Read Kambera 1 HAMUILU 18 Bible Online

1 HAMUILU 18 - Kambera bible

1 HAMUILU 18

¹Ba dahàla-ka pa-pabanjarungu i Haulu dàngu i Ndautu, wotu-nanyaka i Ndautu la panjadi panggawi-na nyuna dàngu piti welingu la lodu nuna nda na-pahia-anyapa i Ndautu pabeli la uma ina amana. I Yunatàngu, na anana mini i Haulu, narongu-mayaka na pa-banjarungu-da. Nyuna naeti wàmanyai i Ndautu, dàngu nambuha-manya hama tuna ba na mbuhangu wikina.

³Jia-duyaka nu i Yunatàngu hi na-harangu la pa-kandua-nya i Ndautu lundu nu - nu.

⁴I Yunatàngu na-pukalu-ya na kalembi bokulu-na hi nawua-nya i Ndautu, dàngumbu da paki pabera-na hamanai na hapanda-na, dàngu na tandai panana lupa na boruna.

⁵I Ndautu na-palaku hàmu-maha mbuu ndàbada da pa-patanggu-nanya paraïna i Haulu. Jia-duyaka hi nawotu-ya la pa-parawira la tanatara-na, dàngu i Ndautu dambuha-manya paraïda panjuri dàngu ba hapajia-ha da pa-palewa-na i Haulu.

⁶Ba nabeli-ka i Ndautu ba nahàla pa-panjoru-ya i Nggoliatu tau Pilitingu, ba hapajia-ha da panjuri da-pajurungu patama la paraingu, da kawini la parai - paraingu la Ihirailu daluhu pa-hàmburu-ya na hanganji Haulu. Wunda-danyaka ludu pahangu, ba darenja ngàndi lamba ha-kapapa dàngu jungga.

⁷Ba dàngu renjada ba hapajia-ha da kawini wunda-danyaka pahangu, “I Haulu na-pameti diha rata, tàka i Ndautu na-pameti diha riu,” wàda.

⁸Narongu-ya nuna i Haulu lalu mbana mbeniya. Na pa-kanandi-na, “I Ndautu dawotu-nya na-pameti diha riu, tàka nyungga ku-pameti diha rata-a, wàna. Tiangu-ki nyunaka duna na patuda hanganji!” wàna.

⁹Piti welingu la lodu nuna i Haulu kapihi-nanyaka i Ndautu.

¹⁰Hadangu harii i Haulu ninya daa la uma talànga katangu-na nimbu hi jia huruku bia-nanya wàndi akatu pa-paràha-na i Ala, ka mbàrangu-nanyaka ba hama ma-katoba-ya. La rehi nu i Ndautu talànga junggana hama tuna na pakàli wàna.

¹¹“Ku-kanditiku-nya na nimbu yiana lai Ndautu ka na-paràpangu la dindingu!” wàna pa-kanandi-na i Haulu, hàla ka làndahu-madua-nanyaka nimbu i Ndautu na-pandua wundangu, tàka na-ngalangu pa-hinggilu-nja paraïna i Ndautu.

¹²I Haulu napàda-nyaka ba namangga-nya i Ndautu paraïna i MIRI, tàka nyuna wiki ba dunjaku-nanyaka paraïna i MIRI. Ruku tuna nu hi na-mangàdatu-nya i Ndautu.

¹³Ka paleli-nanyaka i Ndautu welingu la kaliungu uma hanganji hi nawotu-ya la pa-kimunda la harata panjuri. Tunaka nu ka iru ngàndi-nanyaka na pambana handàka pabera - handàka pabera.

¹⁴Nyuna na-ngalangu mànu pa-palaku-ya na wai ngera-naka, nadu ba ndula-nanya-padua paraïna i MIRI.

¹⁵Ba naita-yaka i Haulu nyuna i Ndautu ba na-madàpangu mànu, ka bonjangu-madua-nanyaka na mangàdatu-nanya.

