Read Kambera 1 HAMUILU 11 Bible Online

1 HAMUILU 11 - Kambera bible

1 HAMUILU 11

¹Tunaka nu i Nahàhu, hanganji Amungu, na-pauhingu tanatara-na, hàla hi dalua pa-nggupulu-ya na paraingu Yambihu la ngaba Nggiliatu. Na tau mangia-nya la Yambihu da-pajola-nya kareuku tungu yia i Nahàhu, “Tura bàdi pa-ràndingu dàngu nyuma, napa manyàku-ma duma lai nyumu,” wàdanya.

²Nahema i Nahàhu, “Ka ku-mbuhangu patura lii pa-ràndingu, tuna yia badi na pawàngu, ‘Nu ka kuhiku-ha da mata kawana-mi haàtu - haàtu, tanda paaka-nya na Ihirailu nggubulu-na!’ ” wànanja.

³Tunaka nu ka hema-danyaka da liku uru la paraingu Yambihu, “Jàka tuna nu makarai-kau kau wuaki-nggama manggawangu pihu mbua lodu, ka ma-palewa pàku tau la nggubulu tana Ihirailu. Napa jàka wàngu panda ninguma mabihu pandula-kama, jia-yaka duna hi ma-pajàmangu wikima lai nyumu,” wàdanya.

⁴Tunaka nu ka tàka-danyaka da tau papalewa la Nggimbia, la pangia-na i Haulu. Ba darongu-yaka na lii nuna, hii ndàba-nanyaka na rayatu paraï pambota monungu.

⁵La rehina nuna bidi tàka-maana i Haulu welingu la wokana ba nangàndi-ha da hapina. Ka paàrangu-duna-nyaka, “Nggàraya nu? Nggikina hi nahii ndàba na tau?” hi wàna. Ka peka-danyaka na lii na pa-patàka-da da tau papalewa welingu la Yambihu.

⁶Ba narongu-yaka nuna i Haulu, ka harua-madua-nanyaka paraïna Ngahuna i Miri.

⁷Paraï pambana etina, piti-madua-nanjaka da hapina ba dua ngiuda, narupu-ha hi nalola - lolaha ba hau daa lolada. Tunaka nu nuda da palola - lola hi na-pangàndi-nja la nggubulu tana Ihirailu ba na-pakaria-nya lii pareta, “Nggamu na manda hadangu pa-karia-nja i Haulu dàngu i Hamuilu palua pa-pabera, da hapida napa tuda nu ba lola - lolaha!” wàna. Na banjaru Ihirailu na-mangàdatu, napa hi nggikina wàna biaka i MIRI ba wàda, mbuu ndàbana na tau, nda ningu pa-pahinggilu, hawaritu hàla-mananya la palaku kariangu pa-pabera.

⁸Ba pauhi-nja dàngu ba diha-haka la Mbehiku: Ningu tau 300.000-ya na tau Ihirailu dàngu tau 30.000-ya na tau Yahunda.

⁹Hàlaka nu hi panii tudanja yia da tau papalewa welingu la Yambihu, “Paniinya na tau na mangia-nya la Yambihu, haromu la mbaru ba ndedi na-tidungu na lodu, napa ninguka mandula-ha, wàmi,” wàdanja. Na tau la Yambihu ba danggepi-yaka na lii na matàka-nja, hàmu-danyaka da etida.

¹⁰Hi dapanii-nya i Nahàhu, “Haromu pajàmangu-manyaka wikima, dàngu kau wàngu bia dumu papimu,” wàdanya.

¹¹Haromu, la mba - mbaru, i Haulu nabiwa katailu pambanja da tauna. Ba na-pabarahu-ka njungu-madua-danyaka la padua ngia pa-pamaüngu-na na tau Amungu dàngu hi da-kangaburu-ha. Ndedi na-tidungu-mbu na lodu, i Haulu mbàda talu-ma-ananya na muhu. Na tau Amungu na maluhu welingu la ngepi, paiha ngganggangu-nanyaka hi lupa nda ningu tau madua mapalai pa-kariangu.

¹²Tunaka nu paàrangu-nanyaka na banjaru Ihirailu lai Hamuilu, “Nggihaka nàhu da tau da mambàda toru mbeni papanii, ba nda ràka jia-aya i Haulu na hanganji-nda, ba wàda. Puli-nggamanja nyuma ka ma-pameti-ha,” wàda.

¹³Tàka nanapa-ya i Haulu, “La lodu nàhu àmbu ningudu haàtu pa-pameti, nadu la lodu nàhu i MIRI ba mbàda pamara-nanyaka na Ihirailu,” wàna.

¹⁴Hàla i Hamuilu hi napaniinja, “Màla ndàba-ndawa ka talaku la Ngginggalu ka pa-karàngi-ya ba hanganji-ndanya i Haulu,” wàna.

¹⁵Tunaka nu ka laku hàla-danyaka la Ngginggalu, dàngu lai nu la ngia pa-lumungu hi pa-karàngi-ya ba hanganji-ya i Haulu. Wotu-danyaka kameti maraku pa-papeku wàngu, tàka i Haulu dàngu nggubulu-na na banjaru Ihirailu mbabu-danyaka na lii nuna.