu natungu na rimbangu la tana Kanaàngu. La rehi nu ninya haàtu-na na mini ma-tamungu Elimeliku. Nyuna welina la kalibaru Epurata, dàngu na ma-ndàdiku la Mbetulehimu la ngaba Yahunda. Rukuna ba rimbangu-ya nalaku-ya la Muapu dàngu na papaha-na, na-matamungu Naomi, dàngu da madua da anana mini: i Màhalongu dàngu i Kiliyongu. Hàla hi da-ndàdiku lai nu. Na nyuna ba lai nu ihapa,

³meti-nanyaka i Elimeliku. Ka didi-kiyaka i Naomi dàngu da madua da anana.

⁴Pa-kadua-da da kanoma bidi kawini Muapu, da ma-tamungu i Orupa dàngu i Rutu. Palàngangu hakambulu ndaungu,

⁵metimbu-danyaka pa-kadua-da da anana i Naomi, hi lupangu nda ningu-apa leina i Naomi hamangui da anana da madua.

⁶Ndedi nggi tuna mandaina rongu-nanyaka i Naomi ba mbàda pa-kanyuru wàna-nyaka ihi woka manjadi hàmu na banjaru Ihirailu paraïna i MIRI. Tuna nu duka hi nawuku-ya pa-hadangu welingu la Muapu i Naomi dàngu da rii anana pa-kadua-da.

⁷Dahada pa-kariangu palaku la Yahunda. Na nyuna la padua ngara ngia.

⁸Panii-nanjaka da rii anana pa-kadua-da i Naomi, “Beliwa dimi la uma inami. Màla àruki i MIRI, ka nahàmu-nggai nyimi hama tuna nyimi bai hàmungga nyungga dàngu lai nyuda da mambàda meti.

⁹Dàngu màla àruki ka naora-nya paraïna i MIRI ka peku ngalangu-mi leimi nimbihu-mi dàngu kai hili pakuru umangu beli,” wànanja. Ba napanii tunaka nu, kamàhaku-nahaka paraïna i Naomi hi na-puduku-ha. Na nyuna ka hii kaladaku danyaka i Orupa dàngu i Rutu,

¹⁰hi dapanii-nya i Naomi, “Ndiaa, Ina! Kiku manggau nyumu Ina pabeli la banjaru-mu,” wàdanya.

¹¹“Àmbi tu dimi nu dou da ananggu duku,” wàna ba na hema i Naomi, “lupangu ibelima bàdi, Nggàra linguna bai kikungga nyungga? Ka peku paana-nggupa anakeda mini kai tuu leimi?[1]

¹²Lupangu ibeli bàdi nadu ba làpahu-mana-nyaka na-kaweda-nggu la pahili mangoma. Dàngu ngera hama tuna jàka peku-napa duku làti, ka ku-mangoma la rudungu nàhuma dàngu ku-ngalangu anakeda mini,

¹³kai mbuhangu-du nu pa-patia-nja matua-da? Nggiki hama nda peku mangoma-mi nyimi la tau hawiangu rukuna nuna? Màtangu dou da ananggu duku, àmbi timi nu! Namila na etinggu ba ku-pangàda-nggai ngerami rukuna na hukungu welingu lai MIRI na manggàna-ka nyungga,” wànanja.

¹⁴Ka hili hii kaladaku-danyaka i Rutu dàngu i Orupa, hàlaka nu ka puduku-nanyaka na ina yenuna nyuna i Orupa pa-kamahi-nya la palaku mambiru, hi nabeli-ya.[2] Na nyuna nda nabihu-a i Rutu pa-pahewa danya na ina yenuna.

¹⁵Ba tuna panii-nanyaka i Naomi lai Rutu, tàngaru, “Beli-nanyaka duna na angumu rina la banjaru-na dàngu la marapu-na. Màla kiku-nyawa la pabeli,” wànanya.

¹⁶Na nyuna nahema i Rutu, “Ina, àmbu ruwatu duka pabeli dàngu la pa-dunjaku-nggau nyumu. Kiku-manggunggau duku Ina. La nggikau ulaku ningu, lai numbukai duku kulaku ningu. La nggikau, ndàdiku ningu, lai nu mbukai duku ku ndàdiku ningu. Na banjaru-mu banjaru-manggunya, dàngu na Alamu na palumu-mu, lumu-mbunggunyai duku.

¹⁷La nggikau meti ningu, lai numbukai duku kumeti ningu dàngu ka tani ningga, wànggu. Màla àruki ka nahuku pambotu-ngga i MIRI jàka kuwuku-ya la pa-pahewa dànggau nyumu Ina, hinggilu-na na meti na ma-pahewa-nda,” wàna.

¹⁸Ba naita-yaka paraïna i Naomi ba patidungu mananya pa-kikungu i Rutu, nda hili nggàra-apa papanii-na.

¹⁹Ka laku pa-ngalangu-danyaka lundu datàka la Mbetulehimu. Tàkangu ba wàda-kika lai nu, kanggupuku-nanyaka nggubulu-na na paraingu. “Jia langatàka-ya ihu nina, i Naomi?” wàda ndàba da kawini lai nu.

²⁰“Naomi àmbi wàmi-dunggapa,” wàna, “Mara,[3] wàmi biangga, ba namàta dunggaka paluri la mapuri mapaita paraïna i Ala Mahupu mbiha.

²¹Ba ku-hadangu weli yiahungu na patoma ndàbapa duku, tàka nàhu na-karia-belingga i MIRI wàngu lima jua. Ba tuna, Naomi àmbi wàmi-dunggapa, nadu ba huku wàna-nggaka mayila dangu i MIRI Mahupu mbiha,” wàna.

²²Tuna nu duka na-kaloka-na nggiki hamana ba nabeli welingu la Muapu i Naomi dàngu i Rutu, na rii anana, na tau Muapu. Ba datàka la Mbetulehimu hina-ma-apa na-pakiringu na rehi muti uhu nggàndumu.[4]