Read Kambera 1 HAMUILU 20 Bible Online

1 HAMUILU 20 - Kambera bible

1 HAMUILU 20

¹Ka palai-nanyaka i Ndautu welingu la Nayutu lihina la Rama hi nalaku tomaya i Yunatàngu, hi na-paàra-nya, “Nggàra njalanggu? Nggàra akatu-ya na paruku-nggu dàngu nggàra njalanggu la amamu, pameti-ya hi jia wàna biangga?” wànanya.

²Nahema i Yunatàngu, “Àmbu panii tumu nu! Parongu-na i MIRI nda pa-pameti-akau nyumu. Na amanggu napanii mànu-mangga duku mbuu ndàbana na pawuku-na ka ma-mbàtingu-ya ka ndiakai. Ba tuna, nda jia kàpi-ananya na pawuku-na lai nyungga. Jia-duyaka, hi nda ma-deningu-ya nu na papanii-mu!” wànanya.

³Nahema[56] i Ndautu, “Na amamu napi hàmu-manya nyumu bau namuka. Jia-duya nda naànga-mapa duna papeka-nggau nyumu na rukuna nuna, ka àmbu na-hawina ba wànanggau. Jiapa nda nggikina, parongu-na i MIRI na maluri, langatàka na luringgu beri tilu manu la kapuka kadu-kiaya-ka!” hi wàna.

⁴Ka panii-nanyaka i Yunatàngu, “Nggàra biaya na pakarai-mu napa ku-patutu-manya duku,” hi wàna.

⁵Nanapa-ya i Ndautu, “Tuna nu, haromu Mbabu Bidi Wulangu-ya, làti nimangga bàdi la panga dua dànya na maràmba. Tàka jiaya jàka wàmu, napa nyungga kulaku ka ku-kapàndi la maràda lundu dua modungu la rudungu.

⁶Jàka na-paàrangu na amamu, nggikina hi nda ningga, kau panii àrunya, ba mbàda paramihi-ngguka nyungga lai nyumu la palua pa-renggangu la Mbetulehimu, nadu lai nu ba ningu lii kameti maraku ndaungu nduma mbuu ndàbada da kuru umanggu, wàna wàmunya.

⁷Jàka napanii na hanganji: ‘Hamu,’ jàka wàna, mara-dunggu-nyaka, tàka jàka nambeni, pi-maamu-nyaka nyuna ba mbàda bota-nanyaka la pa-pahanggàmaru-ka nyungga.

⁸Ku-kamahi-nggau kau pa-ndulangu, nadu ngaha ba mbàda jorutu-ndaka pa-ràndingu la hanggana i MIRI. Ba tuna jàka kunjala, pameti biaka, mili àru ka àmbu pulingga la amamu,” wànanya.

⁹Nahema i Yunatàngu, “Àmbu kadiku-dunya! Napa jàka kupi pa-langatàka-nya ba kita eti-mananya na amanggu la pa-hanggàmaru-kau nyumu, jiangu-ma duku ba kupeka-nggau nyumu,” wànanya.

¹⁰Tunaka nu hi na-paàrangu i Ndautu, “Ka nggamuka bàdi na ma-paniingga nyungga, jàka era hema hanggàritu-nanggau nyumu na amamu?” wànanya.

¹¹“Màlawa ka talaku la maràda,” hi wàna i Yunatàngu. Ka laku pa-kariangu-danyaka la maràda.

¹²Hàla i Yunatàngu hi napanii-nya i Ndautu, “Mili àru i MIRI, Ala Ihirailu ka na-hakahii-nda nyuta![57] Haromu la mbaru jàka ndia dua modungu, ràkangu hama tuna nàhu narehi napa ka ku-kamangu pa-palàda-nya na etina na amanggu. Jàka nambewa hàmu hanggangu lai nyumu, napa ka ku-pangàndi-nggauka langu.

