Read Kambera 1 HAMUILU 25 Bible Online

1 HAMUILU 25 - Kambera bible

1 HAMUILU 25

¹Ndedi nggi tuna mandaina meti-nanyaka i Hamuilu. Nggubulu ndàbana na tau Ihirailu pauhi-nanyaka ka pa-màtungu la lii hawina nuna. Tunaka nu tani-danyaka la umana la Rama. Hàlaka nu laku-nanyaka i Ndautu la maràda telangu la Paràngu.

²La paraingu Maüngu ninya na haàtu na tau mini, nyuna wàla wuana i Kalipu-ya, na tamuna Nambàlu-ya. Nyuna ningu tana na ngia pa-pahàla banda la lihi paraingu Kàramilu. Nyuna wulu nda ukuya, ningu mbimbina 3.000 dàngu kamàmbi 1.000. I Ambinggaïlu papaha-na, namàhi dàngu na-manandangu; tàka i Nambàlu na hanggàritu hurina dàngu nda nahàmu na huri lurina. La hau na lodu i Nambàlu lakuna pa-nggutingu wulu mbimbi la Kàramilu.

⁴Ba narongu-yaka nuna paraïna i Ndautu na maninya la maràda telangu,

⁵na-paràhangu tau hakambulu bidi mini palua la Kàramilu,

⁶patoma-ya i Nambàlu la pa-patàka-nya na tambina i Ndautu. Na paràha-nja papanii tuna yia, “Napeku hàmuwa dumu lai nyumu dàngu kuru umamu hamanai da mangumu-ka.

⁷Kurongu-kau nyumu ba nggutingu-munya wulu mbimbimu. Kau pinya ba hapajia-ha da mini pawangu-mu da maninja la ngaba tanama nyuma, nda makàli kuhiku-maha duma, dàngu nda kàli ningumbu ma-mbulangu-da ngga - nggàra kandai ninja la Kàramilu.

⁸Paàra bianja nyuda, jiangu-ma duda tubana ba wàda na rukuna nuna. Jia ba tuna ku-monungu da ananggu kau nggepi pahàmu-nja hiana la umamu, nadu ba maimanya nàhu la lodu bokulu. Wuanja yiada da atamu hamanai nyungga, Ndautu, angu hàmumu, nggàra bia paràka pawua-mu,” wàmi, wànanja.

⁹Ba datàka-ka la Kàramilu, da tau papalewa-na i Ndautu, hi da-patàka-nya na liina i Ndautu lai Nambàlu, hàla patiangu-danyaka.

¹⁰Tàka nahema i Nambàlu, “I Ndautu? Nggamuya nu? Nggamuya nu na anana i Ihai? Ndedi ku-handàkangu nyungga parongu-ya na rukuna nyuna! La malamiri-na la rehi nàhu dangu tau ata mapalai welingu la mirina la tana yiana!

¹¹Nggiki hama peku-naka ba kupiti-ha da roti dàngu da wai pa-unungu-nggu hamanai da tolungu papayemanggunja da tau ma-nggutingu lai nyungga, tàka hàla hi kuwua-nja da tau panda pi hàmunggu jàka nggi ngia paweli-da!” wàna.

¹²Da tau papalewa-na i Ndautu beli-danyaka duda lai Ndautu, hi da-palundu hàlanya da panii - paniina i Nambàlu.

¹³“Borunja da hapanda-mi la banggimi haàtu - haàtu!” wàna-madua-ka ba na-wuangu lii pareta-na i Ndautu. Manyamalu nunju-madua-danyaka na lii pareta-na i Ndautu paraï da tau la wawana. Nyunai duna i Ndautu boru-mananya na hapanda-na la bànggina; ka hadangu-madua-danyaka ràkangu tau 400-ya, tàka na ma-ndàdiku padaiha da malanja-da tau 200-ya.

¹⁴Ba talànga tunaka nu ninguka haàtu tau la umana i Nambàlu mapanii-nya i Ambinggaïlu, papaha-na i Nambàlu: “Murongu-ka ràmbu? I Ndautu na-paràhangu ba tau mapira-ha da papalewa-na la maràda telangu la pa-patàka-nya na tambina la mirima, tàka nyuna natola pa-iraku-maaha.

¹⁵Làti duna lalu mbana hàmuha lai nyuma, nda da-handàkangu-ma pa-kuhiku-kama, dàngu ndedi handàkangu-ma paningu ma-mbulangu ngga - nggàra kandai angu ngiangu-ma la maràda telangu.

