Read Kambera 1 HAMUILU 1 Bible Online

1 HAMUILU 1 - Kambera bible

1 HAMUILU 1

¹Ninya na haàtu na mini, Elikana-ya na tamuna, welingu la kabihu Epuraïmu. Nyuna na-ngiangu la paraingu Rama, la ngaba ma-palindingu la Epuraïmu. I Elikana anana i Yarohàmu dàngu umbuku-na Elihu-ya. Nyuna tau la biliku Tohuya, kahanga-na na kalibaru Hupu.

²Tau madua-ha da papaha-na i Elikana, i Hana dàngu i Penina. I Penina ningu anana, tàka i Hana ndia.

³Nimbihu ndaungu ba na lua la Hilu i Elikana welingu la Rama la pa-hamayangu dàngu la pawotu kameti maraku patunu lai MIRI Mahupu-mbiha. Da ratuna i MIRI la Hilu jiaha i Hòpuni dàngu i Pineha, da anana i Eli.

⁴Handàka - handàka i Elikana jàka nawotu kameti maraku, na-kawàra hangia-nja i Penina dàngu da anana nimbihu-da ba nawua-nja tolungu kameti maraku.

⁵Tàka i Hana nawua-nya hangia-aka duna, nadu[1] i MIRI ba nda nawua-nya ana nyuna. Jiapa-kai ba tuna i Elikana lalu mbana mbuha-nanya i Hana.

⁶I Hana naingu-mana ba na-pahidu etiya dàngu ba na-paaka-nya paraïna i Penina, na rii ruana, ba nda nawua-nya ana paraïna i MIRI.

⁷Nimbihu ndaungu ba tuna nu mànu, jàka dalua-ka la Umana i Miri, nuangu-mana i Penina ba na-pahidu etiya i Hana. Nakàli hii i Hana, dàngu nda nabihu pangangu rukuna ba paaka-nya.

⁸Tàka handàka - handàka i Elikana na leina, na-paàra-nya, “Nggikina hi muhii Hana? Nggikina hi ndau bihu pangangu dàngu hiu hawina? Ka nda kurihi pa-wilingu nu nyungga lai nyumu welingu la tau hakambulu anakeda mini?” wànanya.

⁹La hau na lodu ba dahàla-ka pangangu la Umana i Miri la Hilu, hadangu-nanyaka i Hana welingu la menja ngia pangangu-da. La rehina nu, nimanyai duna i Eli la Umana i Miri, mandapu-na-padua la kanjàka-na la lihi pindu. Dàngu hawina nda ukuya hamayangu-nanyaka i Hana lai MIRI ba ngi - ngibana pahii.

¹¹Tunaka nu peka-nanyaka lii pa-njanjingu i Hana, “Dou MIRI Mahupu-mbiha, hamata àruka yia atamu! Ilu àruya na mayila-nggu. Namu àruka atamu dàngu àmbu maromba-dungga! MIRI, jàka muwua-ngga haàtu anakeda mini nyungga yia atamu, ku-panjanjingu-ma duku la pa-huharu-nya lai Nyumu la ngala lurina. Ku-panjanjingu-mbu ba nda jia kikiru-aya na lunggina,”[2] wàna.

¹²Dira mandaiya ba na-hamayangu i Hana, tàka i Eli panau-mananya na ngaruna nuna na tau kawini.

¹³I Hana hamayangu-nanya la eti, hi jiaya na tàda ngaru-ana ba midu - miduna, nda parongu-ya na papanii-na. Jia-duyaka làbu maüku-nanya hi kiri wàna la eti i Eli.

¹⁴Ka panii dàna-nyaka paraïna i Eli, “Ka ni hi maüku-munyai lai yiahu? Àmbu unungu-dupa angguru!” wànanya.

¹⁵Nahema i Hana, “Nda maüku-anggunya dumu ama, nda ku-unungu ndokuma duku wai angguru! Habaka eti-nggunya duku dàngu hamayangu-nggunya, ba ku-wàlahu-nya i MIRI na pa-handuka-nggu mbuu ndàbana.

¹⁶Àmbu reki-duka nyungga yia ba kawini kiu kaüka. Hi hamayangu tunggu nu jia ba lalu hawina-nggu,” hi wàna.

¹⁷Nanapa-ya i Eli, “Jàka tuna nu kabeli dàngu hàmungu-wa. Màla àru na Ala Ihirailu ka na-patutu-nya na pakarai-mu,” wànanya.

¹⁸Nahema i Hana, “Mili tuu àru-kina ba wàmungga ama,” wànanya. Tunaka nu beli-nanyaka hi nangangu, nda nahili hawina-apa.

¹⁹Hadangu harii i Elikana dàngu kuru umana hada mba - mbarungu-danyaka, dàngu ba dahàla-ka pa-hamayangu lai MIRI, beli-danyaka la Rama. Ka paangu-danyaka i Elikana dàngu i Hana, na papaha-na, ka patutu-nanyaka i MIRI na hamayangu-na i Hana.

²⁰Ka woru ihi-nanyaka nuna na kawini, hi na-habola-nya na haàtu na anakeda mini. Na-patamu-nya Hamuilu,[3] “ba pakarai-nggu lai MIRI-ya,” wàna.

²¹Hilu toma-nanyaka na rehina i Elikana dàngu kuru umana palua la Hilu la pawotu-nya kameti maraku ndaungu i MIRI. Hinggilu-nai nu mbàda pa-njanjingu-naka i Elikana la pawotu pa-tudangu kameti maraku.

²²Tàka la handàka-na yiana, nda na-tundungu-a i Hana. Napanii-nya na leina, “Jàka najàma-ka, napa kulua patuya i Hamuilu la Umana i Miri, dàngu napa ka na-paengangu lai nu la ngala lurina-naka,” wàna.

²³Nahema i Elikana, “Nahàmu-du, wunda bianya jàka nggàraya na mahàmu bau rekiya; ndàdiku-ka la uma ka lupa tomaya na rehi jàmana na ananda. Màla àruki i MIRI ka na-palangatàka-nya na panjanji-mu,”[4] wànanya. Jia-duyaka, hi na-ndàdiku la uma i Hana lupa tomaya na rehi jàmana na anana.

²⁴Ba najàma-ka i Hamuilu lua-nanyaka patuya la Umana i Miri la Hilu paraïna inana. Nu la rehi nuna lalu anakeda-manapa. I Hana nangàndi-mbu heuna na hapi mini rombangu na mambàda tailu mbua ndauna,[5] kanguta uhu nggàndumu hakambulu kilu, dàngu hauna na taneku manulangu mambinu angguru-na.

²⁵Darupu-ya nuna na hapi, hàla hi dalua patuya i Hamuilu lai Eli.

²⁶I Hana napanii dànya i Eli, “Malangu-mu ama! Munamu-kapa nu ama? Nyungga-duka yia na kawini na paita-mu handàkangu ma-ndolaku lai yiahu, ba talànga hamayangu-nggu lai MIRI.

²⁷Na anakeda yiana jia-duyaka na pa-karainggu lai MIRI. I MIRI natutu-yaka na hamayangu-nggu,

²⁸jia ba tuna nuduka huharu-nggunyaka yiana na anakeda ka manguna i MIRI-ya la ngala luri-naka,” hi wàna. Hàlaka lumungu-danyaka[6] lai MIRI.