Read Kambera 1 HAMUILU 14 Bible Online

1 HAMUILU 14 - Kambera bible

1 HAMUILU 14

¹La hau rehi i Yunatàngu napanii-nya na bidi mini na matanggu ngàndiha da madàka-na, “Màlawa, ka talua nu papa la ngia padai tau Pilitingu!” wànanya. Tàka nda na-paramihi-a la amana.

²La rehi nuna i Haulu talànga ninya la lumbu ai ndalima la Mikurungu; nda nggi tuana marauna welingu la Nggimbia. Na rayatu na ma-karia-nya ràkangu tau 600-ya.

³(Na ratu na mangàndi eputu jiaya i Ahiya, anana i Ahitupu, anguna paluhu i Ikambatu, anana i Pineha, tàka i Pineha anana i Eli, na ratuna i MIRI la Hilu.) Nda napi-mbunya rayatu ba mbàda laku-naka i Yunatangu welingu lai nu.

⁴Nu ka toma la ngia padai, tau Pilitingu, i Yunatàngu nali bàdi la hau manggawa palindi na njonga kaba watu dàka ba dàmbuda, da ma-tamungu Mbohihu dàngu Heni.

⁵Na kaba watu la mbara dia na-hanggangu la Mikumàhu, tàka la mbara luru na-hanggangu la Nggemba.

⁶Ka panii-nanyaka na bidi mini i Yunatàngu, “Màla ka talua la ngia padai tau Pilitingu, da tau hangàdangu. Raï-ai duna hi nandula biata i MIRI. Nadu ba namàka-maduna i MIRI pa-wuangu talu, ka wàngu tau madangu-kai jàka ndia ka nawàngu tau hawutu-kai,” wànanya.

⁷Nahema na bidi mini, “Nggàra ula jàka wàmu nu hi umbu,[35] ku-patundungu-ma duku,” hi wàna.

⁸“Hàmudu,” hi wàna i Yunatàngu. “La rehi palawa ba wànda, napa ka ta-pawuwangu wikinda la tau Pilitingu.

⁹Jàka da-paràha-nda pa-ndàdiku dàngu panapa-ha ba damai lai nyuta, màta ka haninda-ka lai nu dàngu àmbu tapala-du.

¹⁰Tàka jàka da-paràha-nda palua lai nyuda, napa ka talua lai nu, nuna tanda-duyaka ba mbàda puli-nanjaka i MIRI lai nyuta,” wànanya.

¹¹Nu ba da-pawuwangu-ka wikida nyuda la tau Pilitingu la ngia padai, panii-danyaka da tau Pilitingu, “Tàngaru-ha nida da tau Imbarani da maluhu welingu la kubu liangu ngia pa-kapàndi-da!” wàda.

¹²Tunaka nu hi dawara-nja i Yunatàngu dàngu atana, “Kandekalu-wa nàmu ka ma-paita-nggai[36] ngga - nggàra lai nyimi!” wàdanja. Ka panii-nanyaka i Yunatàngu la bidi mini, “Tundungga, nadu i MIRI ba puli-nanjaka nyuda la Ihirailu,” wàna.

¹³Ba dàngu kikungu-na nu na bidi mini kahuluru-nanyaka i Yunatàngu hu dita. Wudaku ba wànaka i Yunatàngu hanggu - nggubalu madua-danyaka da tau Pilitingu ba na-nàhaku-ha paraïna nyuna, tàka nàmu luangu la kajia-na na pameti-ha paraïna bidi mini.

¹⁴Nu la kawunga kangaburu-na, i Yunatàngu dàngu nuna na bidi mini ràkangu tau dua kambulu-ha da pa-pameti-da; nu na ngabana lai nu pawàngu-maya na lerangu-na, talànga wanguna ràkangu hau beri patu hekutaru-ya.[37]

¹⁵Na rukuna nuna na matumbu kanggupuku-nanyaka na tau Pilitingu na maninya la maü dàngu la maràda. Nggubulu-na na tau Pilitingu la ngia padai - ngia padai dàngu na kapuli - kapuli ma-rambangu mangàdatu-danyaka; màlai ba naridu-mbu na tana hi lupa na-pariu raüngu nda ukuya.

