Read Kambera 1 HAMUILU 12 Bible Online

1 HAMUILU 12 - Kambera bible

1 HAMUILU 12

¹Hàla panii-nanyaka i Hamuilu la nggubulu banjaru Ihirailu, “Nyungga ku-patutu hàla-nyaka mbuu ndàbana na pakarai-mi dàngu kuwotu-nggaika haàtu ma-hanganji-nggai nyimi.

²Piti welingu nàhu nyunaka duna na ma-kapipi-kai nyimi. Tàngaru-ka, nyungga yia kaweda-nggunyaka dàngu uangu-manggu-nyaka. Mandai-mangguka ba ku-kapipi-kai nyimi — piti welingu pabidi mininggu lundu nàhu. Ita wiki diminja da ananggu ba matua-danyaka.

³Nàhu ni ndolaku-nggunyaka la hanggami! Jàka ningu kai manjala pambàda wundanggu, kàla biaka la hanggana i MIRI dàngu la hanggana na hanganji na papindi-na. Màla ku-handàkangu-ka nu papiti hapina jàka ndia kalandai-na na tau hawiangu? Màla ku-handàkangu-ka nu pa-palapingu jàka ndia pa-kapidihu jàka ndia pakei li hambeli? Paniiwa nu, ka pekuna jàka nggàraya na papiti-nggu ka ku-pabeli-nya,” hi wàna.

⁴Dahema da tau, “Ndia-a, ndau handàkanguma dumu ama pa-palapingu jàka ndia pa-kapidihu-kama; ndau handàkangu-ma dumu ama papiti ngga - nggàra jiapa ka ngga manguna-kadu,” wàna.

⁵Hàla ka panii-nanyaka i Hamuilu, “La lodu nàhu i MIRI dàngu na hanganji papindi-na nyudaka da ma-hakahii ba lohangu-nanyaka ba nda ana ningua duku njalanggu,” wàna. “Jiaya, tubangu-ma, i MIRI hakahii-ndanya,” hi wàda ba dahema.

⁶Hàla i Hamuilu hili panii-nanyaka, “I MIRI-maka na mapindi-ha i Muha dàngu i Harungu, da ma-karia-nja da boku la mangilumi paluhu welingu la Mehiru.

⁷Nàhu àmbi laku kàdi. Ba panjala-nggunggai nàhu nyungga la hanggana i MIRI. Namuha[26] mbuu ndàbada da mila etina i MIRI da pambàda paita-nanggai nyimi dàngu da boku la mangilu-mi.

⁸Ba jiaya na tàkana i Yakupu dàngu kuru umana la Mehiru, tàka da tau Mehiru da-kapidihu-ha nyuda,[27] da boku la mangilu-mi karai-duda-nyaka pa-ndulangu lai MIRI, tàka i MIRI hi na-paràha-nja i Muha dàngu i Harungu. Da tau madua nuda-duka da ma-karia-nja paluhu welingu la Mehiru da boku la mangilu-mi dàngu hi dandula-ha pa-padaingu la tana yiana.

⁹Tàka la malamiri hi mbula-ma-adanya i MIRI, Alada, jia-duyaka hi napuli-maanja pa-kangaburu-ha dàngu patalu-ha paraïna i Hihera, na ngora tanatara la Hahuru, dàngu paraï tau Pilitingu lupa na hanganji Muapu.

¹⁰Tunaka nu hamayangu-danyaka lai MIRI hi dapeka-ha da njalada dapanii, ‘Njala-mama-nyaka ba ma-taluru-nggau Nyumu, dou MIRI dàngu ba malumu-nja da kahala hada marapu Mbaàlu dàngu Ahitoritu. Tàka nàhu pamara àru-kama welingu la muhuma, napa ma-paatangu-ma duma wikima lai Nyumu!’ wàda.

