Read Kambera 1 HAMUILU 15 Bible Online

1 HAMUILU 15 - Kambera bible

1 HAMUILU 15

¹La hau na lodu i Hamuilu napanii-nya i Haulu, “I MIRI na ma-palewa-ka pa-katua-kau nyumu Tamu Umbu kau hanganji la Ihirailu banjaru-na. Jia-duyaka nu Tamu Umbu màta kau patingi-nya na lii pareta-na i MIRI Mahupu-mbiha.

²Nyuna i MIRI ka hukunya na tau Amaliku wàna, nadu da boku la mangilu-da àmangu dalawa-nya na tau Ihirailu ba na-pamaingu na tau Ihirailu welingu la Mehiru.

³Jia-duyaka, luawa kau kangaburu-ya na tau Amaliku dàngu kau pamija mauha mbuu ndàbada da manguda. Àmbu hili bilidu ngga - nggàra, pameti mbutaya na tau mini, kawini, anakeda dàngu anarara; lupa hapi, mbimbi, ota dàngu kalandai,” wàna.

⁴Hàla i Haulu hi na-hawaritu-ya na tanatara-na dàngu hi nadiha-ya la Telaïmu, ningu tau 200.000-ya na panjuri welingu Ihirailu dàngu 10.000-ya welingu la Yahunda.

⁵Hàlaka nu laku kariangu-danyaka i Haulu dàngu da tauna la paraingu Amaliku, hi da-pandapu-nya na muhu la lukuna na luku mihi.

⁶Na-pangàndi-mbunja langu ba na-panamu-hahanja da tau Keni, “Lakuwa dàngu dunjaku-nja da tau Amaliku, ka àmbu ku-pamolu pakaria-dunggai dàngu nyuda, nadu àmangu da boku la mangilu-mi ba da-orangu la pa-paariyaa dànya na tau Ihirailu, ba jiaya na pa-maingu-na na tau Ihirailu welingu la Mehiru,” wànanja. Ka laku-danyaka duda da tau Keni welingu lai nu.

⁷Hàlaka nu ka pa-kangaburu-danyaka i Haulu dàngu tau Amaliku, hi na-pakàku tundu àndanja la ànda welingu la Hawila lundu tàka la Hiuru la pahunga loduna na Mehiru.

⁸Nggubulu-na na rayatu dàngu na tanatara Amaliku na-pameti-ha paraïna i Haulu. Tàka i Anggàku, hanganji tau Amaliku payàpa-ya dàngu hi na-pahia bianya paluri paraïna i Haulu dàngu tanatara-na, hamanai da mbimbi dàngu da hapi da marihi hàmu, lupa da ana hapi dàngu da ana mbimbi da ma-kambombu hàmu,[46] dàngu mbuu ndàbada da malanja da ma-pawilingu; mbulungu manda ningu lingungu dàngu manda pa-wilingu[47] da pa-pamolu-da.

¹⁰Ka panii-nanyaka i MIRI lai Hamuilu:

¹¹“Ku-pahala eraya ba kuwotu-yaka i Haulu pa-hanganji, nadu ba na-taluru-nggaka, dàngu ba nda na-palaku-ya na lii pareta-nggu,” wàna. Na-hawina wànya i Hamuilu, nu la rudungu lundu hariina ba na-pangodungu-padua lai MIRI.

¹²Hadangu harii, la mba - mbaru hadangu-nanyaka i Hamuilu ka ku-pahàmburu dànya i Haulu wàna. Ningu ma-patàka-nya lii, ba hambàda-yaka i Haulu la Kàramilu la pa-pahadangu watu pangàdangu nduma wikina nyuna lai nu, hi namangu pa-pangalangu la Ngginggalu.

¹³Ba napahàmburu dànyaka i Haulu paraïna Hamuilu, napanii i Haulu lai nyuna, “Mili àru i MIRI ka na-pakanyuru-kau ama! Mbàda pahàra-nggunyaka na lii pareta-na i MIRI,” wàna.

¹⁴Tàka i Hamuilu hi na-paàrangu, “Jàka tuna nu nggikina hi kurongu kamua hapi dàngu kabia mbimbi?” hi wàna.

¹⁵Nahema i Haulu, “Nuda banda pa-ribangu la tau Amaliku-ha. Da mbimbi dàngu da hapi da marihi hàmu dapiti-ha rayatu ka wotunya kameti maraku i MIRI na Alamu nyumu. Tàka hawiangu ma-pameti mbuta-haka,”[48] wàna.

¹⁶Narongu-yaka nuna hi napanii i Hamuilu, “Patiangu pàku, napa ka kupanii-nggaunya na papanii-na i Ala lai nyungga kamodu,” wànanya. “Panii-yaka duna,” hi wàna i Haulu.

¹⁷Panii-nanyaka i Hamuilu, “Màla Tamu Umbu, ka nda mbàda liku uru-akau la kabihu - kabihu Ihirailu, jiapa-kai làti bau reki wikimu nda ràkana? Mbàda pindi-nanggauka nyumu i MIRI kau hanganji la Ihirailu,

¹⁸hinggilu-nai nu i MIRI na-paràha-nggau pa-pamolu-nya na tau Amaliku na ma-akatu. Nyumu Tamu Umbu na-paràha-nggau i MIRI pa-pabera lawanja nyuda ka pambuta hàlaha wànanggau.