¹⁶Nu la rehi nu na tanatara-na i Haulu da ma-manggangu la Nggimbia la ngaba Mbanyamingu, daita-ha da tau Pilitingu ba dapalai pahimbu hàmburungu, ba dawàngu pambingu halawàla.

¹⁷Ka panii-nanyaka i Haulu la tau la wawana, “Dihaha da tanatara dàngu kai tàngaru-ya jàka nggamuya na manda ninya,” wànanja. Hi da-pahàra-nya nuna na pareta, ka pi-danyaka i Yunatàngu dàngu na bidi mini na mangàndi-nya madàka-na ba nda ninja.

¹⁸“Ngàndiya nàmu na eputu,”[38] hi wànanya na ratu Ahia nyuna i Haulu. (La lodu nuna i Ahia nangàndi-ya nuna na eputu la tau Ihirailu.)[39]

¹⁹Ba talànga panii dàna-nyaka na ratu nyuna i Haulu, na ma-kanggupuku la maü tau Pilitingu manaü bonjangu-naka, jia-duyaka i Haulu hi napanii-nya na ratu, “Nda ningu-apa pekuna la pakarai panaungu-na i MIRI!” wànaka.

²⁰Hàla handàkangu laku-madua-nanyaka i Haulu dàngu da tauna la ngia pa-kangaburungu. Lai nu ita-danjaka da ma-kanyaüru la honga tau Pilitingu ba manaü parukangu-naka, ba da-pabelingu dàngga anguda pa-panàhaku dàngu pa-pameti wikida.

²¹Da tau Imbarani da ma-ngiangu la ngaba tau Pilitingu, dàngu ba da-kikungu-maka tanatara Pilitingu, pambelingu-danyaka[40] hi da-pambulungu lai i Haulu dàngu i Yunatàngu.

²²Dàngumbu da tau Ihirailu da ma-kapàndi la tandula - tandula Epuraïmu, da marongu ba palai-danyaka da tau Pilitingu, pa-mbulungu-madua-danyaka hi da-kangaburu-ya na tau Pilitingu.

²³Nyuda da-pakangaburu la ànda lundu da-làpahu-nya la Mbetu-Awingu. I MIRI na-pamara-ya na Ihirailu la lodu nuna.

²⁴La lodu nuna da tau Ihirailu da wàngu pa-maluputu paraï pa-rimbangu, nadu i Haulu ba mbàda harangu-naka, “Pa-ràtungu-ya na tau na mangangu ngga - nggàra la lodu nàhu, jàka ndedi-madu tatungu wunda kiringu la muhunda,” wàna. Jia-duyaka nda ningu-mapa duna mangangu la hau lodu nuna.

²⁵Tunaka nu tàka ndàba-danyaka[41] la hau omangu, dangu ailulu manggaluangu pahunggu-da lai nu,

²⁶tàka nda haàtu ndoku mangangu hawutu nu da manggaluangu, nadu ba da-mangàdatu panggàna-ha ràtungu papeka-na i Haulu.

²⁷Tàka i Yunatàngu nda napi-anya duna na amana ba na-pangàdu wànya ràtungu na rayatu, jia-duyaka hi na-pajola-nya na tokungu pangàndi-na, hi na-kajuku-nya la hibu manggaluangu, hàla napiti-ya na manggaluangu hi nanganya. Ndedi mbàdiku-na pàdangu-nanyaka wikina ba na-hayandalu beli dàngu ba halangatu wàngu-nanyaka.

²⁸Tunaka nu ninya na haàtu na tanatara na mapanii dànya, “Nyuma mbuu ndàbama maluputu hàla-manyaka paraï pa-manjiu. Nadu na maràmba amamu na-pangàdu wànggama harangu, ‘Pa-ràtungu-ya na tau na mangangu la lodu nàhu,’ ba wàna,” wànanya.

