Read Kambera 1 HAMUILU 26 Bible Online

1 HAMUILU 26 - Kambera bible

1 HAMUILU 26

¹La hau na lodu da tau Hipu damai lai Haulu la Nggimbia, dapanii-nya ba kapàndi-nanya i Ndautu la Palindi Hakila, la halinggi maràda telangu Yahunda.

²Ka manyamalu hadangu-madua-nanyaka i Haulu hi nalaku karia-nja da tau 3.000, da panjuri marihi hàmu la Ihirailu, da-hanggangu la maràda telangu Hipu pahimbu-ya i Ndautu.

³I Haulu na-pamaüngu la hingi ànda la lihi Palindi Hakila. I Ndautu na maninya la maràda telangu, narongu-maka ba namatu-nanya nyuna paraïna i Haulu lundu la maràda telangu.

⁴Ka paràhangu-nanyaka tau matanggu kuki, nu ka pi hàmu-nanyaka ba ninyaka i Haulu lai nu.

⁵Ka manyamalu-madua-nanyaka i Ndautu palua la ngia pamaü-na i Haulu lai nu ita-nanyaka na ngia pa-katuda-na i Haulu lihi-mada na pangia-na i Àpuneru anana i Neru. Na maüna i Haulu daa-maya la padua dehi, tàka da tanatara-na da-pamaü winggiru-nya.

⁶Tunaka nu i Ndautu na-paàra-nya i Ahimeliku tau Heti, dàngu i Ambihai anguna paluhu i Yuàpu (na inada jiaya i Haruya), “Nggamu matoru mbeni patama karia-ngga la maüna i Haulu?” wànanja. Nahema i Ambihai, “Nyungga!” hi wàna.

⁷La rudungu nuna i Ndautu dàngu i Ambihai tama kangunduhu-danyaka la ngia pa-pamaüngu, hi daita-ya i Haulu ba katuda-na-padua-ka daa la padua dehi ngia pa-pamaüngu, na nimbuna tinjangu-na-padua la tana la lihi katiku-na. I Àpuneru dàngu da pambana katuda winggiru-madanya i Haulu.

⁸Ka panii-nanyaka i Ambihai lai Ndautu, “I Ala napuli-nyaka na muhumu lai nyumu la rudungu nàhu. Pahia-ngga ka ku-kanditiku-nya na nimbu wikina la ihina paràpangu la tana ku-handàka-anya ba ku-pameti-ya, nggàra hi pandua-nya!” wàna.

⁹Tàka nahema i Ndautu, “Àmbu nggi - nggiki-dumunya! I MIRI jiangu-ma duna ba nahuku-nya na tau na matunya ma-akatu na hanganji na papindi-na.

¹⁰Parongu-na i MIRI na maluri, kupi-manya ba i MIRI wikima duna napa na ma-pameti-ya i Haulu, jàka jia-yaka na rehina, jàka ndia na-hanggàmaru la ngia pa-kangaburungu.

¹¹Mili àru i MIRI ka na-pabeta-ngga la pa-pameti-ya na hanganji na papindi-na! Piti biaya na nimbuna dàngu na kadihi-na, ka talaku!” hi wàna.

¹²Ka piti-nanyaka paraïna i Ndautu na nimbu dàngu na kadihi-na i Haulu welingu la tuba katiku-na i Haulu, hi dalaku. Nda ana haàtu-a maita-ya nuna, jàka ndia mapinya na mambàda dedi, jàka ndiambui na ma-pawàla, nadu ba i MIRI-maka na maowa-ha mbuu ndàbada hi da-katuda minjalu tuda nu.

¹³Ka pala-nanyaka i Ndautu la karaha lolangu la hapapa hi lupa natàka la pinu palindi, ka marau-nanyaka welingu la ngia pa-pamaüngu-na i Haulu.

