Read Kambera 1 HAMUILU 21 Bible Online

1 HAMUILU 21 - Kambera bible

1 HAMUILU 21

¹Ka laku-nanyaka i Ndautu la ratu Ahimeliku la Nòpu. Nawàngu pa-katàtaku i Ahimeliku ba naluhu tomaya i Ndautu dàngu hi na-paàra-nya, “Nggikina hiu mai didi-akau yiahu?” wànanya.

²Nahema i Ndautu, “Nyungga ningu pa-patanggu-nangga na hanganji, dàngu nahiri-ngga la papanii-ya la haàtu na rukuna na pa-patanggu-nangga. Jia-duyaka da tau la wawanggu hi ku-paràha-nja pa-patiangu la hau pa-ngiangu.

³Malangu-mu ama, ningu pa-paàra-nggu hawutu, nggàra pangangu nu maningu lai nyumu ama? Wua àrungga lima mbua roti jàka ndia nggàra bia maningu nu lai yiahu,” wàna.

⁴Napaya na ratu, “Lai nyungga roti àtalu roti nda ningu, jiaha da roti mangejingu-a da maninja, pekuna bau pitiha, mili nyuna da tau la wawamu kaàmbu bidi hàlada pa-angungu tau kawini,” wàna.

⁵Nahema i Ndautu, “Jia-maduya, nda dawunda-aya na matuna nu. Naingu-mana jàka wunda-manya na patanggu-ma, da tau la wawanggu da-manggangu-ma ka da-yahangu tundunya na huri anggama, jiapa-a nuna ba patanggu mànu-manya, ka ri - rihi-maka duna jàka patanggu pa-kahaungu-ya hama tuna nàhu!” wànanya.

⁶Hàla na ratu wua-nanyaka i Ndautu da roti mangejingu, nadu ba jiaha nuda-a da maninja lai nyuna da roti pa-mangejingu lai Ala da pambàda dendi welingu la ngia pawotu maraku ka pahilu wànja roti bidi. (

⁷Talànga ni pàkunyai duna i Ndowiku tau Endumu, na kapala pawangu bandana i Haulu lai nu la lodu nuna palundu-nanya na wai ngerana la huri anggama.)

⁸Tunaka nu paàrangu-nanyaka i Ndautu lai Ahimeliku: “Màla ningu nyumu ama nimbu jàka ndia hapanda ràka papaki-nggu? Na pareta-na na hanganji lalu harabànda-na, hi kuhada pare - renggangu hi nda peku-mbunggu papiti hapanda jàka ndia madàka hangia,” wànanya.

⁹Hàla nahema i Ahimeliku, “Nyungga ku-pahàmu-ya na hapanda-na i Nggoliatu, na tau Pilitingu na pa-pameti-mu la Lolangu Ela; nuna na hapanda ninya la hambeli eputu, daaya la kamburu tera. Jàka umbuhangu piti biaya duna, nadu ba jiaya nuna-a na madàka na maninya lai yiahu,” wàna. Napaya i Ndautu, “Na hapanda nuna jia-mayaka na hapanda na marihi hàmu la nggubulu tana, wua-ngganya nuna nyungga!” hi wàna.

¹⁰La lodu nunama i Ndautu ba napalai welingu lai Haulu, hàla tàka-nanyaka lai Akihu, maràmba la paraingu Nggàta.

¹¹I Akihu napeka-nya paraï da ba hapajia-ha da panggawi-na, “Ka nda jia-aya ni i Ndautu, na maràmba la paraina? Dàngu nda jiaya ni ndumana nyuna ba dàngu renjada ba da-pahangu da kawini, ‘I Haulu na-pameti diha rata muhu, tàka i Ndautu na-pameti diha kambulu rata?’ ba wàda,” hi wàdanya.

¹²Da kareuku nuda dapaliu laünya na kanandingu-na i Ndautu, na-mangàdatu wànyaka la hanggana i Maràmba Akihu.

¹³Jia-duyaka nu, la hangga madangu nyuna i Ndautu hi na-harawuku pa-katoba wikina. Ba da-kamangu papàtu-ya, nyuna hama tuna tau nda hàmu katiku-ya, ba nakànja - kànjaya na pindu paraingu[64] dàngu ba na-pahia-nya pa-lulungu na wai iluna la ruu njerina.

¹⁴Ka panii-nanyaka i Akihu la panggawi-na ba hapajia-ha, “Ka ndai ita-aya ni ba tau katobaya? Nggikina hi mi-karia-nya yiahu?

¹⁵Nanjaka-pa na tau nda hàmu katiku wàmi la kaliungu-nggu, hi lupa ikaria-nya nana na tau katoba la umanggu yiana?” wànanja.