Read Kambera 1 HAMUILU 19 Bible Online

1 HAMUILU 19 - Kambera bible

1 HAMUILU 19

¹I Haulu napanii-nya i Yunatàngu anana, dàngu mbuu ndàbada da panggawi-na màta ka pameti-ya[54] i Ndautu wànggu wàna. Tàka i Yunatàngu lalu mbana namu-nanya i Ndautu,

²jia-duyaka hi napanii-nya i Ndautu, “Na amanggu patikingu-nanya pa-pameti-kau; jia kau pa-nanjarungu! Haromu la mbaru kau lua pa-kapàndi la ma-kawiningu, ka hanimu-ka lai nu.

³Napa kuluhu la maràda kariangu na amanggu dàngu ka ma-ndolaku la lihi ngia pa-kapàndi-mu. Hàla napa nyungga ku-pabanjaru dànya i ama rukuna na pawuku-na ba jiakau nyumu, napa na ihina na pa-banjaru-ma ka ku-paihi-nggauka nyumu,” wànanya.

⁴Hàla i Yunatàngu hi napanii pahàmu-nya na amana rukuna i Ndautu, “Ama, àmbu kabai-dunya na atamu i Ndautu. Nadu ba nda natuu-a duna ngga - nggàra manjala hanggangu lai nyumu, jiapa nadangu-kipa na hàmuna hanggangu lai nyumu.

⁵Nyuna màtu nda nawaiya na lurina ba jiaya na pameti-nanya i Nggoliatu, dàngu i MIRI nawua-nyaka pamàna bokulu wàngu na Ihirailu rukuna nyuna. Nyumu wiki ita mata-mamu-nyaka ba natumbu nuna, dàngu nyumu wiki mu-nggaüru wà-madunya la rehi nuna. Tàka nggiki-naika nàhu hi mu-pamayila-ya na tau manda njala, dàngu hiu pa-tikingu pa-pameti-ya i Ndautu dàngu nda ningu latana?” wànanya.

⁶Nyuna i Haulu da-kandàraku la etina da paniina i Yunatàngu, ka harangu-duna-nyaka wànya na tamuna i MIRI, ba nda jia pameti-ana-nyapa napa i Ndautu.

⁷Hàlaka nu i Yunatàngu hi napaau-nya i Ndautu, hi napanii hàlanya na pa-pabanjaru-da kawai. Tunaka nu karia-nanyaka i Ndautu lai Haulu; nyuna i Ndautu ràma beli-nanyaka lai Haulu hama tuna la wungana.

⁸Tunaka nu hili tumbu-nanyai na pabera dàngu na tau Pilitingu. I Ndautu nalua pa-kangaburu-ha, hi natalu ailulu-ha, hi lupa dapalai.

⁹La hau na lodu i Haulu talànga mandapu-na la umana dàngu nimanya na nimbu la limana, tàka hi jia tàka bia-nanya wàndi akatu pa-paràha-na i MIRI. La rehi nuna i Ndautu talànga jungga-nanya na junggana.

¹⁰Nu i Haulu hada ngàndingu-nanyaka pakanditikunya na nimbuna lai Ndautu na maninya la lihi dindingu. Tàka i Ndautu na-hinggilu, hi lupa na-kanditiku ningu la dindingu na nimbu. Ka palai-nanyaka i Ndautu ba na-pamara wikina.

¹¹La rudungu nunama i Haulu ba na-paràha-nya tau mapira la umana i Ndautu la pabuti-nya, ka pameti-ya nu la mbaru wàna. Tàka i Mikàlu papaha-na hi napanii-nya i Ndautu, “Jàka ndau palai la rudungu nàhu, haromu la mbaru pameti-mada-nggauka duda,” wànanya.

¹²Hàla i Mikàlu hi na-papuru-nya i Ndautu ba napali-nya la katonga, ka palai-nanyaka duna i Ndautu hi lupa namara.