¹¹Tunaka nu i MIRI hi na-palewa-ya i Nggidiungu, hàla i Mbaràku,[28] hili hàla i Yeputa, tàka la malamiri nyungga-duka. Nyuma ma-nimbihu wikima la pa-pahàla-kai welingu la muhumi; hi peku luri mànjaku-mi.

¹²Jiapa-kai ba tuna bai ita-yaka ka kangaburu-ha ba wàna-nggaika i Nahàhu hanganji Amungu, jukaru-minyaka i MIRI na hanganji-mi, tàka hi mipanii lai nyungga: ‘Ma-rinjungu nyuma ka na-pareta-kama paraï haàtu hanganji,’ wàmi.

¹³Nàhu, tàngaru, yiana-yaka, na hanganji papindi-mi. Pa-karai-mami-nyaka, tàka i MIRI hi nawua-nggainya.

¹⁴Oha-amika jàka mitembi-ya i MIRI, dàngu jàka mi-paatangu wikimi lai Nyuna, dàngu kai patingi-nya, kai karadaku-nya na pareta-na, ri - rihi jàka pa-daingu tuturu-mi nyimi dàngu na hanganji-mi lai MIRI Alami.

¹⁵Tàka na-aka nyuna jàka ndai patingi-pàku-nyaka i MIRI, tàka hi lawa bia-minya na pareta-na, jiangu-maka duna nyimi dàngu na hanganji-mi[29] napa ba nalawa-nggai i MIRI.

¹⁶Nàhu patingingu-ki! Panau-maya na pa-hangàtarungu manda najaru na pawunda-na napa i MIRI la paita matami.

¹⁷Napa kuwara-nya i MIRI, jiapa ka wanduya nàhu, napa i MIRI na-papuru-nya na kanduruku dàngu na urangu ba jiaya na pahema wànanya na hamayangu-nggu. La rehi nu pàda-dimi-nyaka ba na-bokulu na njalami hanggangu lai MIRI rukuna bai karai haàtu hanganji,” wànanja.

¹⁸Ka hamayangu-nanyaka i Hamuilu, nu la lodu nunama i MIRI ba na-papuru-nya na kanduruku dàngu na urangu. Nggubulu-na nuna na banjaru da-mangàdatu wànya i MIRI dàngu i Hamuilu.

¹⁹Hàla ka panii-danyaka i Hamuilu, “Ndula àru-kama ama, hamaya àru-nggama huruma lai MIRI, Alamu, ka àmbu mameti. Nàhu mapàda-manyaka, hinggiluda da njala memama, hili njala-manyai nàhu ba makarai haàtu hanganji,” wàda.

²⁰Nahema i Hamuilu, “Àmbi mangàdatu, jiapa kai tuya-kadu nuna na ma-akatu, àmbi pa-mbelingu-du welingu lai MIRI, tàka màta kai pa-daingu bai weli etingu pa-paatangu wikimi lai Nyuna.

²¹Àmbi kiku-dunja da marapu da manda-màka pandula-kai dàngu pa-pahàla-kai nyimi, làti duna ba nda nianja nyuda nu da marapu.

²²I MIRI duna mbàda harangu-manaka, napa Nyuna nda na-dunjaku-anggaipa, nadu ba mbàda bota-mana-nyaka la patukai nyimi banjaru wikina.

²³Jàka jiaka nyungga, mili àmbu kutuu manjala hanggangu lai MIRI la panda hamaya-nggai ndumami. Tàka na nyuna pa-nuangu-manggunya duku napa pa-papeka-nggai hangia - hangia mahàmu dàngu ma-deningu.

²⁴Tembi-yawa i MIRI dàngu pa-atangu-ma wikimi lai Nyuna bai manundu weli etimi. Namu-maha da pa-patumbu - patumbu-na i MIRI da ma-bokulu ndumami nyimi.

²⁵Tàka jàka mi-padaingu bia patuu manjala, napa nyimi dàngu na hanganji-mi molungu-minyaka,” wànanja.