Read Kambera 1 HAMUILU 2 Bible Online

1 HAMUILU 2 - Kambera bible

1 HAMUILU 2

¹Ka hamayangu-nanyaka i Hana, “I MIRI na-pahawola-ya na etinggu; na pawunda-na na-panggaüru-ya na hamangu-nggu. Hamemu-nggunyaka ba kuyiki-ya na papanggu, nadu ba ndula langatàka-mana-nggaka i MIRI.

²Nda ningua ma-matua hamana i MIRI! Didi-aya Nyuna na ma-pakahiri.

³Pànja-nyawa na panii abungu kakòlulu-mu! Jiaka-nyawa na kareku ngànjangu-mu! Nadu i MIRI ba Ala Mahupu-pinguya; na mahuku ndàbanya na pawunda tau.

⁴Mbata-nanyaka na tandai pana ma-kaborangu, ba tuna parukangu-nanyaka pa-kapàru na ma-mangonangu.

⁵Na tau na mambihu la kawunga-na làti ba da-bundungu da pangangu, nàhu tau tanggu ràma-ayaka ka kuana ngalangu pangangu ba wàna. Na tau na ma-rimbangu àmangu làti, nàhu nahoda-yaka ba nda nanjaka-nya pangangu. Na kawini papaha na mambuta làti hamemu-nanyaka, tau mapihu-haka da ana pa-paana-na. Tàka na ina na madangu anana pa-dunjakungu-ya, hi màtanya pa-kariku.

⁶I MIRI na ma-pameti, Nyunamai na ma-paluri. La parai tau mameti na-papuru-nya na tau, tàka Nyunamai na mawotu beliya welingu lai nu.

⁷Ningu tau pa-pawiti-na ka namila, tàka ningumai pa-pawiti-na ka nawulu. Ningu tau pa-pawawa-na, tàka ningumai pa-pajangga-na.

⁸Welingu la handuka na-wulaku-ya na tau nda ningu bandangu, welingu la mayila na-pahàla-ya na tau na maànga. Nyuda napa angu maràmba dangu-haka, dàngu hi panduma-nja pa-katangu mambotu. Na latana na tana manguna i MIRI-ya, la pinuna hi na-pahada-nya na pinu tana.

⁹Na tau manundu na-mànjaku mànu daa la lumbu pa-maüngu-na i MIRI. Tàka na ma-akatu napa namija mau la kapàta wuru yila. Na màka wiki nda patika-a pamonu-nya, na kapàru tau nda patalu wàngu-aya.

¹⁰Da muhuna i MIRI napa daluju làjaru, da-mangàdatu; ba na-kanduruku welingu la awangu Nyuna. I MIRI napa na-patanda-nya ngera na pinu tana nggubulu-na, tàka hi nawua-nya kuaha bunjuku na hanganji na papindi-na,” wàna.

¹¹Ka beli-nanyaka i Elikana dàngu kuru umana la Rama, tàka i Hamuilu, na anada, ndàdiku-nanyaka la Hilu la palumu-nya i MIRI, ba na-tanara-ya paraïna i Ratu Eli.

¹²Da anana i Eli lalu kabularu-ha. Nyuda nda da-wàrihu-aya i MIRI

¹³ba ratuha àtalu eti biada hangganya na banjaru Ihirailu. Jàka era ningu tau mawotu kameti maraku, nàmu-madua-nyaka na karaha ratu na mangàndi ranggatu wàla katailungu. Ba talànga manahu kàmangu-ha da tolungu,

¹⁴ta - tanju wàngu-danyaka ranggatu la wurungu ngia pa-manahu-ha da tolungu, hàla nggàra biaya na tolungu pa-padita-da tanggu ratu-haka. Mbuu ndàbana na tau Ihirailu na mamai la Hilu pawotu kameti maraku jia ndàba-maya na pawàda.

¹⁵Talànga handàka-na namai na karaha ratu ba ndedi pa-pahinggilu-ya na aparu-na la patunu-ya hi napanii-nya na tau na mawotu maraku, “Wua-ndaha da tolu mata nduma ratu ka handara-nja; nda dambuhangua tolu pa-manahu,” wàda.

¹⁶Jàka nahema na tau nuna, “Nahàmu-pa ka tatundu-nya na kalaratu, ka tunu pàkuya na aparu-na, hàlaka kau pitika pambuha-mu,” jàka wàna, napaya na karaha ratu, “Ndia-a, nàhu memangu-ma kau wuangu, jàka ndia napa kupiti rambangu,” wàna.

¹⁷Nuna-duyaka na njala bokulu-da da anana i Eli la mbara matana i MIRI, nadu ba da-pahalela-ya na kameti maraku ndumana i MIRI.

¹⁸Ba talànga tunaka nu, i Hamuilu ba anakeda bia-yapa naingu-mana duna ba nalumu-nya i MIRI. Nyuna napaki kalembi pa-patuda-nya welingu la tera linangu, hama tuna na kalembi lumungu-da da ratu.

¹⁹Nimbihu ndaungu na inana nautu-nya kalembi pa-hàlangu kudu, hàla hi nangàndi-nya i Hamuilu, jàka namai kariangu na leina pawotu kameti maraku ndaungu.

