Read Kambera 1 HAMUILU 29 Bible Online

1 HAMUILU 29 - Kambera bible

1 HAMUILU 29

¹Da tau Pilitingu da-pauhi-nya mbuu ndàbana na tanatara-na la Apiku, tàka da tau Ihirailu da-pamaüngu la lihi mata wai la Lolangu Yihireyilu.

²Da maràmba Pilitingu da malima-da da-ndàharu ngàndiha da pajurunguda ba hapamba - hapamba-da, ninja da ma-hangahu-da, ninja da ma-harata-da; i Ndautu dàngu tau la wawana, da-pajurungu la kajia ba da-pakariangu na maràmba Akihu.

³Ba daita-haka paraï da ngora pabera tau Pilitingu paàrangu-danyaka, “Nida da tau Imbarani nggikina hi ninja lai ni?” wàda. Nahema i Akihu, “Jiaya i Ndautu, na panggawi-na i Haulu làti la Ihirailu. Mandai-maki-naka ba ninya lai nyungga. Kandai tàkana lai nyungga, ndedi ningu pahunggu-nggu pa-hanjàliru-na,” wàna.

⁴Tàka ba hapajia-ha da ngora pabera Pilitingu dambeni-nya i Akihu, hi dapanii-nya, “Paràha-nya na tau nuna ka nabeli la paraingu pambàda wua-munya. Nda peku-ana ba na-pabera dànda nyuta, nda tapi - pinya napa hi nakei lamaku ba talànga pa-kangaburungu. Ka nda rehi mahàmu-ya ndumana nyuna wàmi ka nambuha belinya paraïna hanganji-na ba nawàngu pa-pameti-ha da tanatara-nda nyuta?

⁵Hi jiaya i Ndautu ni wàngguka? Jiaya nyuna-maka napalaa-da da kawini ba darenja wàngu lududa, ‘I Haulu na-pameti-ka muhu diha rata, tàka i Ndautu na-pameti-ka diha kambulu rata,’ ba wàda,” wàda.

⁶Ka paau-nanyaka i Ndautu paraïna i Akihu hi napanii dànya, “Kuwai-makau nyumu, parongu-na i MIRI na maluri, bau tuturu lai nyungga. Nahàmu na etinggu bau karaha-ka la pa-kangaburungu yiana. Nadu ba kandai tàkamu lai nyungga, ndedima kuhunggu-nggau njalamu. Tàka yiada da maràmba hawiangu nda dambuha-nggau nyumu.

⁷Jia ba tuna beli dàngu hàmungu-wa dàngu àmbu nggàradu ulamu na mawuda-ya na ma-karaü la etida nyuda,” wànanya.

⁸Nahema i Ndautu, “Nggàra njala-yaka na pambàda wundanggu, Tamu Umbu? Hama tuna ba wàmu, ndau hunggu-angga nyumu njalanggu ngga - nggàra, piti welingu ba kawunga pakiringu-nggu la pa-lumungu lai nyumu lundu nàhu, nggikina hi nda pa-pahia-ngga nyungga la pa-pabera dànggau nyumu palawa-nya na muhumu?” wàna.

⁹Nahema i Akihu, “Bau pi-madungga nyumu tau tuturu-ya ba wànggu-nggau, ba hama tuna papalewa Alakau. Tàka ba hapajia-ha da ngora pabera mbàda bota-danyaka, ba nda pekuna nyumu la pa-tundungu pa-pabera dànggama nyuma.

¹⁰Jiaya nu hi Ndautu, haromu nyimi mbuu ndàbami mambàda dunjaku-nya i Haulu, ma-pamaingu lai nyungga, mihada mbarungu-maka bàdi kai laku parenggangu ba nahunga na lodu,” hi wàna.

¹¹Jia-duyaka nu hadangu harii la mba - mbaru, hadangu-nanyaka i Ndautu dàngu tau la wawana hi dabeli la tana Pilitingu, da tanatara Pilitingu laku-danyaka la Yihireyilu.