Read Kambera 1 HAMUILU 17 Bible Online

1 HAMUILU 17 - Kambera bible

1 HAMUILU 17

¹La handàka na tau Pilitingu na-pauhi-nja da tanatara-na pa-ndàharungu la pa-pabera. Da-wandalu-ha da pambada la paraingu Hoku, la ngaba tana Yahunda dàngu hi dawulu maüda la manggawa Hoku dàngu Aheka, lihina la Epihu-Ndamimu.

²I Haulu dàngu tau Ihirailu pauhi-madanyai duda hi da-pamaüngu la Lolangu Ela; nyuda hawa - waritu-madanya la pa-hanobaku-ya na tunguna na tau Pilitingu.

³Tuna nuduka na pamba tau Pilitingu ndolaku-nanya la hau palindi tàka na pamba tau Ihirailu la palindi hauya tàka la manggawa-da ninya na hau na lolangu.

⁴Ninya na haàtu na mini pa-njukulungu na ma-tamungu, Nggoliatu, welina la paraingu Nggàta, naluhu welingu la maü tau Pilitingu la pa-jeriku-ya na tau Ihirailu. Na janggana ràkangu tailu metiru-na,[50]

⁵nyuna natuu tubuku wudu dàngu kalembi pabera wudu ràkangu lima kambulu pihu kiluna.

⁶Da wihina nakopa wànja kamburu wihi wudu dàngu la kunduna naduku-ya na nimbu wuduna.

⁷Na ulu nimbuna hama ai poluya, tàka na ihi nimbuna ràkangu pihu kiluna na mbotuna. Na haàtu na panjuri nalaku mangilu la hanggana na matanggu ngàndiya na temingu-na.

⁸Nandudi i Nggoliatu hi nawara-nya na tanatara Ihirailu: “Nggàra ula pàku-mika nu hiana? Pabera wàmi? Nyungga tau Pilitingu-ka, ha atana i Haulu! Pindi nu haàtu la hongami matoru mbeni papuru nàmu pa-parari dàngga nyungga.

⁹Nu la pabera pa-mehangu tungu nu jàka na-pametika nyungga, nyuma ma-pajàmangu wikima kai ata-nggama, tàka jàka nyungga matalu ma-pameti-ya nyuna, nyimi atama-nggaika.

¹⁰Nàhuma nu, ku-hanobaku-ya na tanatara Ihirailu; pindi nu haàtu la pa-parari dàngga nyungga!” wàna.

¹¹Ba narongu-ka i Haulu dàngu da taunaka na ma-pajeriku tungu nu, katàtaku-danyaka dàngu mangàdatu nda ukuha.

¹²I Ndautu anana i Ihaiya tau Epurata, welingu la Mbetulehimu la Yahunda. I Ihai ningu tau mawalu-ha da anana mini, dàngu la rehi pareta-na i Haulu, i Ihai mbàda kaweda-manaka.[51]

¹³Da anana i Ihai da tau madua haàtu da ma-maaya, mbàda laku-daka pa-pabera kikunya i Haulu. Na ma-maaya dehi Eliapu-ya na tamuna, na padua wàda i Aminandapu dàngu na padua haàtu wàda i Hama.

¹⁴I Ndautu ana kamuri-ya. La rehi lakuda da ayana da madua haàtu la pa-pabera tundunya i Haulu,

¹⁵i Ndautu nakàli laku wàrunya i Haulu, nabeli la Mbetulehimu la papawa-nja da mbimbina na amana.

¹⁶Patu kambulu lodu-naka mandaina, nimbihu mbaru dàngu malingu, i Nggoliatu ba nalua tomaya na pamba tau Ihirailu ba na-jeriku-ha.

¹⁷La hau lodu i Ihai napanii-nya i Ndautu, “Piti hakambulu kilu uhu nggàndumu pa-handarangu dàngu yia da hakambulu roti, kau ngàndinja da ayamu la ngia pamaü tanatara.