¹³Hàlaka nu i Mikàlu hi napiti-ya na kahala hada marapu kuru umana, hi na-bànjalu-ya la ngia pa-katuda-na i Ndautu. Tunaka nu la tuba katiku-na hi natuya na nulangu ruu ihi kamàmbi, tàka hi na-palumburu-nya hinggi nuna na kahala tau.

¹⁴Ba ninjaka ba hapajia-ha da papalewa-na i Haulu la payàpa-ya i Ndautu, ka panii-nanyaka i Mikàlu, “Hidu-nanya i Ndautu,” wàna.

¹⁵Tàka i Haulu hilu paràha-mananjai da papalewa-na la paita wiki wànya mata i Ndautu na mahidu. Na lii pareta-na, “Karia-manya nàmu, jiapa ka dàngu ngia pa-katuda-na, ka ku-pameti-ya,” wàna.

¹⁶Ka tama-danyaka da papalewa daa la kuru pangia-da, ka ita-danyaka na kahala hada na pa-bànjalu la ngia pa-katuda dàngu nulangu ruu ihi kamàmbi la tuba katiku-na.

¹⁷Ka kareuku-nanyaka i Haulu lai Mikàlu, “Mutoma biaya eti la pa-panyonga tumungga nu! Nyumu mundula-ya na muhunggu hi lupa napalai!” wànanya. Nahema i Mikàlu, “Ka ba na-pangàdu-dungga la pa-pameti-ka jàka nda kundula-ya la papalai,” hi wàna.

¹⁸Ba na-ngalangu-ka pamara i Ndautu, laku-nanyaka la umana i Hamuilu la Rama, hàla paihi hàla-nanyaka i Hamuilu da pawunda-na i Haulu lai nyuna. Tunaka nu i Ndautu dàngu i Hamuilu pa-kariangu-danyaka palaku la Nayutu nu hi da-ndàdiku lai nu.

¹⁹Tàka ninguka ma-patàka-nya i Haulu, ba ninya i Ndautu la Nayutu lihina la Rama.

²⁰Jia-duyaka hi na-palewa tau mapira i Haulu la payàpa-ya i Ndautu. Tàka na patoma-da[55] jia biaha ba hajuru-da da wunangu ba talànga re - renjada dàngu ba dàngu wa - warangu-da ba da-parànjangu, ba nairu ngàndiha paraïna i Hamuilu. Hàla ba hapajia-ha da papalewa-na i Haulu harua-mananjai paraï Ngahuna i Ala, hi lupa dare - renja dàngu dawa - waramai duda nyuda.

²¹Ba natàka-ka na rukuna nuna lai Haulu, hilu paràha-mananjai da papalewa hawiangu, tàka nyuda pakiringu-madanyai duda pare - renja dàngu pawa - warangu. Pandilu wundangu wàngu hilu paràha-nanjai da papalewa-na nyuna i Haulu, tàka jia-mayai na malinja nyuda.

²²Jia-duyaka i Haulu hi nalaku la Rama. Natàka-ka la humuru bokulu la Heku, na-paàrangu, jàka nggiha i Hamuilu dàngu i Ndautu, tàka hi dapanii-nya tau lai nu, ba ninja la Nayutu.

²³Jia hi na-pangalangu lai nàhu, tàka nyunambu harua-mananyai duna Ngahuna i Ala, hi lupa nare - renja dàngu nawa - warangu nàhu la ànda hanggangu la Nayutu.

²⁴Ba natàka-ka lai nu, kalàba-nahaka da pakina, hi nare - renja dàngu hi nawa - warangu la hanggana i Hamuilu, hàla tawàlahu-nanyaka la tana dàngu kalulu-na ba hau lodu hau rudu titapu-na. (Jia-duyaka na pingi mulana na lara lii, “Ka wunangu-mbuyaika duna i Haulu?” hi wàda wàngu.)