¹⁹Ka nggikina nyumu Tamu Umbu hi ndau tundunya na lii pareta-na i MIRI? Ka nggikina nyimi Tamu Umbu hi mi-paremingu pàku papiti malanja pa-ribangu, tàka ba tumu nu hiu tuya i MIRI la hala eti?” wànanya.

²⁰Nahema i Haulu, “Kutundu-manyaka duku nyungga na lii pareta-na i MIRI, jia-mayaka hi kulaku pa-pabera tundunya na-paràha-nangga. Hi ku-tanawa-nya i Anggàku na hanganji Amaliku tàka na tau Amaliku mbuu ndàbana hi ku-pameti mbutaya.

²¹Tàka yiada da tau karia-nggu nda da-pameti-hàla-aha da banda; nyuda dapindi-ha da hapi dàngu da mbimbi da marihi hàmu welingu nuda da pariba-da ka wotuha kameti maraku lai MIRI Alamu la Ngginggalu, wàda dumu ama,” wàna.

²²Tàka nanapa-ya i Hamuilu, “Nggiya na parihi mbuhana i MIRI, na karadaku jàka ndia na kameti maraku? Na karadaku lai MIRI narihi hàmu-mapa welingu la pawotu kameti maraku. Na manundu nahàmu-pa welingu la aparu mbimbi.

²³Nadu na patidungu la hanggana i MIRI hama akatu-mana na tau na ma-palaku alimu, dàngu na ma-katadaku eti, hama akatu-mana na ma-lumungu marapu. Nyumu Tamu Umbu, rukuna bau lawanya na lii pareta-na i MIRI, nda na-pajia-akaupa nyumu ba hanganji-kau,” wànanya.

²⁴Narongu-yaka nuna, pa-bowangu-nanyaka i Haulu lai Hamuilu, “Tuba njala-mangguka. Kupangga-yaka na lii pareta-na i MIRI, dàngu ba kulànja-nya na paniimu nyumu ama. Ruku mangàdatu-nggunja da tau la wawanggu lupa pajia-dunggu-nyaka na pakarai-da.

²⁵Tàka nàhu nyuna ama, ku-kamahi-nggau, jàma àrunja da njalanggu dàngu kau beli karia àrungga la Ngginggalu, ka peku lumu-nggunya i MIRI,” wàna.

²⁶Tàka nahema i Hamuilu, “Ndia-a duku, nda kubeli karia-anggau nyumu Tamu Umbu. Mbàda pangga-munyaka na lii pareta-na i MIRI, Tamu Umbu, nda na-pajia-a-kaupa nàhu i MIRI ba hanganji Ihirailu-kau,” wànanya.

²⁷Ka pa-mbelingu-nanyaka i Hamuilu ka kulaku ba wàna, tàka i Haulu hi napàtu-ya ba nayàpa-ya na kalembi pa-hàlangu-na, hi lupa na-kahira na kalembi.

²⁸Ka panii-nanyaka i Hamuilu lai nyuna, “La lodu nàhu i MIRI nahira-yaka na pa-hanganji Ihirailu welingu lai nyumu Tamu Umbu, dàngu hi nawua-ya la haàtu na marihi hàmu welingu lai nyumu.

²⁹Na Ma-mangarangu na Ala Ihirailu nda na-kambàliku-a dàngu nda na-panjilu-anya na pa-ndolaku-na, nadu Nyuna ba nda angunda patau-aya,” wàna.

³⁰Nahema i Haulu, “Njala-manggu-nyaka. Tàka ndula àruka ama, beli karia àrungga ka pekuna duku ba kulumu-nya i MIRI Alamu ama. Ba tumungga nu ama tembi-dumu-nggaka la hanggada da liku uru la banjaru-nggu hamanai la hangga nggubulu-na na banjaru Ihirailu,” wàna.

³¹Ka beli-nanyaka i Hamuilu ba da-pakariangu dàngu i Haulu la Ngginggalu, nu hi nangàndi maraku i Haulu lai MIRI.

³²Tunaka nu i Hamuilu hi na wuangu pareta, “Ngàndiya nàmu na hanganji Anggàku,” wàna. Ka mai-nanyaka i Anggàku lai nyuna, dàngu mbinuna-padua-ka na monungu-na, ba na-rekiya, “Làpahu-nanyaka duku na pameti wàngu,”[49] wàna.

³³Hàla panii-nanyaka i Hamuilu, “Hama tuna na hapanda-mu bau wànya hi dadangu da ina da ma-mbulangu anada, tu-mbunaka napa na inamu ba na-mbulangu na anana,” wàna. Hàlaka pawàna, i Hamuilu làtaku-madua-nanyaka i Anggàku la hangga ngia pawotu maraku la Ngginggalu.

³⁴Hàlaka nu beli-nanyaka i Hamuilu la Rama, tàka na hanganji Haulu beli-nanyaka la umana la Nggimbia.

³⁵Lundu njàpuna na lurina, i Hamuilu nda nahili pa-hàmburu da-anyapa i Haulu. Ba tuna i Hamuilu na-hawina wànya rukuna i MIRI hala era-kika ba wàna ba nawotu-ya i Haulu pa-hanganji la Ihirailu.