Read Kambera 1 HAMUILU 23 Bible Online

1 HAMUILU 23 - Kambera bible

1 HAMUILU 23

¹La hau lodu ningu ma-patàka-nya panii i Ndautu, da tau Pilitingu da-kangaburu-ya na paraingu Kahila dàngu hi daramba-nja da uhu nggàndumu da pabidi mutida.

²Ka paàra-nanyaka i MIRI, “Kulua-ka bàdi pa-kangaburu-ya na tau Pilitingu?” wàna. “Wua,” hi wàna i MIRI, “luawa nyuna kau kangaburu-ha dàngu kau pamara-ya na tau mangia-nya la Kahila,” wànanya.

³Tàka da tau la wawana dapanii-nya, “Jiapa lai yiahu yia, la Yahunda, mangàdatu nda uku-duta, ka jia-ama-yaka jàka talua pa-kangaburu-ha da tanatara Pilitingu la Kahila,” wàdanja.

⁴Ka jia-duyaka i Ndautu hi nahili karaiya handàkangu na panaungu-na i MIRI, tàka nahema i MIRI, “Àmbu kadiku-dunya, kangaburu-ya nyuna na paraingu Kahila, nadu da tanatara Pilitingu napa kupuli-nja la limamu,” wànanya.

⁵Ka hadangu-nanyaka i Ndautu dàngu da tau la wawana palua la Kahila, hàla hi da-kangaburu-ya na Kahila, dadangu da tau Pilitingu pa-pameti-da, dàngu hi daramba-nja da bandada. Tuna nuduka i Ndautu ba na-pahàla-ya na tau na mangia-nya nuna na paraingu.

⁶I Àpuyataru anana i Ahimeliku ba jiaya na palaina ba nalaku tomaya i Ndautu, dàngu na-karia-manya i Ndautu la Kahila, nangàndi-ma eputu.

⁷Ba ninguka mapanii-nya i Haulu ba ninya la Kahila i Ndautu, na pa-pangàda-na i Haulu, “Puli-duna-nya-a i Ala i Ndautu lai nyungga. Handànga-nanyaka nadu ba natama la paraingu ningu tindingu dàngu pindu bokulu,” wàna.

⁸Ka pauhi-nanjaka da tanatara-na i Haulu hi nalaku la Kahila la pa-nggupulu-ya i Ndautu dàngu mbuu ndàbada da tau la wawana.

⁹Tàka i Ndautu mbàda pi-nanyaka i Haulu ba na-akatu na pawuku-na hanggangu lai nyuna. Jia-duyaka hi napanii-nya na Ratu Àpuyataru, “Ngàndiya nàmu na eputu,” hi wànanya.

¹⁰Ka hamayangu-nanyaka i Ndautu, “Dou MIRI, Ala Ihirailu, kurongu-ya ba nàmunya i Haulu la Kahila dàngu la pa-pakabu-ya na paraingu, kiringgu nyungga, atamu.

¹¹Tuba-manaka nu na lii parongu-nggu? MIRI, Ala Ihirailu, màla àru MIRI kau puru pekangga,” wàna. Nahema i MIRI, “Wua, nàmunya i Haulu,” hi wàna. Hàla nahili paàrangu i Ndautu, “Màla na tau na mangia-nya yiana na paraingu Kahila, dapuli-ngga nyungga dàngu da tau la wawanggu lai Haulu?” wàna. Nahema i MIRI, “Wua,” hi wàna.

¹³Hàla i Ndautu hamanai da tau la wawana ba ràkangu tau 600-ha, da-manyamalu pa-dunjaku-nya na paraingu Kahila tàka hi da-njadangu la hau pa-ngiangu lupa la hau pa-ngiangu. Ba narongu-ka i Haulu ba nalaku-ka i Ndautu welingu la Kahila ba wàdanya, màta-nanyaka na pawuku-na la pakangaburuya.

¹⁴Hàlaka nu i Ndautu ngiangu-nanyaka la liangu - liangu la ma-palindingu la maràda telangu la Hipu. Nua naingu-mana ba nakehanya nyuna paraïna i Haulu, tàka i MIRI nda napuli-anya la limana nuna na hanganji.

