Read Kambera 1 HAMUILU 13 Bible Online

1 HAMUILU 13 - Kambera bible

1 HAMUILU 13

¹La hau na lodu, ba hanganji-yaka i Haulu,[30]

²napindi 3.000 tau Ihirailu; welingu lai nyuda nu tau 2.000-ya na ma-ndàdiku dànya nyuna la Mikumàhu dàngu la ngaba ma-palindingu la Mbetilu, tàka na 1.000 dalaku karia-nya i Yunatàngu na anana la Nggimbia la ngaba kabihu Mbanyamingu. Na rayatu na marihi napuli-nja pabeli la umada haàtu - haàtu.

³Tunaka nu i Yunatàngu na-pameti-ya na ngora pabera Pilitingu[31] la Nggemba, tàka na banjaru Pilitingu narongu-mayaka na rukuna nuna. Hàla i Haulu hi na-paràhangu papini-ha da taleli la nggubulu-na nuna na tana la papaau-nya na tau Imbarani ka da-hadangu la pa-pabera.

⁴Nu la nggubulu banjaru Ihirailu pa-bobaru-ya ba mbàda pameti-nanyaka nuna na ngora pabera Pilitingu paraïna i Haulu dàngu na tau Pilitingu lalu karaü-nanya eti na tau Ihirailu. Jia-duyaka na tau hi na-patundungu ba paaunya la pa-pambulu dànya i Haulu la Ngginggalu.

⁵Nu la rehi nu na tau Pilitingu mbàda pauhi-manaka la pa-kangaburu-ya na tau Ihirailu; nyuda ningu 30.000[32]-da da kareta pabera-da, 6.000-ya na tau la njara, dàngu na tanatara-na hama wara la hingi tehiku-ya. Nyuda da-pamaüngu la Mikumàhu la pahunga loduna na Mbetu-Awingu.

⁶Tunaka nu nyuda pa-kahàruku-madua-danyaka na pa-kangaburu-da ba dawàngu kita etida la tau Ihirailu, hi lupa ngiangu-nanyaka la ma-panggàpingu na tau Ihirailu. Nadangu na tau Ihirailu na ma-kapàndi la kubu liangu dàngu la kubu palindi jàka ndia la manggawa - manggawa kaba watu, jàka ndia la humuru dàngu la kubu tana,

⁷ningumbu mapala la hapapa Luku Yorundangu hi datama la ngaba Nggàtu dàngu Nggiliatu. I Haulu la Ngginggalu biaya-pa, na rayatu na matundu-nya ta - tàta-daka pa-mangàdatu.

⁸I Haulu na-patia-nya i Hamuilu mbàda pihu mbua lodu-naka; pa-jàngapu-nya na paràndi-na i Hamuilu lai nyuna, tàka i Hamuilu ndedi natàka ndoku la Ngginggalu, tàka i Haulu ngeri dunjaku-nanyaka tauna.

⁹Jia-duyaka hi napanii-nja, “Ngàndiha nàmu da kameti maraku patunu dàngu da kameti maraku pa-papeku wàngu,” wànaka. Hàla ka nyuna wiki madua-ka mawotu-ha nu da kameti maraku patunu.

¹⁰Tàka ba hina-maapa nahàla pa-palaku-ya, tàka-madua-nanyaka i Hamuilu. I Haulu nalua pa-tàbuku-ya la pa-kamàhaku-nya,

¹¹tàka i Hamuilu hi na-paàrangu, “Nggàra-yaka nu Tamu Umbu na papalokumu?” wànanya. Nahema i Haulu, “Kuita-ya na rayatu ngeri dunjaku-nanggaka, tàka nyumu ama ndau tàka wàdunyai na rehi patumu. Hinggilu-nai nu na tau Pilitingu pauhi-nanyaka la Mikumàhu.

¹²Hàla na pa-kanandi-nggu napa hi jia nàmu bia-nyaka na tau Pilitingu pamai pa-kangaburu-ka lai yiahu la Ngginggalu wànggu, dàngu ndedi ku-kamahi-nya na mila etina i MIRI. Jia-duyaka hi kubota-ya la pawotu-ha da kameti maraku,” wàna.

¹³Narongu-yaka nuna i Hamuilu hi napanii-nya i Haulu, “Ma-kambànga ailulu-yaka nuna Tamu Umbu na pahada ngàndimu. Làti pàku kau patundu-nya na pareta-na i MIRI Ala, jiangu-maka duna ba napadai-nggau nyumu i MIRI dàngu wàla wuamu la pa-hanganji la Ihirailu lundu nu - nu.

¹⁴Tàka nàhu nyuna Tamu Umbu na pareta-mu nda na-màndungu-apa. Nadu nyumu Tamu Umbu ba ndau patundu-nya na pareta-na i MIRI, ka pindi-nanyaka duna tau hawiangu na paora-na hi nawotu-ya la pa-hanganji-nya na banjaru-na,” hi wànanya.

¹⁵Tunaka nu i Hamuilu dunjaku-nanyaka la Ngginggalu hi nalaku pa-ngalangu la Nggimbia la ngaba Mbanyamingu. Nu la rehi nu i Haulu pa-nggànapu-nanja da pamba tanatara-na, ràkangu tau 600-ya.

¹⁶Tuna nuka i Haulu dàngu i Yunatàngu anana, dàngu da mahada karia-nya ba dawulu maüda la Nggemba la ngaba Mbanyamingu; tàka na tau Pilitingu nawulu maüna la Mikumàhu.

¹⁷La rehina nuna ninja ba tailu mbua pa-jurungu-ya na tau rambangu na maluhu welingu la maü tau Pilitingu da malaku pa-rambangu; na hau pa-jurungu nalaku hanggangu la Òpura la ngaba Huwàlu,

¹⁸na hau pa-jurungu na padua wàna na-hanggangu la Mbetu-Horungu, tàka nahilu hau pa-jurungui na-hanggangu la padira tana tubana na Lolangu Hamboingu dàngu na maràda telangu.

¹⁹La nggubulu Ihirailu nda ningu tukangu bàhi, nadu na tau Pilitingu ba nahiri-nya na tau Imbarani pa-pandoi hapanda dàngu nimbu.

²⁰Jia-duyaka na tau Ihirailu nalua-maduka bàdi la tau Pilitingu jàka da-mbuhangu padeli-ha da mata lukuda, da pariku-da, da kataka-da dàngu da ketuda;[33]

²¹na wundana na madeli kataka dàngu da ma-pahàmu paànju wàngu hapi[34] hau àmahu kudu, dàngu nadeli mata luku jàka ndia pariku dàmbu àmahu kudu.

²²Tuna nuduka nu la lodu pa-kangaburu la Mikumàhu, nda haàtu-a la tau Ihirailu maningu hapandangu dàngu nimbungu, hinggilu-da i Haulu dàngu i Yunatangu anana.

²³Da tau Pilitingu datunya hau ngia padai, na ngia pa-kahiri-ya na manggawa palindi la Mikumàhu.