Read Kambera 1 HAMUILU 24 Bible Online

1 HAMUILU 24 - Kambera bible

1 HAMUILU 24

¹Welingu lai nu laku-nanyaka la ngaba tana Eni-Nggedi, hi na-kapàndi la kubu - kubu liangu.

²Ba hinaka nabeli i Haulu welingu la pa-pabera lawanya na tau Pilitingu, ninguka lii matàka-nya, ba ninya i Ndautu la maràda telangu lihina la Eni-Nggedi.

³Ka manyamalu pindi-madua-nanyaka i Haulu tau 3.000 panjuri papindi jua marihi hàmu la nggubulu Ihirailu, hàla laku-nanyaka pahimbu-ya i Ndautu dàngu tau la wawana la tuba pahunga loduna na Palindi Watu Kamàmbi Omangu.

⁴Ka tàka-nanyaka i Haulu la lihi pangia-da ba pi - pirada da oka mbimbi la hingi ànda. Lai nu nimanyai na hau na liangu, ka tama-nanyaka i Haulu la pa-pakambelingu. Jia pàkuyai duna i Ndautu dàngu da tau la wawana ba da-kapàndi ningu lai nu la kubu liangu, na nyuna mbara hu daa-mahapa.

⁵Ka panii-danyaka da tau la wawana i Ndautu, “Nu wangu-naka làti ama! Ka nda mbàda peka-nanggau i MIRI, ‘Na muhumu napa kupuli-nggaunya, muwàngu bia papimu lai nyuna!’ hi wànanggau,” wàdanya. Tunaka nu melingu-nanyaka i Ndautu la pangia-na i Haulu tàka hi na-kàtahu kangunduhu-ya hawutu na hupu kalembi bokulu-na i Haulu.

⁶Tàka hàlaka nu, na-pàdangu wikina i Ndautu ba njala-nanyaka rukuna ba nawunda-ya na matuna nu.

⁷Hi napanii-nja da tau la wawana, “Mili àru i MIRI ka namangga-ngga ka àmbu kutuu ma-akatu hanggangu la hanganji-nggu na pambàda pindina i MIRI. Ka àmbu jia paharui-dunggunya hakudu, nadu nyuna ba hanganji papindi-na i MIRI-ya!” wàna.

⁸Tunanja nu i Ndautu ba na-palànyapu-ha da eti tau la wawana, ba nda na-pahia-nja la pa-nàhaku-ya i Haulu. Ka hadangu-nanyaka i Haulu hi na-dunjaku-nya na liangu, hi na-pangala-nya na àndana.

⁹Luhu-mbuna-nyaka duna i Ndautu welingu la kubu liangu hi na-warangu welingu la kajia-na i Haulu, “Ou Tamu Umbu!” wàna.

¹⁰Ka nggilaku-nanyaka i Haulu la kajia-na, tàka i Ndautu hi na-maràbaku ba natembi-ya, hàla hi napanii, “Nggikina nyumu Tamu Umbu hiu patingi ninya na pulu tau, na mapanii ba himbu-nggunggau pa-hanggàmaru wàmu nyumu, Tamu Umbu?

¹¹Nàhu hunggu wiki-mamu-nyaka Tamu Umbu daa la kubu liangu kawai, i MIRI ba puli-mana-nggauka làti lai nyungga. Ningu-maka làti angunggu haàtu ma-titiru-ka la pa-pameti-kau nyumu, tàka nyungga duku ku-pandia-ya. Kuhema-ya ba nda kubihu-a duku pa-pahurui-ya na hanganjinggu na papindi-na i MIRI.

¹²Tàngaru, ou na amanggu duku! Tàngaru-ya na ha-kadipu hupu kalembi-mu yiana la limanggu Tamu Umbu! Làti peku-manaka duku Tamu Umbu ba ku-pameti-kau, tàka nyungga duku kàtahu-nggunya hawutu-a hupu kalembi bokulu-mu. Jia ba tuna, wuwa-nanyaka nu ba nda nimanya duku na akatu etinggu jàka ndia la pa-katadaku hanggangu lai nyumu. Mukeha mànungga nyungga Tamu Umbu la pa-pameti-ka, jiapa ka nda ningu njalanggu ana hawutu hanggangu lai nyumu.

¹³Nyunaka i MIRI ka natunda botangu nyuta tau madua, jàka nggamu manjala! Màla àru i MIRI ka natunya himbalu-na na pawunda-mu Tamu Umbu hanggangu lai nyungga, jiapa ka nda ana hawutu duku la pa-paharui-kau nyumu.

¹⁴Nyumu Tamu Umbu bau pi-madunya na lara lii ndai: ‘Na ma-akatu mbulungu tau akatu-a mawunda-ya,’ ba wàna. Jia ba tuna nyungga duku nda jia papa-anggunggau napa.

¹⁵Panauka nyungga yia na pa-pameti ba wàna na hanganji Ihirailu! Tàngaru-ka yia tau pakeha ma - mànungu! Nyungga ba hama ahu meti pàkuka dàngu ba hama wutu pàkuka.

¹⁶I MIRI napa na manjadi hakimu la padua-nda nyuta, nyumu Tamu Umbu dàngu nyungga. Màla àru i MIRI ka na-manginjiru-ya na rukuna yiana, dàngu ka na-kahiri-ka dàngu ka na-pamara-ka welingu la hanganji,” wàna.

¹⁷Ba na-panjàpu-yaka i Ndautu na kareuku-na, panii-nanyaka i Haulu, “Jiakau nyumu na Ndautu, ananggu?” wàna. Hàla hii-nanyaka.

¹⁸Ka panii-nanyaka lai Ndautu, “Nyumu ma-mànangu, nyungga manjala.

¹⁹Na akatu-nggu hanggangu lai nyumu, mu-himbalu wànya mahàmu. La lodu nàhu nyumu, pajiliku-munyaka na pawuku-mu na mahàmu hanggangu lai nyungga, nadu ba ndau pameti biaka, jiapa ka mbàda pahàla-nanggaka i MIRI lai nyumu.

²⁰Era-ana bàdi hi ningu haàtu tau na matoma-nya na muhuna tàka hi namàta bianya paluri! Jia ba tuna, mili àru i MIRI ka na-pakanyuru-kau ruku hàmuna na paraï rukumu hanggangu lai nyungga la lodu nàhu!

²¹Nàhu nyungga pi pa-ihiku-nggunyaka ba nyumuka napa hanganji la Ihirailu dàngu na pa-hanganji Ihirailu na-kapingatu la wawa pareta-mu nyumu.

²²Nàhu pa-ràndingu-wa lai nyungga la parongu-na i MIRI, nyumu ba ndau pameti-ha da wàla wuanggu, dàngumbu napa ba ndau podahu-ya na tamu kuru umanggu!” wàna.

²³Ka harangu-nanyaka i Ndautu la pa-patutu-nya nuna napa. Tunaka nu beli-nanyaka i Haulu la umana, tàka i Ndautu dàngu da tau la wawana beli-danyaka la ngia pa-kapàndi-da.