Read Kambera 1 HAMUILU 27 Bible Online

1 HAMUILU 27 - Kambera bible

1 HAMUILU 27

¹I Ndautu na-pangàda-nya la etina, “Jiapa nda nggikina napa la hau lodu jiangu-maka duku ba na-pameti-ka i Haulu. Jia ba tuna, nda ningu-apa nyungga hili hau àndanggu, hinggilu-na jàka kupalai la tana Pilitingu. Jàka tuna nu i Haulu nda nahimbu-akapa la Ihirailu, tàka nyungga maranggunyaka,” wàna.

²Ka lu laku-nanyaka i Ndautu dàngu ba tau nomu ngahuha da tau la wawana ba dalua lai Akihu anana i Muaha, maràmba la paraingu Nggàta.

³Ka engangu-nanyaka la Nggàta dàngu da tau la wawana, maràngga kariangu-mada kuru umada. I Ndautu na-karia-nja da papaha-na ba dadua, nu i Ahinuamu na kawini Yihireyilu, dàngu i Ambinggaïlu, na pameti wàruna i Nambàlu, na kawini Kàramilu.

⁴Ba narongu-ka i Haulu ba napalai-ka la Nggàta i Ndautu, nda nahili panua-anyapa la payàpa-ya.

⁵Hàla i Ndautu hi natunya kareuku i Akihu, “Umbu jàka unamu-maduka wua biangga làti hau paraingu kudu la mahudi ka ku-ngiangu ningu, ka àmbu ma-paariyaa ningu pàku lai nyumu yiahu la parai puhu pareta,” wànanya.

⁶Ka wua-nanyaka i Ndautu na paraingu Hikulàku paraïna i Akihu, tuna nuduka hi manguda da hanganji Yahunda-ya na Hikulàku lundu nàhu.

⁷I Ndautu na-ndàdiku la tana Pilitingu hau ndaungu patu mbua wulana.

⁸Ba namandai tuna nu i Ndautu dàngu da tau la wawana dakàli lua pa-kangaburu-ya na tau Nggehuru, na tau Nggirihu dàngu tau Amaliku; da banjaru nuda mandai ngiangu-madaka duda la ngabana lai nu. Nyuna na-kangaburu-ya na tana lai nu hama marau-na la Huru, dàngu na pangalangu-mbu la Mehiru.

⁹Nyuna na-pameti mbutaha da tau mini da tau kawini, dàngu naramba-nja da mbimbi, hapi, kalandai, ota, lupa da paki-mbuda. Tunaka nu beli-nanyaka hi nalua pa-hurungu lai Akihu.

¹⁰Jàka na-paàrangu i Akihu lai nyuna, “Nggi-makai-ka nu milaku ningu pa-kangaburungu la rehi nàhu?” jàka wànanya. Nanapa-ya i Ndautu, hu wawa-maka la luru Yahunda jàka ndia la ngaba tau Yerameyilu jàka ndia la ngaba ngia pa-ngiangu-da da tau Keni.

¹¹Nu la ngaba ngia pa-kangaburu-da nda ningu haàtu pabili-da maluri, ka àmbu ningu ndoku haàtu malua papeka la Nggàta, jàka nggàra ula pàkuna i Ndautu dàngu da tau la wawana. Tuna nu na pahada ngàndina i Ndautu kandai ngiangu-na la tana Pilitingu.

¹²Ba tuna i Akihu nawai-maya napanii-na i Ndautu, tàka na-pakanandi-na la etina, “Lalu mbana karaü-danya eti paraï angu banjaru wikina ka lupa nda na-màtangu-apa ba ata lupa-nggunya hi lundu njàpu lurina,” wàna.