Read Kambera 1 HAMUILU 10 Bible Online

1 HAMUILU 10 - Kambera bible

1 HAMUILU 10

¹Tunaka nu i Hamuilu hi napiti-ya na kadihi na maningu lonahu haitungu, hàla na lonahu nu hi naburi-ya la pinu katiku-na i Haulu, dàngu hi na-puduku-ya i Haulu napanii-nya, “I MIRI katua-nanggauka panjadi hanganji la Ihirailu banjaru-na. Nyumuka napa ma-pareta-ya dàngu ma-kahiri-ya welingu la muhu-daka. Yiana-yaka na tandana lai nyumu. I MIRI ba mbàda pindi-nanggauka nyumu[23] la panjadi hanganji la banjaru-na:

²Tiangu jàka utaliuru-nggaka la lodu nàhu, napa nyumu mu-hàmburu-ha da tau madua tau mini la lihi retina i Rahilu la Hiluha la ngaba Mbanyamingu. Napa nyuda dapanii-nggau: Da kalandai da pahimbu-mu pahunggu-haka. Nàhu na amamu nda na-kadiku-anjapa rukuda da kalandai, tàka jia mànu-maakau nyumu pa-paàra-na nggikina wàndaka ka hungguya nyuna wànanggau, wàda,” wàna.

³Nahili panii i Hamuilu, “Welingu lai nu nyumu mulaku pangalangu lundu tàka la pingi ai la ngia pa-lumungu la Tamburu. Lai nu nyumu napa mu-tàbuku-ha da tau mini madua haàtu da ma-talànga hanggangu la Mbetilu la pangàndi kameti maraku lai Ala. Na haàtu weli-nanja da ana kamàmbi tailu ngiu, na haàtu nangàndi tailu mbuada da roti, tàka na haàtui ngàndi-nanya taneku manulangu maningu angguru-na.

⁴Nyuda napa da-pamàla hiana-nggau dàngu napa da-wuanggau dàmbu roti, màta kau kei-maha.

⁵Hàlaka nu màta kau laku la tandula-na i Ala la Nggimbia, la ngia pa-pamaüngu-na na tau Pilitingu. La pindu tama la paraingu, napa nyumu mu-pahili dàngu da hajuru wunangu da ma-kamburungu welingu la tandula ngia pa-maraku. Nyuda renja-danya, kayaka-danya, jungga lamba-danya, lamba ha-kapapa-danya dàngu hapini-danya taleli.

⁶La rehi nuna nyumu hi jia harua biana-nggau Ngahuna i Miri dàngu napa nyumu hi mukikunja la parenja, la pa-kayaka dànja nyuda, hàla ka ngalangu-munyaka huri bidi hi lupa hau ailulu-yaka na wikimu.

⁷Jàka dapatutunguka nuda mbuu ndàbada, wa bia-nyawa nggàraya na mahàmu bau rekiya, nadu i Ala ba ndutu-mananggau.

⁸Hàlaka nu màta kau laku la Ngginggalu dàngu kau patiangu lai nu pihu mbua lodu. Napa kutàka la pangàndi kameti maraku patunu dàngu kameti pa-papeku wàngu, dàngu la papanii-nggau nyumu jàka nggàraka bàdi paula-mu,” wànanya.

⁹Ndedi mbàdiku-na ba na-taliuru-nyaka i Hamuilu, ka ngalangu-madua-nanyaka huri bidi i Haulu welingu lai Ala. Dàngu mbuu ndàbana na-papatàka-na i Hamuilu lai nyuna, jia ndàba-madua-yaka na matumbu la lodu nunama.

¹⁰Ba natàka-ka i Haulu dàngu papalewana la Nggimbia, ka hàmburu-madua-danjaka da wunangu ba hajuru-da. La rehina nuna harua-madua-nanyaka Ngahuna i Ala, hi na-kikungu parenja dàngu pa-kaladaku dànja da wunangu.

¹¹Da tau da matanda-ya la wungana ba daita-yaka ba tuna nu na hurina, ka paàrangu-danyaka dàngga anguda, “Nggàraka madedi-ya ni na anana i Kihi? Ka wunangu-mayaika duna ni i Haulu?” wàda.

¹²Hàla na haàtu na ma-engangu lai nu, na-paàrangu, “Nggikida nàhu da wunangu hawiangu — bai pareki-nya nyimi nggamuha da amada nyuda wàmi?” wàna. Jiadu-yaka na pakiri-na hi nalara lii wàngu, “Ka wunangu-mbuyai duna i Haulu?” hi wàna wàngu.

