Read Kambera 1 HAMUILU 22 Bible Online

1 HAMUILU 22 - Kambera bible

1 HAMUILU 22

¹Tunaka nu i Ndautu dunjaku-nanyaka na paraingu Nggàta tàka hi na-kawiningu la liangu lihi paraingu Andulàmu. Ba darongu-ka da ayana dàngu hapa-kalembi-da ba ninya lai nu, mai toma-danyaka.

²Dàngumbu na tau - tauka na pa-kapidihu, na maningu wutangu dàngu na maningu pa-paumbingu, mbuu ndàbada da-kapulingu lai Ndautu, dàngu nyunaka i Ndautu na liku-uruda. Mbuu ndàbada da ma-tundungu lai Ndautu, ràkangu tau 400-ya.

³Welingu lai nu la liangu laku-danyaka i Ndautu la Mihipa la Muapu, hi napanii-nya na hanganji Muapu, “Màla umbu pahia àrunja da inanggu da amanggu ka da-ndàdiku àru lai nyumu, ka lupa kupinya na pawuku-na i Ala hanggangu lai nyungga,” wànanya.

⁴Tunaka nu karia-nanjaka da inana da amana la hanganji Muapu, hi da-engangu lai nu ba nàhuya duna i Ndautu ba na-kapàndi la liangu.

⁵La hau na lodu na haàtu na wunangu, na ma-tamungu Nggàtu namai lai Ndautu hi napanii-nya, “Àmbu ndàdiku-du la liangu yiana, laku parenggangu-wa la tana Yahunda,” wànanya. Hàla laku-nanyaka i Ndautu hi natama la omangu Keritu.

⁶La hau na lodu i Haulu talànga mandapu-na la lumbu ai tamarihiku la pinu palindi la Nggimbia; dàngu yàpa-nanya-padua na nimbuna, tàka mbuu ndàbada da parawira-na ndolaku weli winggiru-madanya. Ba narongu-ka ba papingu-yaka na pangiana i Ndautu dàngu da tau la wawana,

⁷panii-nanjaka da parawira-na ba hapajia-ha, “Ronguwa, ha tau Mbanyamingu! Màla nu i Ndautu nawua-nggaika napa tana wokami dàngu woka angguru-mi? Jia wotu ndàba-nanggaika napa panjadi parawira la tanatara-na?

⁸Jia-yaka nu mangu kiringu hi mi-pahamangu la palawa-ngga nyungga dàngu hi nda ningu ndoku haàtu mapanii-ngga, hi lupa na ana wiki-anggu ba napala papambu lai nyuna i Ndautu? Nda ninguma haàtu welingu lai nyimi ma-pangàda-ngga ngeranggu nyungga jàka ndia mapanii-ngga rukuna i Ndautu, na tau la karaha-nggu, la rehina nàhu ba patiangu-kia-nanyaka pekuna la pa-pameti-ka nyungga, dàngu jiapa na ana wikinggu i Yunatàngu nyunaipa na ma-pambana-ya!” wàna.

⁹I Ndowiku na kapala pawangu bandana i Haulu, nimbunya lai nu la parawira-na i Haulu ba hapajia-ha, ka panii-nanyaka i Ndowiku, “Kuita-ya nyungga i Ndautu ba namai lai Ahimeliku anana i Ahitupu la Nòpu.

¹⁰I Ahimeliku nakarai-ya na panaunguna i MIRI, jàka nggikina wànaka bàdi na pawunda-na i Ndautu. Hinggilu-nai nuna nawua-mbunya bàlangu i Ndautu màlai ba na-pakata-nya na hapanda-na i Nggoliatu tau Pilitingu,” wàna.

¹¹Hàla na hanganji na-palewa tau papaau-nya na ratu Ahimeliku dàngu hapa-kalembi-da da ma-katangu ratu la Nòpu; ka hurungu-danyaka lai nyuna.

¹²Napaya i Haulu lai Ahimeliku, “Ronguwa, ha anana i Ahitupu!” wàna. Nahema, “Ou Tamu Umbu,” hi wàna.

¹³Na-paàrangu i Haulu, “Nggikina hi mi-pahamangu dàngu i Ndautu la pa-lawangga nyungga? Nggikina hi muwua-nya bàla roti dàngu hiu pa-katanya hapanda màlai bau tanggu karainya panaungu lai Ala? Ba tuna nàhu lawa-nanggaka dàngu patiangu-kia-nanyaka pekuna la pa-pameti-ka,” wàna.

¹⁴Hàla nahema i Ahimeliku, “Ka nda nyuna-a i Ndautu na parawira marihi tuturu? Nyuna layia ana wiki-munya dàngu nyuna kapala[65] mini manggangu wikimu nyumu, dàngu na patembi mbanada paraï mbuu ndàbada da tau la kuru uma hanganji.

¹⁵Tubana ba ku-paàra-nya panaungu-na i Ala ndumana nyuna, tàka ba nda hinaki[66] la rehi nuna ba tunggu nu. Jàka jiaya na pa-hamangu la palawa-nggau nyumu, àmbu paduku-dungganya nyungga jàka ndia la haàtu welingu la kuru umanggu. Nda ngga - nggàrama duku papinggu na rukuna na lii nuna!” wàna.

¹⁶Tàka nahema na hanganji, “Ahimeliku! Nyumu dàngu hapa-kalembi-mi, mimeti-ma bàdi,” wàna.

¹⁷Ka wua-nanjaka pareta da mini manggangu ba hapajia-ha da ma-ndolaku la lihina, “Màla, ipameti-hawa nu da ratuna i MIRI! Nyuda ba dawai angunya i Ndautu. Dapi-manya i Ndautu ba palai-nanya tàka nda dapeka-angga nyungga,” wàna. Tàka ba hapajia-ha da mini manggangu nda dabihu-a pa-pameti-ha da ratuna i MIRI.

¹⁸Jia-duyaka i Haulu hi napanii-nya i Ndowiku, “Màla parenggangu! Nyumu bia kau pameti-ha nyuda!” wànanya. Ka ndàharungu-nanyaka i Ndowiku hi na-pameti-ha da ratu. La lodu nuna da mameti tau walu kambulu malima-ha da ratu da ràka mapaki kalembi eputu.

¹⁹I Haulu na-wuangu-mbu pareta la pa-pameti mbutaha da mangia-nya la Nòpu, na paraingu ratu, mini, kawini, anakeda dàngu anarara, dàngumbu hapi, njara dàngu mbimbi, mbuu ndàbada nda hili ningu pa-paluri.

²⁰Didi-aya i Àpuyataru, na haàtu welingu la anana i Ahimeliku na-ngalangu pamara. Nyuna hi napalai tomaya i Ndautu,

²¹hàla hi na-paihi-nya ba mbàda pameti-nahaka ba hapajia-ha da ratuna i MIRI paraïna i Haulu.

²²Ka panii-naka lai nyuna i Ndautu, “Ba kuita-ya i Ndowiku ba ninya lai nu la lodu nuna, pi pa-ihiku-manggu-nyaka nyuna napa ba na-pakàla lai Haulu. Ba tuna nyungga-maka duku matanggu hemaya[67] na ruku meti hàlada da nua kalembi-mu.

²³Ndàdiku-ka la lihinggu, àmbu mangàdatu-du. I Haulu pameti-ya nyuna wànanggau, hama-manai pameti-ya nyuna ba wànangga nyungga. Ba tuna napa mara-munyaka la pangia-nggu,” wànanya.