¹⁶Rudungu lodu da-kahiri-kama kandai pawangu-ma mbimbi kamàmbi la lihida nyuda.

¹⁷Jia ba tuna, padiha-nyawa na rukuna nuna, dàngu kau kàtahu-ya jàka nggikina wàmuka nu nyumu ràmbu. Nadu ba jiangu-maka duda nàmunja la patungu hiluda hanggangu la mirima dàngu mbuu ndàbana na kuru umana. Na mirima lalu tongguru katiku-ya hi nda peku wànda-ndanya la pa-pabanjarungu!” wàdanya.

¹⁸Hàla manyamalu-madua-nanyaka i Ambinggaïlu hi napiti dua ngahu roti, dàngu dàmbu kanai manulangu pa-paihi pinu wai angguru, lima ngiu mbimbi pa-handarangu, hakambulu pihu kilu kanguta uhu nggàndumu pa-handarangu, hangahu ranggu wua angguru màdu dàngu dua ngahu kanguta kapilitu. Mbuu ndàbada na-pakàlatu-nja la kalandai - kalandai-na.

¹⁹Hàla panii-nanjaka da papalewa-na, “Laku mangilu nyimi, napa ku-ndàkikai-ka,” wànanja. Tàka nda napeka-anya ngga - nggàra na leina.

²⁰I Ambinggaïlu na-kaliti-ya na kalandai-na, tàka ba natàka-ka la ma-pabikungu la karaha palindi, pa-tàbuku-danyaka dàngu i Ndautu dàngu tau la wawana ba talànga kamburungu hanggangu-da la tubana nyuna.

²¹La rehinu talànga kanandingu pàkuna i Ndautu, “Kahewa-maana nyungga ba ku-tanara-ha da mangu tau la maràda telangu! Wàngu panda ningu ndoku hawutu ma-mbulangu da manguna, tàka nàhu na hàmunggu na-himbalu wànya ma-akatu bia!

²²Mili àru i Ala ka na-pameti-ka,[68] jàka nda ku-pameti mbutaha da mini da maninja lai nu ba ndedi nahunga na lodu!” wàna.

²³I Ambinggaïlu ba naita-yaka i Ndautu, puru parenggangu-nanyaka welingu la kalandaina hi na-maràbaku la wihina i Ndautu,

²⁴hi napanii dànya, “Miringgu, màla àru kau patingi-ngga! Màta bia na njala nuna ka kutanggu mehanya nyungga!

²⁵Àmbu pangàda-dunya miri jàka jiaya i Nambàlu na manda palingu! Nyuna tau ndubaya,[69] hama tu-mana na linguna na tamuna jàka haleli-ya. Nyungga nda kuita-aha duku da tau papalewa-mu.

²⁶I Ala nahiri-nggauka la patungu hilu la muhu - muhu-muka. Tàka nàhu miringgu, parongu-na i MIRI na maluri, nyungga ku-harangu, màla àru na urana mbuu ndàbana na muhu-muka dàngu nggamu biaya na ma-patikingu pa-hanggàmaru-kau miri, ka nahama-nya na urana i Nambàlu.

²⁷Nggepi àruha yiada da pawotu pangàndi-nggu ndumamu nyumu miri dàngu da tau la wawamu.

²⁸Jàma àrunya na pahawa-nggu nyungga atamu. I MIRI jiangu-maka duna ba natukau hanganji nyumu miri lupa da wàla wuamu la Ihirailu, nadu nyumu ba pabera-munya ndumana i MIRI; dàngu napa nyumu miri ndau tuu-a manjala[70] la lodu luri-muka.

²⁹Jàka era ningu haàtu tau ma-kangaburu-kau dàngu na ma-kamangu pa-pameti-kau, jiangu-maka duna i MIRI Ala ba na-katindi-kau hama tuna na banda ba namangga-nya paraïna mamangu-nya. Tàka da muhumu miri, napa na-ndainga pamarau - rauha paraïna i MIRI, ba natuku wànja kapitu.

³⁰I MIRI napa na-palundu hàlanya na paràndi-nanggau nyumu miri, dàngu nda namandai-apa miri ba natukau hanganji la Ihirailu.

