Read Kambera 1 HAMUILU 28 Bible Online

1 HAMUILU 28 - Kambera bible

1 HAMUILU 28

¹Pi - pirana na rehi malamiri na tau Pilitingu pauhi-nanyaka na tanatara-na la pa-kangaburu-ya na Ihirailu, tàka i Akihu hi napanii-nya i Ndautu, “Mupi-manyaka duna nyumu dàngu da tau la wawamu ba mitama-duka bàdi la pabera la ngabanggu nyungga,” wànanya.

²Nahema i Ndautu, “Jia-duya, napa Tamu Umbu kau tàngaru-ka jàka nggàra ulanggu nyungga atamu ndumamu nyumu,” wàna. Hàla i Akihu hi napanii, “Hàmu! Nyungga kuwotu-kau panjadi matanggu mangga mànungga nyungga,” wànanya.

³I Hamuilu nameti-ka dàngu hi nahiinya tau la nggubulu Ihirailu dàngu hi datani-nya la Rama, na paraingu wikina. Pi - pirana na rehi na ma-làpahu mbàda wàngga hàla-nanjaka welingu la Ihirailu mbuu ndàbana na tau manyura dàngu tau ma-katangu muru da makàli paruungu wàndi.

⁴Nu ba na-pauhi-ka na tanatara Pilitingu dàngu ba dawulu maüda la lihi paraingu Hunimu, i Haulu pauhi-mananyai duna na tau Ihirailu, tàka hi da-pamaüngu la Palindi Nggilimbua.

⁵Ba naita-haka i Haulu da tanatara Pilitingu, mangàdatu nda ukuya.

⁶Ka karai-nanyaka panaungu lai MIRI, tàka i MIRI nda nahema-ya, ka la manggadipangu-kai, hamanai ba nawàngu Urimu dàngu Tumimu jàka ndiakai ba nawàngu la ngaru wunangu ba hapajia-ha.

⁷Jia-duyaka hi napanii i Haulu la matanggu daiya nyuna ba hapajia-ha, “Himbunda haàtu kawini manyura ma-paruungu wàndi, napa kulua lai nyuna pakarai panaungu,” wàna. Dahema nyuda, “La Eni-Ndòru ningu tau manyura tungu nu,” hi wàdanya.

⁸Hàla ka panjàda-nanyaka wikina i Haulu ka àmbu natanda-ya tau. Dàngu tau madua-ha da mini da ma-karia-nya, laku-danyaka; ka tàka-nanyaka la umana na tau manyura nu la rudungu. Hi napanii i Haulu, “Paau àrunya na wàndina na tau na papeku-nggu tamuna tiangu, dàngu kau karaiya ka nanyura-ya jàka nggàraya napa na matumbu,” wànanya.

⁹Nahema na tau kawini, “Ha umbu bau pi-madunya, na Hanganji Haulu ba nawàngga hàla-haka welingu la Ihirailu mbuu ndàbada da tau manyura dàngu da mapingu muru da ma-paruungu wàndi.[71] Nggikina hi mukama-ngga la pa-hanggàmaru-ka hi lupa pameti-ka?” hi wàna.

¹⁰Ka harangu-nanyaka i Haulu, “Parongu-na i MIRI na maluri, ku-paràndingu nyumu ba nda pahuku-anggau, paraï ruku wunda-munya nuna,” hi wànanya.

¹¹Na-paàrangu na tau kawini, “Nggamu wàndi-naka bàdi na paparuu-nggunggau, umbu?” wàna. Nahema i Haulu, “Na wàndina i Hamuilu,” wàna.

¹²Na kawini nuna ba naita-yaka i Hamuilu, kaladaku-nanyaka hi napanii lai Haulu, “Ka ni miri hiu panyonga-ka? Ba nyumu-maduka na Hanganji Haulu!” hi wànanya.