¹³Jàka nawuku-maya la pa-hanggàmaru-kau nyumu, jiangu-ma duku ba ku-pekanggau ka peku pamara-mu wikimu. Mili àru i MIRI ka na-pameti-ka jàka nda ku-patutu-nya nuna ba wànggu. Nyunaka i MIRI ka nandula-kau nyumu hama tuna ba mbàda ndula-nanya nyuna!

¹⁴Dàngu jàka kuluri-kidupa, namuya na pa-ràndingu-nda la hanggana i MIRI dàngu ka jiapa-ma na tuturu-mungga; na nyuna jàka nda ninggapa,[58]

¹⁵màla àru kau pa-itangu tuturu-mu la wàla wuanggu lundu nu - nu. Dàngu jàka era pamolu hàla-nanya i MIRI na muhumu-ka,

¹⁶mili àru na pa-ràndingu-nda nyumu dàngu nyungga ka àmbu nambota. Jàka nalua-yaka pambota, i MIRI-ka duna na mahuku-nggau,” wànanya.[59]

¹⁷Tàka la pa-panduangu wàna nahili paràha-nya i Ndautu paraïna i Yunatàngu ka nahili pa-ràndingu la pambuha-nya nyuna, nadu nyuna ba nambuha-nya i Ndautu hama tuna ba na-mbuhangu wikina.

¹⁸Tunaka nu panii-nanyaka i Yunatàngu lai Ndautu, “Haromu Mbabu Bidi Wulangu-ya. Napa dapi-manggauka duna nyumu ba nda ninggau, nadu ba kanjàka jua bia-yaka na kanjàka-mu la menja ngia pangangu;

¹⁹hilu màlai dua modungu! Jia ba tuna, luawa kau kapàndi la pangia-mu la wungana, dàngu kau patiangu la hambeli pabundu watu[60] lai nu.

²⁰Dua modungu napa ku-pahàla-nja da ana pana tailu mbungu la tubada da watu nuda, ba hama tuna ningu pa-katutu-nggu.

²¹Hàla napa ku-paràha-nya na anakeda karia-nggu paputu-ha nuda da ana pana, jàka kupanii-nya, ‘Aï mbara yiahu-kikau la ma-mareni kau pitiya na ana pana; piti-yawa,’ napa jàka wànggunya, tandaya nyumu ba nda nggàra ehimu dàngu peku luhumu. Ku-harangu parongu-na i MIRI na maluri, ba nda ana nggàra manjurangu-a manggàna-kau.

²²Tàka jàka kupanii-nya na anakeda papalewa-nggu: ‘Aï, namarau-mapa na pana nu lua,’ jàka wànggunya, nuna tanda-naka ba i MIRI-ka na ma-paràha-nggau palaku, ba tuna mulaku-wa.

²³Nyunaka i MIRI ka namangga-nda, ka peku kawana mànu-ndanya na pa-ràndingu-nda nyuta tau madua,” wànanya.

²⁴Ka kapàndi-nanyaka i Ndautu la maràda. Nu la Mbabu Bidi Wulangu, na Hanganji Haulu mai-nanyaka pa-pamangu.

²⁵Hama tuna na pakàli wàna, nyuna na-mandapu la lihi dindingu, i Yunatàngu na-mandapu la tuba hanggana,[61] i Àpuneru la karaha-na i Haulu, tàka na kanjàka-na i Ndautu, kanjàka jua bia-yaka.

²⁶Tàka i Haulu nda napali-anya ngaru na rukuna nuna la lodu nuna, la kanandingu-na, “Talànga wanguna ningu manggàna-ya ngga - nggàra, hi nda na-yahangu tundunya na huri anggama,” wàna.

²⁷Hilu hau lodu, nu na lodu padua wàna na Bidi Wulangu, na kanjàka-na i Ndautu jia-mayapa ba kanjàka juaya, ka paàrangu-nanyaka i Haulu lai Yunatàngu, “Nggikina kangeu dàngu nàhu i Ndautu hi nda namai la pamangu?” wàna.

²⁸Nahema i Yunatàngu, “Mbàda paramihi-manaka nyuna lai nyungga palua la Mbetulehimu.