¹⁸Dàngu ngàndi-mbuha yiada da hakambulu kenju kau wuanya na kimunda pambada. Paàra-nya jàka nggàra ehida da ayamu, dàngu kau ngàndi-mangga tanda ba mbàda pa-hàmburu dàmu-njaka ba nda nggàra ehida.

¹⁹Nyuda ninja la Lolangu Ela anguda i Hanganji Haulu, tàka mbuu ndàbada da tau Ihirailu talànga pa-kangaburu-da dàngu tau Pilitingu,” wànanya.

²⁰Hadangu harii, la mba - mbaru, hadangu-nanyaka i Ndautu hi na-kamomatu. Da mbimbina na-pakata-nja la ma-pawangu haàtu, tunaka nu hi napiti-ha da ngàndina, ka laku-nanyaka tundunya na lii pareta-na na amana. Ba natàka la ngia pa-pamaüngu, jia pàkuya na rehi hadangu-na na tau Ihirailu palaku la ngia pa-pararingu-da dàngu paya-aungu-da ba da-kayaka pabera.

²¹Da tanatara Pilitingu dàngu da tanatara Ihirailu kawàra pa-hanggangu-danyaka, dàngu maràngga hawaritu-danyaka la pa-kangaburu.

²²Hàla i Ndautu hi na-pakata-nja da pangàndi-na la tau madai madàka, hi napalai la ngia pa-pararingu la pa-pahàmburu dànja da ayana.

²³Tàka ba talànga panii dàna-njaka nyuda, nàmu-nyaka i Nggoliatu la hangga, hi na-jeriku-ha da tau Ihirailu, hama tuna na-pakàli wànaka. I Ndautu narongu-mbuya na kareuku-na ba na-pajeriku tuna nu.

²⁴Ndedi mbàdiku-na da tau Ihirailu ba daita-yaka i Nggoliatu, palai-madua-danyaka paraï pa-mangàdatu.

²⁵“Tàngaru-ya!” wàda dangga anguda. “Ronguya na paniina ba na-pajeriku! I Haulu na hanganji-nda mbàda puha-manaka la ngaruna, nggamu biaya na ma-pameti-ya i Nggoliatu, nyuna napa pa-wuangu-ya wunda bokulu. Dàngumbu na tau nuna napa na-papohu-nya dàngu na anana kawini. Dàngu napa na kuru uma amana pa-pamara-ya welingu la hilu katiku,”[52] wàna.

²⁶Hàla panii-nanyaka i Ndautu, “Matoru mbeni-duya na tau Pilitingu hangàdangu nina la pa-jeriku-ya na tanatara-na i Ala maluri!” wàna. Tunaka nu hi na-paàra-nya na haàtu na panjuri, “Nggàraka wundana na tau na ma-pameti-ya nina na tau Pilitingu, ka na-podahu-ya na pamakia wàngu la Ihirailu?” hi wàna.

²⁷Hi dapanii-nya paraï rayatu na pambàda ràndina na hanganji.

²⁸I Eliapu na aya dehina i Ndautu narongu-ya i Ndautu ba na-pabanjaru dànja da panjuri. Hi nambeni-nya i Ndautu, “Nggàraya na pamaimu yiahu? Nggamu-yaka na pa-paràha-mu papawa-nja da mbimbimu ba ana pira ngiuda la maràda telangu? Kupi-manya, hiu pa-kakangu pamini mbeni; hiu mai yiahu jia-maaya ka ku-itangu ma-pararingu, wàmu wàngguka?” wàna.

²⁹Nahema i Ndautu, “Nggàraya na njalanggu? Nyungga duku ba pa-àrangu-anggunya!” hi wàna.

³⁰Ka laku-nanyaka, hi nahili paàrangu la panjuri - panjuri hawiangu na hamana kawai, tàka na hema na parongu-na jia-mayai hama tuna kawai.

³¹Tàka ba mapira-ha da tau da marongu-ya i Ndautu, patàka-danyaka lai Haulu, ka paau-nanyaka pa-hurungu i Ndautu.