¹⁵Jiapa-kai ba tuna na-mangàdatu-mapa i Ndautu, nadu ba pameti-maya bàdi wàna i Haulu. La hau rehi ninya i Ndautu la Horihu, la maràda telangu Hipu.

¹⁶I Yunatàngu nalua toma-maya i Ndautu lai nu, la pa-pamàndu-nya na pawaina nyuna ba katindi-nanya padua paraïna i Ala.

¹⁷Na paniina i Yunatàngu lai nyuna, “Àmbu mangàdatu-du, nda jia hanggau-ananggau lima amanggu. Nyuna i ama napi hàmu-manyaka ba nyumuka napa hanganji Ihirailu tàka nyungga ba la wawamu nyumuka,” wànanya.

¹⁸Tunaka nu nyuda i Ndautu dàngu i Yunatàngu jàritu-danyaka na pa-ràndingu-da la pa-pakanduangu la hanggana i MIRI. Hàlaka nu beli-nanyaka i Yunatàngu la umana, tàka i Ndautu pa-engangu-nanyaka la Horihu.

¹⁹Tunaka nu ba tau mapira-ha da tau la Hipu da-hurungu lai i Haulu la Nggimbia, hi dapeka-nya, “I Ndautu kapàndi-nanya la ngaba tanama nyuma la kubu liangu lihina la Horihu, la pinu tandula Hakila mbara luru maràda telangu Yahunda.

²⁰Mapi-manya umbu, nyumu ba pa-tikingu-munya la payàpa-ya nyuna, jia ba tuna mai bia la ngaba tanama nyuma. Patanggu-manya ba jiangu-ma dumu bau ràkapu-ya,” wàdanya.

²¹Nahema i Haulu, “Màla àru nyimi ka na-pakanyuru-kai i MIRI, nadu bai tungga mahàmu nyungga!

²²Lakuwa nu kai manginjiru-kiya; kanuka palanga-tàka-manya jàka nggiya nyuna i Ndautu na ngia paninya dàngu jàka nggamu na mambàda itaya lai nu. Ba kurongu nyuna lalu màhiya.

²³Ba tuna kanuka-maya dàngu kai manginjiru-ha da liangu - liangu da pambàda ngiana handàkangu ba na-kapàndi, dàngu kai beli yiahu la pa-paihi-ngga nyungga. Hàlaka napa ka kulaku karia-nggai nyimi, dàngu jàka ni-manyapa la ngaba lai nu, jiangu-ma duku kuhimbu-ya, jiapa ka kuwira nyakaya-kadu la nggubulu Yahunda!” wàna.

²⁴Ka laku-danyaka da tau nuda hi dabeli la Hipu, ba da-mangilu-nya i Haulu. La rehi nuna i Ndautu dàngu da tau la wawana ninja la maràda telangu la Maüngu, la lolangu malinggitu la ngaba mbara luruna na maràda telangu Yahunda.

²⁵I Haulu dàngu tanatara-na maidanya pahimbu-ya i Ndautu, na nyuna ningu tau ma-patàka-nya i Ndautu na rukuna nuna, hi nalaku la palindi watu la maràda telangu la Maüngu dàngu hi da-paengangu lai nu. Ba napi-nyaka nuna i Haulu, manyamalu-nanyaka payaulu-ya i Ndautu.

²⁶I Haulu dàngu tanatara-na dalaku-nya na karaha palindi mbara yiahu, tàka i Ndautu dàngu tau la wawana dalaku-nya na karaha mbara lua. I Ndautu napare - renggangu pa-pahili wikina welingu lai Haulu, ba mbàda pakiringu-manaka pa-nggupulu-ha ka yàpaha ba wàna.

²⁷Tàka hi jia tàka biana na haàtu na tau papalewa na ma-hurungu lai Haulu papanii-nya, “Tamu Umbu beli parenggangu-ki! Da tau Pilitingu da-kangaburu-yaka na tananda!” wànanya.

²⁸Ka manjabili-nanyaka i Haulu la pakeha-nya i Ndautu, tàka hi nabeli la pa-pabera lawanya na tau Pilitingu. Jia-duyaka na pa-ngiangu nuna Palindi Pahewangu, hi wàdanya.