¹³Nahema na hanganji, “Àmbu mangàdatu! Panii biaya jàka nggàraya na paita-mu!” wànanya. Nahema na kawini, “Kuita-ya na wàndi na ma-mumuku welingu la tana,” hi wàna.

¹⁴Na-paàrangu i Haulu, “Nggikina na hadana?” wàna. Napaya na kawini, “Haàtu-na na tau mini na ma-kaweda. Na-mumuku ba dàngu hauna kalembi bokulu,” wànanya. Ka pi-nanyaka i Haulu ba jiaya i Hamuilu, ka patika-nanyaka ba na-maraku-nya.

¹⁵Hàlaka nu ka panii-nanyaka i Hamuilu lai Haulu: “Nggikina hi mu-nggumangga? Nggikina hi mupaau belingga?” wàna. Nahema i Haulu, “Lalu mbana mbingu-ngguka ba na-pakangaburu na tau Pilitingu, tàka i Ala na-dunjaku-nggaka. Nyungga nda nahili hema-akapa, ka mali la ngara wunangu-kai, ka la manggadipangu-kai ndiambu. Jia-duyaka hi ku-kamahi-nggau nyumu ama, ka napeka-ngga jàka nggikina wànggu-aka bàdi, ka wànggunya wànggu-nggau,” wàna.

¹⁶Nanapa-ya i Hamuilu, “Nggàra lingu-naipa bau paaungga nyungga, ba dunjaku-madua-nanggauka, dàngu bau muhu-mbudu-nyaka Nyuna?

¹⁷I MIRI mbàda wunda-nanyaka duna hama tuna ba mbàda wànanggau la ngarunggu nyungga. I MIRI mbàda piti-nanyaka na pa-hanganji wàngu la Ihirailu welingu lai nyumu tàka hi na-pakata-nya lai Ndautu.

¹⁸Mbàda lawa-munyaka nyumu na pareta-na i MIRI, ba ndau pamolu-nya na tau Amaliku dàngu mbuu ndàbada da bandada. Jia-duyaka nàhu hi tunanggau nu i MIRI.

¹⁹Nyumu dàngu na tau Ihirailu-ka napa napuli-nggai la tau Pilitingu. Haromu nyumu dàngu da anamu pauhi dàmi-nggaka nyungga; màlamai nggubulu ndàbana na tanatara Ihirailu-mbu napa napuli-nya paraïna i MIRI la tau Pilitingu,” wànanya.

²⁰La mbàdiku-na nunama, i Haulu ba na-hanggubalu hi na-tawàlahu la tana hama tuna panggàna kabàla-ya, nadu ba lalu katàtaku halawàla-na ba narongu-ya na paniina i Hamuilu. Màlambui ba na-malijangu hàla na ihina, paraï ba nda nangangu ndoku ngga - nggàra hau lodu hau rudungu.

²¹Nyuna na kawini manyura nalua lihinya i Haulu hi napanii dànya, “Miringgu, nyungga kumburi-maka ba kuwunda-ya hama tuna na-pakarai-mu.

²²Jia ba tuna, muora-nya bàdi hama tuna na pakarai-nggui duku nyungga, mungangu bàdi hawutu pangangu pa-paloku-nggunggau, ka peku halangatu-mu napa bau pangala-nya na àndamu,” wànanya.

²³Na-pandia-ya paraïna i Haulu, ba nda nabihu pangangu. Tàka ba dahàni-yaka paraï da panggawi-na, pajia-nanyaka. Ka hadangu-nanyaka welingu la tana hi na uhuku la kaheli.

²⁴Manyamalu-nanyaka na tau kawini narupu-ya na heu na ana hapi mbokana tàka hi napiti kanguta hi na-haüru-nya, hàla hi na-pandoi roti panda tungu muru.

²⁵Hàlaka nu paloku-nanyaka pangangu ndumana i Haulu dàngu da tau karia-na, ka ngangu-danyaka. Tunaka nu laku-danyaka la rudungu numa.