²⁹Nahema i Yunatàngu, “Lalu mbana làpahu-naka nyuna i ama ba tunanya nu na banjaru-nda! Tàngaru-ka ni nyungga nàhu na-rihingu hàmu-maka na ihinggu ba ku-pàdanya, ba kuhàla-ka pangangu hawutu manggaluangu.

³⁰Làti pàku na rayatu la lodu nàhu ka pahia-nya pangangu da pangangu pawàhi-da welingu la muhu na makàku, talànga wanguna nadangu-mapa làti na tau Pilitingu na pa-pameti-nda!” wàna.

³¹La lodu nuna na tau Ihirailu natalu-ya na tau Pilitingu, ba da-pakangaburu-ka la ànda piti welingu la Mikumàhu lupa tàka la Ayalungu. Tàka hàlaka nu onja dira matiki-haka,

³²hi lupa dapara - rambangu la papiti malanja pa-ribangu da pangala-da welingu la muhu; dapiti mbimbi dàngu hapi hi darupu-ha lai numa, pa-ngalangu ngangu-ma-adanya tolungu maningu riangu.

³³Hàla panii-danyaka i Haulu, “Tamu Umbu, natuka manjala na rayatu la hanggana i MIRI, nadu ba danganguka tolungu ningu riangu,” wàdanya. “Nyimi tau kei lamaku-kai!” wàna i Haulu ba na-kabàtingu. “Kilunya na hau na watu bokulu lai yiahu,”[42] wàna.

³⁴Tunaka nu hili panii-nanjai da tau da mangàndi kareuku kawai, “Paihangu-wa nyimi la honga rayatu dàngu kai paràha-nja ka dangàndi-ha da hapi dàngu da mbimbida lai yiahu, ka rupuha lai yiahu la pinu watu, dàngu ka nganja lai yiahu-mai, ba wàngu patuna nu ka àmbu dahili ngangu-dupa tolu ningu riangu, dàngu ka àmbu dahili njala-dupa hanggangu lai MIRI,” wàna. La rudungu nunama nggubulu-na na rayatu dangàndi-ha da banda paramba-da, hi da-rupuha lai nu.

³⁵Hàla i Haulu hi na-pahada-nya ngia pawotu maraku ndumana i MIRI; nuna-yaka na kawunga ngia pawotu maraku pa-pahada-na i Haulu.

³⁶Tunaka nu panii-nanyaka na tauna, “Màlawa ka talua pa-kangaburu-ya na tau Pilitingu la rudungu nàhuma ka rambanja lundu haromu la mbaru dàngu ka ta-pameti mbutaha nyuda,” wàna. Dahema nyuda, “Hamudu Tamu Umbu, wunda-maya jàka nggàraya na mahàmu ba wàmu,” hi wàda. Napaya na ratu, “Màla pàku ka ta-paàra mangilu-nya na panaungu-na i Ala,” hi wàna.

³⁷Ka paàrangu-nanyaka i Haulu lai Ala, “Pekuna nu ka ku-kangaburu-ya na tau Pilitingu? Màla mu-puli-dunja la lima Ihirailu?” wàna. Tàka la lodu nuna I Ala nda nahema-a.

³⁸Jia-duyaka hi napanii i Haulu la hapajia-ha da liku uru rayatu, “Mai ndàba lai yiahu dàngu kai kanuka-ya jàka nggàra njala-yaka na patuu la lodu nàhu.

³⁹Ku-paràndingu parongu-na i MIRI na maluri, na mambàda wuanya patalu wàngu na Ihirailu, na tau na manjala ba huku pameti-maya bàdi, jiapa ka nda jiaya i Yunatàngu ananggu,” wàna. Tàka nda haàtu-mbu matoru mbeni pahema-ya.