¹³Ba nahàla-ka parenja dàngu pa-kayaka i Haulu, laku-nanyaka la ngia pawotu maraku dita la pinu tandula.

¹⁴Ba naita-yaka i Haulu dàngu papalewa-na paraïna tuyana, hi na-paàra-nja, “Nggi welimi nyimi?” wànanja, nahema i Haulu, “Himbu-manja da kalandai da ma-mbulangu, tàka ba nda maita-hapa, hi malua tomaya i Hamuilu,” hi wàna.

¹⁵“Ka nggàra wànanggau nu nyumu?” hi wàna ba na-paàrangu na tuyana.

¹⁶Nahema i Haulu, “Napeka-nggama, nuda da banda pahunggu-haka wàna,” hi wàna. Na nyuna i Haulu nda napanii-anya na tuyana, ba na-katua-yaka nyuna la panjadi hanganji paraïna i Hamuilu.

¹⁷Nyuna i Hamuilu paau-nanyaka na rayatu Ihirailu ka pauhi la Mihipa,

¹⁸tàka hi napanii-nja, “Yiana-ya na puluna i MIRI, Ala Ihirailu, ‘Nyungga ku-karia-nggai paluhu welingu la Mehiru dàngu hi ku-pahàla-kai welingu la kuaha tau Mehiru, hamanai welingu la mbuu ndàbana na banjaru hawiangu na ma-panyàku-kai nyimi.

¹⁹Nyungga ku-butuhu-kaika welingu la mbuu ndàbana na mayila-mi dàngu na ura dedimi, tàka nàhu nyimi tuhaku-minggaka, Alami, nadu nyimi ba karai-minyaka lai Nyungga ka kutunggai haàtu hanganji-mi. Tàka nàhu, hàmukai duna, pauhi-wa la hangganggu Nyungga, MIRI-mi, tundunya na kabihu-mi dàngu na biliku-mi,’ wàna,” hi wànanja.

²⁰Hàla i Hamuilu hi na-paràha-nja mbuu ndàbada da kabihu pa-hurungu la hangga, ka na kabihu Mbanyamingu-ka na panggàna pindi.

²¹Ba na-paràha-nyaka pa-hurungu na bili - biliku la kabihu Mbanyamingu, na biliku Màtiri na panggàna pindi. Na hupu njàpuna hurungu-nanyaka na mini - minika la biliku Màtiri,[24] ka i Haulu anana i Kihika na panggàna pindi. Ka himbu-danyaka i Haulu, tàka nda nianya.

²²Jia-duyaka na tau hi da-paàra-nya i MIRI, “Dou MIRI, ninya nu na tau nuna lai yiahu?” wàda. Nahema i MIRI, “I Haulu kapàndi-nanya la hambeli ngia patu malanja,” hi wàna.

²³Ka manyamalu lua-danyaka papiti-ya welingu lai nu, hi da-karia-nya la honga rayatu. Ka ndolaku-nanyaka i Haulu la hongada nyuda, ka nyuna-maka duna na majangga meha; na tau hawiangu la hupu kundu-ananya.

²⁴Tunaka nu panii-nanyaka i Hamuilu la rayatu, “Yiana-yaka na tau papindi-na i MIRI, nda ningu menjana lai nyuta mbuu ndàbanda,” hi wàna. Mbuu ndàbana na banjaru hi na-kayaka, “Nuya nu na hanganji-nda!” wàda hàla.

²⁵Tunaka nu nyuna i Hamuilu hi na-palara-nya la banjaru na wai ngerana dàngu na pa-tangguna na hanganji, hi na-tulihu-ya la mbuku na pa-pahàmu daa la pangia matua. Hàlaka nu i Hamuilu hi na-paràha hàlanya na banjaru pabeli la umana haàtu - haàtu.

²⁶I Haulu-mbu beli-nanyaka la umana la Nggimbia, ba dalaku karia-nya hau dangu mini hakapu kaborangu[25] dàngu na tau na pajuju etina paraïna i MIRI.

²⁷Tàka ninja da tau akatu da mapanii, “Nggiki peku-naka na tau yiana napa hi ningu linguna lai nyuta?” wàda. Da-pakalana-ya i Haulu dàngu nda ninguma duda pa-nujuru-danya. Nyuna duna hama tuna manda pi bianya ba tudanya nu.