Read Kambera RUTU 4 Bible Online

RUTU 4 - Kambera bible

RUTU 4

¹Ka lua-nanyaka la ngia pa-pahamburu la pindu bokulu paraingu i Mbowàhu. Ba na-mandapu-ka lai nu, nàhu-nyaka na haàtu mini marihi pa-kalembi nditakungu dàngu i Elimeliku ba wàna i Mbowàhu. Hi napaau-nya paraïna i Mbowàhu, “Mai, ta-mandapu yiahu, angu paluhu!” wànanya. Ka mai-nanyaka hi na-mandapu nu na tau.

²Tunaka nu hi nawànda hakambulu liku uru la panggolu pa-mandapu daa mbunya. Ba na-mandapu-ka,

³ka panii-nanyaka nu na kalembi-na i Mbowàhu, Mbàda beli-naka i Naomi welingu la Muapu. Nàhu dangganya na tana wànaka, na manguna i Elimeliku na kalembi-nda nyuta.

⁴Ba kukaka-ya jianguma bau pinya na rukuna nuna. Jàka umbuhangu pakeiya, paniiwa la hanggada yiada da tau ma-mandapu lai yiahu. Jàka ndia, upanii pa-tànjingu bia, ba didi dua-ata nyuta maningu ngabangu la tana nuna, nyumu mangia ngaba, hi mangupa nyungga, wànanya. Na hema nuna na tau, “Tu biana duna napa kukeiya,” wàna.

⁵Na napaya i Mbowàhu, “Hàmu jàka tuna nu. Na nyuna jàkau mbuhangu pakeiya nuna na tana welingu lai Naomi, lupangu piti-mbuya bàdi i Rutu[8] na kawini Muapu, na papaha pameti wàruna na anana i Naomi. Nadu ba lupangu-ma namangu pangala-nya bàdi nuna na tana paraï wàla wuana nu na mambàda meti,” wànanya.

⁶Nahema nuna na tau. “Jàka tuna nu, ka nda ku-duluku-apa duku nyungga. Nàhu puli-nggunyaka na nangaba-nggu ba mangia ngabaka la pakeiya nuna na tana. Nda ningua linguna ba kukeiya, nadu jàka nyungga makeiya, nda jia mangu-ananya wàla wuanggu, nuna na tana. Narihi hàmu nyumu bia bàdi makeiya,” wàna.

⁷Na pakàli wàngu la rehi nu, jàka ningu tau ma-danggangu, jàka ndia manjepa ngga - nggàra manguna, ka peku pa-karàngi-ya nuna, na ma-danggangu naàli-nja da halapa-na la wihina hi nawua-ha la makei. Tuna nuduka na pawàngu la tau Ihirailu ba pa-karàngi-ya na ruku kei danggangu tana.

⁸Tuna nuduka, “Nyumu bia bàdi makeiya,” ba wàna-nyaka i Mbowàhu paraïna, nuna na tau, hi naàli-nja da halapa-na la wihina hi nawua-ha lai Mbowàhu.[9]

⁹Ka panii-nanyaka i Mbowàhu da liku uru la panggolu dàngu mbuu ndàbada da tau hawiangu da maninja lai nu, “Hakahii-kaika nyimi mbuu ndàbami la lodu nàhu ba mbàda kei-ngguhaka welingu lai Naomi mbuu ndàba da manguda i Elimeliku dàngu da anana, nu i Kiliyongu dàngu i Màhalongu.

¹⁰Dàngu la perada nuda kupiti-mbuya patuya papaha-nggu i Rutu, na kawini Muapu, na papaha pameti wàruna i Màhalongu. Ba tuna nu nuna na tana pa-daingu-nanyaka pamangu-nya napa paraï da ihi kuru umana na mambàda meti. Dàngu da wàla wuana pa-daingu nii-manja la honga kalembi-na dàngu la paraingu-na. Namuya angu dedi la lodu nàhu ba hakahii-kai nyimi mbuu ndàbami,” wànanja.

¹¹Dapanii da liku uru dàngu da tau hawiangu, “Deningu-mana ba hakahii-kama nyuma. Màla àruki i MIRI ka na-panjadi-ya na papaha-mu hama tuda i Rahilu dàngu i Lia da ma-paana padangu ndumana i Yakupu. Màla àruki kau mbokaru la hongada da tau welingu la kalibaru Epurata dàngu kau kawulangu la Mbetulehimu.

¹²Màla àruki da anamu da pawua-nanggau i MIRI la bidi kawini yiana ka da-palua-ya na ihi kuru umamu hama tuda da ihi kuru umana i Perihu anada i Yahunda dàngu i Tamàru,” wàdanya.

¹³Ka piti-nanyaka i Rutu hi natuya papaha-na paraïna i Mbowàhu. Na-pakanyuru-nya i Rutu paraïna i MIRI hi na-paanakedangu hi na-habola-nya na haàtu anakeda mini.

¹⁴Ba jia ndàbaha da kawini, dapanii-nya i Naomi, “Pa-wotungu-ya i MIRI! Ba mbàda wua-nanggauka la lodu nàhu haàtu umbuku anakeda mini pa-kabubulu-kau nyumu. Màla àruki ka na-kawulangu nuna na anakeda la Ihirailu.

¹⁵Na rii anamu kanjupu mbuha-nanggau nyumu. Mbàda wua-nangauka marihi welingu la pawua-da da tau mapihu anakeda mini. Tàka nàhu mbàda wua-nanggauka haàtu umbuku mini mawua-nggau ànjaru mabidi la paluri, dàngu ma-kabubulu-kau la rehi kaweda-mu,” wàdanya.

¹⁶Napiti-ya nuna na anakeda paraïna i Naomi hi na-kabubulu-ya wàngu dira mbuha-nanya.

¹⁷Ba jia ndàbaha da kawini da ma-ndàdiku lai nu la lihida, da patamu-nya nuna na anakeda Ombitu. La nimbihu tau dapeka-ya, “Ninguka anana mini i Naomi,” wàda. Jiaya i Ombitu yiana-maka na amana i Ihai napa la lodu malamiri, tàka i Ihai jiaya na amana i Ndautu.

¹⁸Dàngu yiana-ya na ruku dedina i Ndautu pa-kiringu welingu lai Perihu, tuna nu: i Perihu, i Hehirungu, i Ràmu, i Aminandàpu, i Nahahungu, i Hàlamungu,[10] i Mbowàhu, i Ombitu, i Ihai, i Ndautu.