⁴⁰Hàla panii-nanyaka i Haulu la nggubulu rayatu Ihirailu, “Indolaku ndàba la tubana yiahu,” wànanja. Dahema nyuda, “Wunda biaya nu hi Tamu Umbu jàka nggàraya na mahàmu ba wàmu,” hi wàda.

⁴¹Tunaka nu hamayangu-nanyaka i Haulu, “Dou MIRI, Ala Ihirailu, ka nggikina la lodu nàhu hi ndau hemaka Nyungga? MIRI, hema àru-kawa la watu matua yiada. Jàka lai nyunggaya jàka ndia jàka lai Yunatàngu-ya na njala yiana, hema wà àrungga watu Urimu, tàka na nyuna jàka ninya la banjaru-mu Ihirailu[43]-ya na njala yiana hema wàngu àru watu Tumimu,”[44] wàna. Tàka na hemana i MIRI na panggàna-nja i Yunatàngu dàngu i Haulu; nu ba tuna nu paloha-nanya ba nda nanjala na rayatu.

⁴²Hàla hi napanii i Haulu, “Dou MIRI, patutu-nggama nu nyungga dàngu i Yunatàngu,” wàna. Ka i Yunatàngu-ka na palangu na manjala.

⁴³Napaya i Haulu, “Nggàra-yaka na pambàda wundamu?” hi wànanya. Nahema i Yunatàngu, “Nyungga kunganguka hawutu manggaluangu, ba kupiti wànya na hupu tokungu-nggu; wai rehingu-manggunya la pameti,” hi wàna.

⁴⁴Napaya i Haulu, “Mili àru i Ala ka nahuku-ngga jàka nda pahuku-nggau nyumu la pameti, Yunatàngu!” hi wàna.

⁴⁵Tàka napaya na madangu lai Haulu, “Huku pameti-mayaka bàdi i Yunatàngu? Làti nyuna pàkudu na mangàndi patalu bokulu wàngu? Ndia-a! Nyuma maparàndingu parongu-na i MIRI na maluri, àmbu jia ningudu hawàla ruu lunggina ma-àlingu welingu la katiku-na i Yunatàngu. Nadu ba pa-ndulangu-na i MIRI-maka hi na-ngalangu patalu wàngu la lodu nàhu,” wàda. Nudu-yaka ba na-pamara-ya rayatu i Yunatàngu welingu la pameti.

⁴⁶Hàlaka nu beli-nanyaka duna na tau Pilitingu la tana ngaba wikida, nadu i Haulu ba nda nahili keha-anjapa.

⁴⁷Ba hanganji Ihirailu-yaka i Haulu, na-pabera la nggi - nggini, ba nalawa hàlanya na muhu Ihirailu, nu na tau Muapu, na tau Amungu, dàngu na tau Endumu, da hanganji tana Homba, dàngu na tau Pilitingu. La nggi bia na-pabera ningu, naingu-mana natalu mànuna.[45]

⁴⁸Ba na-pakangaburu nyuna bai mini pa-ngarangu kaborangu-ya, na pakàku-ya na tau Amaliku, hi na-pahàla-ya na Ihirailu welingu la kuaha-na na ma-rambangu.

⁴⁹Da anana mini i Haulu jiaha i Yunatàngu, i Yihiwu dàngu i Malikihua. Na anana kawini na ma-maaya i Meràpu, tàka na padua wàda i Mikàlu.

⁵⁰Na papaha-na Ahinuamu-ya na tamuna, anana i Ahimaàhu; da ngora pabera-na jiaha i Àpuneru, anana i Neru na anguna paluhu ama i Haulu.

⁵¹I Kihu amana i Haulu, dàngu i Neru amana i Àpuneru, anana i Ambialu-ha.

⁵²La ngala lurina i Haulu naingu-mana na pabera wàngu mbàringu-na ba nalawa-nya na tau Pilitingu. Jiadu-yaka nu, jàka era ningu paita-na i Haulu tau kapàru jàka ndia kaborangu, manyamalu piti-ma-ananya hi natuya angu tanatara-na.