²⁹‘Puli àrungga ka kulua, ba remi-danya na mbabu kameti maraku la Mbetulehimu, namai bàdi nyuna wàdangga da ayanggu. Jia ba tuna, jia jàka wàmu, màta ka kulua pa-pahàmburu dànja da kalembi-nggu,’ wàna. Nunaya na pakiri-na hi nda ninya la pamangu yiana, ama,” wàna.

³⁰Narongu-yaka nuna i Haulu, hàngga nda uku-nanya i Yunatàngu, hi napanii-nya, “Ana njuraku-kau nyumu! Nàhu pi-nggunyaka nyumu bau ha-kapapa ningu lai Ndautu, dàngu bau pa-makia wikimu hamanai na inamu!

³¹Ndau pàda-anya dumu jàka ni - ninya-kapa i Ndautu, nyumu nda peku-amu la pa-hanganji la tana yiana? Nàhu paràhangu-wa tau palua pahimbu-ya ka karia-nya yiahu, nadu nyuna ba nameti-ma bàdi!” wàna.

³²Nahema i Yunatàngu, “Ka ni hi nameti-mai bàdi? Nggàra njalana?” wàna.

³³Narongu-yaka nuna i Haulu, làndahu-madua-nanyaka nimbu i Yunatàngu, pameti-ya ba wàna. Ka pi hàmu-madua-nanyaka i Yunatàngu ba etingu langatàka-mana-nyaka la pa-pameti-ya i Ndautu.

³⁴Ka wàngu pahada karaü etingu-madua-nanyaka i Yunatàngu ba na-dunjaku-nya na menja pamangu dàngu nda nggàrama pangana nu la lodu padua wàna na Mbabu Bidi Wulangu. Kanjupu ringu languya na etina ba na-patanda-nya ngerana i Ndautu ba na-pamakia tunanya nu paraïna amana.

³⁵Hadangu-ka harii laku-nanyaka i Yunatàngu la maràda pa-pahàmburu dànya i Ndautu hama tuna na pambàda maràngga pakaka-da. Na-kariangu haàtu anakeda mini, papalewa-na,

³⁶hàla hi napanii-nya, “Màla, lua kau putuha da ana pana da papana-nggu,” wànanya. Ba talànga palai-naka nuna na anakeda i Yunatàngu pana pa-làpahu-nanyaka hau ana pana.

³⁷Ba natàka-ka nuna na anakeda la ngia pa-kanabu-na na ana pana, i Yunatàngu nawara-nya nuna na anakeda, “Aï, namarau-mapa na na ana pana lai nàhu-makikau!

³⁸Parenggangu-ki, àmbu hondaru!” wànanya. Nuna na anakeda naputu-ya na pana hi nabeli ngàndinya na mirina.

³⁹Nyuna nda napi-anya mbarana na kareuku-na i Yunatàngu, mbulungu i Yunatàngu dàngu i Ndautu-a duda da mapinya.

⁴⁰Tunaka nu i Yunatàngu wua-nahaka da papana wàna na anakeda hi na-paràha-nya pabeli la paraingu.

⁴¹Ba nalaku-ka na anakeda, luhu-nanyaka i Ndautu welingu la hambeli pabundu watu,[62] hi na-maràbaku pandilu wundangu. Nyuna i Ndautu hamanai i Yunatàngu, maràngga pahii dàngu-danyaka ba da-papuduku. Na hawina-na i Ndautu narihi-mapa welingu lai Yunatàngu.[63]

⁴²Tunaka nu panii-nanyaka i Yunatàngu lai Ndautu, “Mili àru i Ala ka nandula-kau. I MIRI jiaya na handera-nda, nyuta dàngu da wàlanda ba nua naingu-na na kawana-ndanya na paràndi-nda la hanggana i Ala,” wàna. Hàlaka nu laku-nanyaka duna i Ndautu, tàka i Yunatàngu beli-nanyaka la paraingu.