¹⁶Tàka mbuu ndàbana na Ihirailu dàngu na Yahunda danamu-maya i Ndautu, nadu nyuna ba liku-uru madangu lingu-nanya.

¹⁷I Haulu nauna-manyaka ka peku pameti-nanya tau Pilitingu i Ndautu la ngia pa-pararingu, ka àmbu nyuna wiki pàku na ma-pameti-ya. Jia la hau lodu i Haulu napanii-nya i Ndautu, “I Meràpu na ananggu kawini na ma-maaya napa ku-papohu-nggai, mili nyuna kau pa-itangu kaborangu-mu la pabera ndumana i MIRI,” wàna.

¹⁸Nahema i Ndautu, “Ka nggamuka nyungga yia, dàngu nggàra-maka palingu-na na kuru uma amanggu la Ihirailu, hi jia layia ana bia-nanggaka hanganji?” wàna.

¹⁹Tàka ba jia-yaka na rehina la pa-papohu-nja i Meràpu dàngu i Ndautu hi papohu bia-nanya la haàtu lai Andarialu, welingu la Mahola.

²⁰I Mikàlu na anana i Haulu na haàtu nambuha-nya i Ndautu. Ba narongu-yaka nuna i Haulu, na-orangu-mai duna.

²¹Na pa-kanandi-na, “Nahàmu ka ku-pamàja-nya i Mikàlu lai Ndautu, ka peku handànga-na i Ndautu hi peku pameti-nanya tau Pilitingu,” wàna. Nu ka pa-nduangu wàngu-nanyaka i Haulu ba napanii-nya i Ndautu, “Nàhu nyumu peku-naka ba ku-layia ananggau,” ba wànanya.

²²Ka paràha-nanjaka da panggawi-na la papanii kangunguhu-nya i Ndautu, “Na hanganji nambuha-nggau, jia-mayai da panggawi-na; ba tuna rehi-naka nàhu nyumu bau hanggaunya na anana na hanganji,” wàdanya.

²³Tàka ba da-patàka-nyaka na lii kamahingu nuna lai Ndautu, nahema-ha, “Namuda bia wàmi ihu nyimi la panjadi layia ana hanganji? Nyungga duku tau mila-aka dàngu nda nggàra lingu-mbunggu!” wànanja.

²⁴Ba hapajia-ha da panggawi da-patàka-nya nuna na hemana i Ndautu lai Haulu,

²⁵hàla i Haulu nahili paràha-nja da tauna, la papanii-nya i Ndautu, “Na pa-karuhi-na na hanganji beri àmahu wili jia-aha da hangahu manula kàrina na tau Pilitingu, tanda tungu hilu la muhuna na hanganji,” wàdanya. (Yiana pa-pakaka-na i Haulu-ya la pa-pameti-ya i Ndautu ruku tau Pilitingu.)

²⁶Ba hapajia-ha da panggawi-na i Haulu da-patàka-nya lii i Ndautu, tàka i Ndautu jiaya wàna. Jia-duyaka ba ndedi jiaya na rehi pa-kawuku, hadangu-nanyaka dàngu tau la wawana, hi dalaku la ngaba tau Pilitingu. Tau 200-ha da pa-pameti-da, hi dapiti-ha da manula kàrida, nuda wua-danyaka i Haulu nda ningu ma-haleli hau. Hàlaka nu ka papohu-nanjaka i Mikàlu dàngu i Ndautu.

²⁸Tuna nuduka i Haulu hi napàda-nya ba mangga-mananya i Ndautu paraïna i MIRI dàngu hi nambuha-manya paraïna i Mikàlu anana.

²⁹Ka manaü mangàdatu-madua-nanyaka i Ndautu dàngu hi na-paumbi-nya lundu metina.

³⁰Handàka - handàka jàka ningu tanatara Pilitingu mamai pa-kangaburu, narihi-mapa duna i Ndautu pa-pambuta-ha welingu la parawira hawiangu lai Haulu. Ka manaü wuwa-madua-naka i Ndautu.