³²Hi napanii i Ndautu lai Haulu, “Tamu Umbu, nggàra hi ta-mangàdatu-nya nuna na tau Pilitingu! Nyungga nu lawanya wànggu-maka,” hi wàna.

³³“Jàmangu,” hi wàna i Haulu. “Nggiki peku-naka nyumu bau parari dànya nyuna? Nyumu lalu bidi minimu, tàka nyuna tau mambàda ndàmangu-yaka la pa-pabera piti welingu pabidi minina,” wànanya.

³⁴Tàka nanapa-ya i Ndautu, “Tamu Umbu, nyungga ku-ndàmangu-maka papawa-nja da mbimbina na amanggu. Jàka era ningu hinga jàka ndia mbaruangu mamai pa-nyàkapu-ha da mbimbi,

³⁵da banda bohu tungu nu ku-nutaku-maaha hi kupalu-ha, hi ku-pamara-ya nuna na mbimbi. Tàka nuna na hinga jàka ndia mbaruangu jàka da-rawaku-ka, ku-njàkilu-maaha da kahuki-da, hi kupalu pameti-ha.

³⁶Nyungga ku-pameti-maka hinga hamanai mbaruangu, tàka nuna na tau Pilitingu hangàdangu napa hama-mada nuda da banda, nadu ba natoru mbeni bia pa-paaka-nya na tanatara-na i Ala maluri.

³⁷I MIRI mbàda pamara-nanggaka welingu la hinga dàngu mbaruangu, Nyuna napa na-pamara-maka duku welingu la tau Pilitingu nuna,” hi wàna. Napaya i Haulu lai nyuna, “Hàmudu, mili àru i MIRI ka nandula-kau,” wànanya.

³⁸I Haulu nawua-nya i Ndautu da paki pabera-na, hawàla-na na kalembi bàhi tàka hi na-panggàna-nya i Ndautu. Hàla i Haulu natunya na tubuku wuduna la katiku-na i Ndautu.

³⁹Hàlaka patuna nu i Ndautu hi naboru-nya na hapanda-na i Haulu la kalembi bàhi, hàla hi na-kamangu papangga, tàka nda pekuna, nadu i Ndautu ba nda na-ndàmangu pawotu paki pabera. “Nda peku pangga-anggu dàngu da paki yiada,” hi wànanya i Haulu. “Nda ku-ndàmangu papaki ma-hamangu,” hi wàna. Hàla ka pukalu hàla-madua-nanjaka nuda da paki pabera.

⁴⁰Tunaka nu hi napiti-ya na toku pawangu-na, dàngu hi napindi lima mbuada da watu kabunggulu la luku, hàla hi napuhi-ha daa la hakuna. Tàka na kapitu ninya-padua-ka la limana, hi nalaku pa-tàbuku-ya i Nggoliatu.

⁴¹Ndedi pira mbàdiku-na ba tunaka nu, i Nggoliatu ba na-mangilu-nya haàtu mangàndi-nya temingu-na, laku lihi-nanyaka i Ndautu.

⁴²Tàka ba naita-yaka i Ndautu ba na-kanàndaru-ya, riki hangengi-nanyaka ba na-paakangu, nadu i Ndautu ba lalu bidi minina malai na-paràka miningu-na.

⁴³Napaya i Nggoliatu lai Ndautu, “Nggàra ihi wànyaka na tokungu? Bau kakaka ahuka nyungga yia?” wàna. Ka ràtu-nanyaka i Ndautu parongu-da da marapu-na.

⁴⁴Hàlaka nu jeriku-nanyaka i Ndautu, “Màla undàharungu! napa na taumu ka kutuya uhu ma-hawurungu dàngu banda ka danganya,” wàna.

⁴⁵Tàka nahema i Ndautu, “Nyumu bau mai palawa-ngga nyungga muwàngu hapanda, nimbu dàngu nimbu haronjaku, tàka nyungga duku ba kumai palawa-nggau nyumu wàngu-nggunya na tamuna i MIRI Mahupu-mbiha, Ala tanatara Ihirailu na pa-paakamu.