³¹La rehina nuna-duka miri napa bau namuya nyumu ba nda jia pameti-amu tau dàngu nda ningu lata dàngu ba ndau rata wikiya la pa-hakimu, hi lupa ndau handuka eti dàngu hi ndau halaera-nya. Tàka jàka na-pakanyuru-kauka paraïna i MIRI, àmbu mbula-dungga nyungga yia atamu, miri,” wànanya.

³²Ka panii-nanyaka i Ndautu lai nyuna, “Pa-wotungu-ya i MIRI, Ala Ihirailu, na ma-palewa-kau la pa-hàmburu-ka la lodu nàhu!

³³Pa-wotungu-ya na manggàna-mu dàngu pa-wotungu-kau nyumu wiki, nadu bau hàndaka la palaku-nya na pameti tau dàngu la pawàngu wiki pa-hakimu.

³⁴I MIRI-ka na mahànda-ka patuu ma-akatu lai nyumu. Parongu-na i MIRI, Ala Ihirailu na maluri, làti jàka ndau luma rengga pa-hàmburu-ka, jiangu-maka duda mbuu ndàbada da tau la wawana i Nambàlu, ba mbàda mbuta-daka pameti ba nahunga na lodu!” hi wànanya.

³⁵Hàlaka nu i Ndautu hi nakeiha jàka nggàraha da pangàndi-na i Ambinggaïlu ndumana nyuna, ka panii-nanyaka lai nyuna, “Beliwa la umamu dàngu àmbu na-kadiku-du na etimu. Na pakarai-mu ku-patutu-nyaka,” wànanya.

³⁶Ba nabeli-ka i Ambinggaïlu lai Nambàlu, ita-nanyaka ba ningu remi bokulu la umana, hama tuna na remi maràmba. Ka ba maükunanya dàngu ba hawola-nanya i Nambàlu, ka nda na-paihi-manyapa duna paraïna papaha-na lundu hadangu harii.

³⁷La mbaruna, ba nda nahili maüku-pa i Nambàlu, peka-nanyaka paraïna papaha-na rukuda mbuu ndàbada nuda da manda hàmu làti. Nu ka nggàna-nanyaka hidu habàna, ba nakamàndalu-maduaka daa na puhuna, hi na-kaliparu mbuu ndàbana na ihina.

³⁸Ràkangu hakambulu loduna ma-làpahu hili tunanyai hidu habàna i Nambàlu welingu lai MIRI, ka lupa meti wàngu-nanyaka.

³⁹Ba narongu-ka i Ndautu ba mbàda meti-naka i Nambàlu, panii-nanyaka, “Pawotunguya i MIRI! Ba Nyunaka na matunya himbalu-na na paakangu-na i Nambàlu hanggangu lai nyungga, dàngu hi nahiri-ngga nyungga atana la patuya na ma-akatu. I MIRI-maka duna na mambàda hukunya i Nambàlu paraï ruku akatu-na,” hi wàna. Tunaka nu i Ndautu palewa-nanyaka wunangu lai Ambinggaïlu la pakarai-ya ka napaha-ya nyuna.

⁴⁰Ka tàka-danyaka da papalewa-na i Ndautu la kawini nuna la Kàramilu, hi dapanii-nya, “Nyuma papalewana i Ndautu-kama la pa-patàka-nggau lii lai nyumu ràmbu, nyuna ba orangu-nanya papiti-kau tu papaha-na,” wàdanya.

⁴¹Ka hadangu-nanyaka i Ambinggaïlu hi na-patika dàngu hi napanii, “Nyungga yia atana i Ndautu-maka, nyungga duku wai rehingu-manggunya la pabaha-ha da wihida ba hapajia-ha da atana,” hi wàna.

⁴²Tunaka nu kamo - momatu parenggangu-nanyaka. Na-kaliti la kalandai-na hi tau malima-ha da atana kawini da ma-karia-nya; ka laku-nanyaka ba na-tundunja da tau pa-palewa-na i Ndautu; ka tu-nanyaka papaha-na paraïna i Ndautu.

⁴³Ba ndedipa nuna, nyuna i Ndautu mbàda kanoma-nanyaka i Ahinuamu welingu la Yihireyilu, tàka nàhu i Ambinggaïlu tu-mbuna-nyaka papaha-na.

⁴⁴Ba talànga tunaka nu, i Haulu mbàda pa-mangoma-nanyaka i Mikàlu, anana kawini lai Pàluti anana i Layihu la paraingu Nggalimu.