Read Kambera 1 HAMUILU 16 Bible Online

1 HAMUILU 16 - Kambera bible

1 HAMUILU 16

¹Pi - pirana na rehi malamiri i MIRI napanii-nya i Hamuilu, “Pirangu-mapa nyumu bau hawina-nya na rukuna i Haulu? Ka mbàda nda pa-pajia-ayapa nyuna la pa-hanganji Ihirailu? Nàhu pitiwa lonahu haitungu, dàngu kau laku la Mbetulehimu, la haàtu tau na ma-tamungu Ihai, nadu na haàtu welingu la anana, ba kupindi-yaka la pa-hanganji,” wànanya.

²Tàka na-paàrangu i Hamuilu, “Nggikina wàngguka ba ku-lakunya? Na rukuna nuna jàka narongu-yaka i Haulu, jiangu-maka duna ba na-pameti-ka!” hi wàna. Nahema i MIRI, “Ngàndi heu kamboka hapi, dàngu kau pekanya na rayatu, ba lua-munya pawotu-nya kameti maraku i MIRI lai nu.

³Hàla kau dundanya i Ihai la lii maraku nuna. Napa tiangu ka kupanii-nggauka jàka nggàra-yaka bàdi na paula-mu. Na tau pa-patuji-nggunggau, màta kau katua-ya la pa-hanganji,” wànanya.

⁴I Hamuilu na-palaku-ya hama tuna ba wànanya paraïna i MIRI. Ba natàka-ka la Mbetulehimu, ba hapajia-ha da liku uru paraingu damai pa-hàmburu-ya dàngu katàtaku-da, hi da-paàra-nya, “Màla na pamai wàmu nu ama pamàna wàngu-duya?” wàdanya.

⁵Nahema i Hamuilu, “Wua, tubangu-ma. Mainggunya pawotu-nya kameti maraku i MIRI. Màlawa kai hawari wikimi kai màtu ba paloku-ya na lii wotu kameti maraku yiana,” wànanja. I Ihai dàngu da ana-mbuna na-paràha-nja pa-hawari wikida haàtu - haàtu, nawànda-ha pamàtu la lii nuna.

⁶Ba da-pauhi ndàbaka, tàka i Hamuilu naita-ya i Eliapu anana i Ihai, na pakanandina, “Jia-yaka yiana yia na papindi-na i MIRI,” wànaka.

⁷Tàka i MIRI hi napanii-nya i Hamuilu, “Nyumu àmbu ilu biaya ba nahàmu matana dàngu ba najangga tauna; nda jia-aya nyuna na-paora-nggu. Nyungga ba ku-pabilangu nda tuu-ana na pa-bilangu-na na tau. Na tau nailu hada, Nyungga duku kuilu eti,” wàna.

⁸Tunaka nu i Ihai na-paaunya i Aminandapu, anana, hàla na-paràha-nya pa-hurungu la hanggana i Hamuilu. Tàka napaya i Hamuilu, “Nda jia-aya nyuna na papindi-na i MIRI,” hi wàna.

⁹Nahili paràha-nya i Hama paraïna i Ihai, tàka napanii i Hamuilu, “Nda jia-mbuya nyuna na papindi-na i MIRI,” wàna.

¹⁰Tuna nuka i Ihai ba na-paràha màra haàtu-nja da anana ba dapihu pa-hurungu la hanggana i Hamuilu, tàka napanii i Hamuilu lai nyuna, “Nyuda nda napindi-aha i MIRI,” wàna.

¹¹Ka paàra-nanyaka i Hamuilu, “Jia-aha yiada da anamu mbuu ndàbada da mini?” wànanya. Nahema i Ihai, “Ninyapa na haàtu na ma-kamuri, tàka nyuna talànga pawangu-na mbimbi,” hi wàna. Nanapa-ya i Hamuilu, “Paràha-nya tau palua papaau-nya, nadu nyuta ba ndedi tangangu-a jàka ndedi-madu natàka nyuna,” hi wàna.

¹²Ka paràhangu-nanyaka tau i Ihai palua pa-paau-nya nuna na anakeda. Ba ita-yaka, bai bidi mini paràka miningu-ya dàngu na-hayandalu, na-manandangu da matana. Ka panii-nanyaka i MIRI lai Hamuilu, “Jia-yaka nyuna, katua-yawa!” hi wànanya.

¹³Manyamalu piti-nanyaka i Hamuilu na lonahu haitungu, hi na-katua-ya i Ndautu la lii pa-minangu la hanggada da ayana. La rehi memana nunama i Ndautu ba na-harua-ya Ngahuna i MIRI. Piti welingu la lodu nuna lupa na-pangalangu, na Ngahuna i MIRI hanii-mana pandutu-ya. Tunaka nu beli-nanyaka duna i Hamuilu la Rama.

¹⁴I Haulu na-dunjaku-nyaka paraï Ngahuna i MIRI, tàka nàhu pa-mayila-nanyaka paraï wàndi akatu, pa-paràha-na i MIRI.

¹⁵Jia ba tuna da atana i Haulu hi dapanii-nya, “Mapinya ba i MIRI-maka na ma-paràhangu wàndi akatu la pa-mayila-kau nyumu Tamu Umbu.

¹⁶Jiaya jàka wàmu, patanggu-ma nyumaya duma la pahimbu-nggau haàtu tau mapingu pajungga. Jàka era pa-mayila-nanggauka na wàndi akatu, napa na tau nuna najungga-nya na junggana, napa mandangu beli-madua-munyaka,” wàdanya.

¹⁷Hàla wua-nanjaka pareta paraïna i Haulu, “Luawa nu pahimbu mapingu pa-pajulu wàngu malingu, kai karia-nya yiahu,” hi wàna.

¹⁸Ba rongu-yaka nuna, na haàtu na atana hi napanii, “I Ihai na ma-ngiangu la paraingu Mbetulehimu, ningu haàtu anana mini na mapingu pa-pajulu wàngu malingu. Nyuna mini kaborangu-ya dàngu panjuri hàmuya, tàka i MIRI ndula mànu-mananya,” wàna.

¹⁹Ka palewa-nanyaka tau i Haulu lai Ihai na mangàndi lii, “Paràha-nya i Ndautu na anamu na ma-pawangu mbimbi ka na-hurungu lai nyungga,” wànanya.

²⁰Tunaka nu i Ihai hi na-paloku-nya heu kalandai hi nawotu-nya heuna na ana kamàmbi, roti dàngu taneku manulangu mambinu angguru. Mbuu ndàbada nuda nawua-nya i Ndautu ka nahuru wotungu lai Haulu.

²¹Tuna nuduka i Ndautu ba namai lai Haulu, hi natanggu paloku-nya ngga - nggàra. Nambuha hàmu-manya nyuna paraïna i Haulu, hi natuya matanggu ngàndinya madàka-na.

²²Tunaka nu i Haulu hi na-pangàndi-nya langu i Ihai: “Nyungga kumbuha-nya i Ndautu. Puli àrunya ka nangia pa-engangu lai yiahu, ka nalumu-ngga,” wàna.

²³Piti welingu nu, handàka - handàka jàka natàka-nyaka wàndi akatu i Haulu, piti-nanyaka na junggana i Ndautu hi najungga-nya. Hàla i Haulu kandàdahu-nanyaka tàka hi na-mandangu beli, ba na-dunjaku-nyaka paraï wàndi akatu.