¹⁴Tunaka nu warangu-nanyaka i Ndautu lai Àpuneru dàngu tanatara-na i Haulu, “Ha Àpuneru! Murongu-duya na lii-nggu?” wànanya. Ka wara-mananyai duna i Àpuneru, “Ha ngga pàkukau dumu mala - ladamu hiana?” wàna.

¹⁵Nahema i Ndautu, “Ha Àpuneru, ka nda jiakau nyumu naa ma-kanjupu hawiru la Ihirailu? Nggikina nyumu hi ndau mangga bianya na mirimu, i Tamu Umbu hanganji? Bidi-maana ni ba ningu tau matama la maümu la pa-pameti-ya làti na mirimu.

¹⁶Ndau duluku-a nyumu pa-palaku-ya na wai ngeramu, Àpuneru! Parongu-na i MIRI na maluri, nyimi mbuu ndàbami tau maràka pameti-maakai, nadu ba ndai mangganya na mirimi, na hanganji papindi-na i MIRI. Kamangu pa-tàngaru hiana! Nggiyaka na nimbuna na hanganji? Nggiyaka na kadihi na maninya la tuba katiku-na kawai?” wàna.

¹⁷I Haulu natanda-ya na talia nggoruna i Ndautu, hi na-paàrangu, “Ha Ndautu, jiakau nyumu naa, ananggu?” hi wàna. Nahema i Ndautu, “Ou miri,” hi wàna.

¹⁸Ka hili paàrangu-nanyaka, “Nggikina miri hiu nutakungu pakeha-ngga? Nggàraya na njalanggu?

¹⁹Miri, patingi-nya na paniinggu. Jàka i MIRI na ma-paràha-nggau miri la papapa-ngga nyungga, heua kameti maraku wadaru-mananya na hànggana hanggangu lai nyungga. Tàka jàka era tau ma-paràha-nggau nyumu miri, mili àru i MIRI ka naràtu-nja! Nadu na ruku pawunda-da nyuda, pawàngga-kaka nyungga welingu la tana manguna i MIRI dàngu hi lupa kulaku-maaka bàdi la hau tana, la ngia palumu-nja da marapu hangàdangu.

²⁰Àmbu màta-dungga pameti la tana tau, marau welingu lai MIRI. Nggàra lingu-naka na hanganji Ihirailu ba namai la pa-pameti-ya na heu ana wutu hama tuna nyungga yia? Nggàra lingu-naka ba nakeha-ngga nyungga ba hama tuna na tau na ma-kehangu manu tata?” wàna.

²¹Ka hema-nanyaka i Haulu, “Njala-manggu-nyaka. Beliwa Ndautu, dou na ananggu duku! Nda kuhilu tuu-anggaupa ma-akatu, nadu nyumu bau pa-mbàlaru-ngga eti la paluri ni kamodu. Manduba langatàka-ya na huri luringgu. Kamburangu langata - tàka-manggu-nyaka!” wàna.

²²Tàka nahema i Ndautu, “Yiana-yaka na nimbumu miri, paràhangu hiana haàtu panjuri ka namai papiti-ya.

²³I MIRI napa napakanyuru-maya duna na tau na ma-tuturu dàngu na matànji. Nadu jiapa ka na-pulinggau-kadu nyumu i MIRI la lodu nàhu lai nyungga, ba tuna nda kubihu-a duku patuu ma-akatu hanggangu lai nyumu miri, hanganji papindi-na i MIRI.

²⁴Jia ba tuna, hama tuna ba kuaï-ya na lurimu nyumu miri la lodu nàhu, ka tuu àru-nangga nu i MIRI ba namangga-ngga dàngu ba na-pahàla-ka welingu la mbuu ndàbana na ma-akatu!” hi wàna.

²⁵Ka panii-nanyaka i Haulu lai Ndautu, “I MIRI na-pakanyuru-kau, dou na ananggu duku! Nyumu napa nalingu hàla na paraï rukumu!” wànanya. Ka pangala-nanyaka na àndana i Ndautu, tàka i Haulu-mbu beli-nanyaka la umana.