²⁰I Eli na-pakanyuru-nja i Elikana dàngu papaha-na, hi napanii-nya i Elikana, “Màla àru i MIRI ka nahili wua-kinggai ana dàngu yiana na papaha-mu, ka ningu hiluna na anami na pambàda huharu-mi lai MIRI,” wànanja. Hàlaka nu beli-danyaka la Rama.

²¹I MIRI na-pakanyuru-ya i Hana, hi na-paanangu tau madua haàtu mini dàngu tau madua kawini. I Hamuilu-mbu parukangu-nanyaka pa-matua, ba dàngu lumu-nanya i Ala.

²²I Eli kaweda nàkapu-mana-nyaka. Nuangu biana na ronguna na mapanii-ha na hurida da anana hanggangu la tau Ihirailu. I Eli napi-mbunja da anana ba da-katuda dànja da kawini da ma-paloku la pindu Maü tera Ngia Paninya i MIRI.

²³Jia-duyaka hi napanii-nja da anana, “Kurongu-maka nyungga panii pa-patàka-na na banjaru nggubulu-na rukuna na hurimi na ma-akatu. Nggikina nyimi hi timi nu? wànanja.

²⁴Àmbi hili timi nu, dou da ananggu. Ma-iraku langatàka-ya na papanii-na na banjaru na rukumi nyimi!

²⁵Jàka tauya na manjala la anguna patau, pekuna i Ala ba na-kahiri-ya; tàka na tau jàka nanjala lai MIRI, hilu nggamu-ipa na matula-nya?” wànanja. Tàka nyuda nda da-wàrihu-aya na panaungu-na i Eli, na amada, nadu ba mbàda botangu-manaka i MIRI la pa-pameti-ha nyuda.

²⁶Tàka hauya duna i Hamuilu, na anakeda nuna parukangu-nanyaka pa-matua dàngu parukangu-nanyaka pambuha-nya paraïna i MIRI hamanai taumbu.

²⁷La hau na lodu tàka-nanyaka na haàtu na wunangu lai Eli hi na-patàka-nya na lii langu welingu lai MIRI, “Ba jiaya na ata-nanya hanganji Mehiru na boku la mangilu-mu i Harungu dàngu kuru umana, ku-pawuwangu-maka wikinggu Nyungga lai nyuna i Harungu.

²⁸Welingu la kabihu - kabihu Ihirailu kupindi-yaka na kuru umana nyuna la paratu, la pa-lumungu la ngia pawotu maraku, patunu dupa dàngu papaki kalembi eputu[7] jàka napanii dàngga Nyungga. Lai nyuda dàngu wàla wuada kuwua-njaka ngabada la papiti hawiangu welingu la kameti maraku pawotu na patunu la ngia pawotu maraku.

²⁹Kanii, nggikina nyumu hiu malumbangu bau itaha[8] da kameti maraku pawotu-na na banjaru-nggu lai Nyungga nunjuya na pareta-nggu? Nggikina nyumu Eli, hiu rihi tembi-hapa da anamu welingu la patembi-ka Nyungga, dàngu hiu puli bianja ba da-pakambombu wikida wànja da marihi hàmu welingu la nimbihu kameti maraku-na na banjaru-nggu lai Nyungga?

³⁰Nyungga, MIRI Ala Ihirailu, àmangu mbàda pa-ràndingu-ngguka, na kuru umamu dàngu na biliku-mu napa ba nyimika malumu-ngga la paratu lundu nu - nu. Tàka nàhu nyuna nda kuhilu ora-anyapa nuna! Nadu nggamuya na matembi-ka, napa kutembi-mayai duna, tàka na ma-pakalana-ka napa ku-pakalana-manyai duna.

³¹Ronguwa, napa nàmunya na rehina ba ku-pameti hàlaha da bidi tau la kuru umamu dàngu la biliku-mu, hi lupa nda haàtu welingu la kuru umamu matoma la paluri malai.

³²Napa nyumu mu-hawina dàngu mu-kapihi[9] bau itaha da kanyuru pawua-nggunya na tau hawiangu-ka la Ihirailu, tàka la kuru uma wikimu napa nameti bidi tau ndàba.

³³Na nyuna, na haàtu welingu la wàla wuamu, napa kupuli-nya paluri dàngu ka nalumu-ngga la paratu. Ba tuna napa nyuna napoki dàngu hi naluri habaka eti.[10] Mbuu ndàbada da wàla wuamu hawiangu pa-pameti-ha napa.

³⁴Na manjadi mbuti ba tuba pa-deningu-na nuna mbuu ndàbana na papanii-nggu, napa da madua da anamu, i Hòpuni dàngu i Pineha dameti kahau lodungu.

³⁵Tunaka nu napa hi kupindi ratu ma-manundu lai Nyungga dàngu na mawunda-ya jàka nggàraya na pa-pareta-nggunya. Napa kuwua-nya wàla wuana nyuna na ma-paloku mànuya na paratu wàna la hangga hanganji - hanganji papindi-nggu.

³⁶Nimbihu wàla wuamu na maluri-ipa, napa dalua la ratu nuna la pakaraï àmahu dàngu pangangu. Napa nyuna na-kamahingu: Pahia àrungga duku ka ku-pambapa dànja da ratu, ka pekunai duku ba ku-ngalangu pangangu mili handàka hoba-a,” hi wàna.