⁴⁶La lodu nàhu-maaka i MIRI ba na-pulinggau lai nyungga; nyumu napa kupàpa-kau dàngu hi ku-katiku-ya na katiku-mu. Na taumu dàngu na tauda da panjuri Pilitingu napa kutuha uhu ma-hawurungu dàngu banda hi dangangu. Nu napa na ihi nggubulu awangu hi napi-nggama nyuma tau Ihirailu ba ningu Ala pa-maraku-ma

⁴⁷dàngu mbuu ndàbana na tau lai yiahu hi na-itangu, i MIRI ba nda nggàra naihi wàngua hapanda dàngu nimbu la pa-pamara-ya na banjaru-na. Nyuna na matunya àndana na pabera yiana dàngu Nyuna na mapuli-nggai nyimi la limama nyuma,” wànanya.

⁴⁸Ka ngeri ndàharungu-nanyaka i Nggoliatu pa-dàhiku-ya i Ndautu, ka manyamalu-madua-nanyaka i Ndautu ba na-parenggangu hanggangu la pamba tau Pilitingu la pa-hanobaku-ya nyuna.

⁴⁹I Ndautu narauya na hakuna, hi napiti hau watu, hi na-kapitu-ya i Nggoliatu. Nuna na watu napiti pàkuya na kaba matana i Nggoliatu, na-bàbaru-maya na kaba katiku-na, ka njoru panggubulungu-madua-nanyaka la tana.

⁵⁰Ka talanjiru-nanyaka i Ndautu lai Nggoliatu, hàla hi na-ndolaku lihinya; napiti-ya na hapanda-na i Nggoliatu hi na-butuhu-ya welingu la tikuna, hi na-katiku-ya na katiku-na nuna na tau Pilitingu. Tuna nuduka i Ndautu ba natalu-ya dàngu ba na-pameti-ya i Nggoliatu, ba nawànya kapitu dàngu watua! Ba daita-yaka tau Pilitingu ba nameti-ka na mini mbeni hanggangu-da, ka palai-madua-danyaka.

⁵¹

⁵²Da tau Ihirailu dàngu Yahunda kayaka-danyaka, hi dayaulu-ha da tau Pilitingu lundu tàka la Nggàta[53] dàngu la pindu bokulu Ekurungu. Da tau Pilitingu da ma-manua dapale - lembangu nàhu la ngarangia lundu tàka la Haaraïmu.

⁵³Hàlaka nu beli-danyaka da tau Ihirailu welingu la payaulu-ha da tau Pilitingu, hàla ramba-danjaka da ihi maüda da tau Pilitingu.

⁵⁴I Ndautu napiti-ya na katiku-na i Nggoliatu, hi nangàndi-ya la Yeruhali, tàka da ma-dàkana i Nggoliatu na-pahàmu-ha la uma tera wikina.

⁵⁵I Haulu ba naita-ya i Ndautu ba nalaku palawa-nya i Nggoliatu, paàrangu-nanyaka lai Àpuneru, na ngora tanatara-na, “Ha Àpuneru, nggamu ana-danya nyuna?” wàna. Nahema i Àpuneru, “Nda kupi-anya, Tamu Umbu,” hi wàna.

⁵⁶Hàla hi na-wuangu pareta i Haulu, “Luawa kau paàra-nya na rukuna nuna,” wànanya.

⁵⁷Jia ba nabeli-ka i Ndautu la ngia papamaüngu ba nahàla pa-pameti-ya i Nggoliatu, karia-nanyaka i Ndautu paraïna i Àpuneru pa-hurungu lai Haulu. I Ndautu yutu-mana-nyapa na katiku-na i Nggoliatu.

⁵⁸Ka paàra-nanyaka i Ndautu paraïna i Haulu, “Ha bidi mini! Nggamu ana-danggau nyumu?” wànanya. Nahema i Ndautu, “Nyungga anana i Ihai-ka la Mbetulehimu,” hi wànanya.