Read Kambera 1 HAMUILU 30 Bible Online

1 HAMUILU 30 - Kambera bible

1 HAMUILU 30

¹Palàngangu-ka dàmbu lodu, i Ndautu dàngu tau la wawana, beli-danyaka la paraingu Hikulàku. Ba datàka-ka lai nu, toma-danyaka ba mbàda maidaka da tau Amaliku pa-kangaburu la mbara luruna na tana Yahunda dàngu da-kangaburu-mbuyaka la Hikulàku. Nda ningua haàtu tau pa-pameti-da. Tàka datunu pambuta-yaka na paraingu, dàngu hi da-pangala-nya na àndada ba da-karia-nja da kawini, da anakeda dàngu da tau hawiangu da ma-ngiangu lai nu. Da-tanawa-mbunja da kuru umana i Ndautu dàngu da kuru umada da tau la wawana, jiambu-duhaka da papaha-na i Ndautu ba dadua, i Ahinuamu dàngu i Ambinggaïlu. I Ndautu dàngu da tau la wawana lalu handuka-ha, hi lupa dahii pa-nuangu lundu dirada.

⁶Da tau la wawana i Ndautu lalu mbana handuka-da, nadu ba jia mbulangu bia-daka da anada da papaha-da. Hi lupa da-patikingu-mbuka la patuku wànya watu i Ndautu. Jia ba tuna hunggu-mana-nyaka ma-kalutu bokulu i Ndautu, ba tuna na etina pamàndu-nanya-padua paraïna i MIRI Alana.

⁷Hàla i Ndautu hi napanii-nya i Àpuyataru anana i Ahimeliku, “Ngàndiya nàmu na eputu!” wànanya. Ka ngàndi-nanyaka na eputu i Àpuyataru lai nyuna.

⁸Tunaka nu paàrangu-nanyaka i Ndautu lai MIRI, “Ku-yaulu-haka bàdi da tau ma-pakangaburu? Pekuna nu ba tomanja nyuda?” wàna. Nahema i MIRI, “Wua, yaulu-ha nyuna, napa mutoma-manja duda hiu pahàla beliha da ma-tanawangu ba hapajia-ha,” wàna.

⁹Ka hadangu-nanyaka i Ndautu hi da-kariangu hàla da tau nomu ngahu la wawana. Ba datàka-ka la Luku Mbehuru, laku pangalangu-nanyaka i Ndautu dàngu da kariana da tau patu ngahu, tàka da madua ngahuda ndàdiku-danyaka lai nu, ba lalu mbana mànggilu-daka dàngu nda damàka-mbupa papala-ya na Luku Mbehuru.

¹¹Nu la àndada da tau la wawana i Ndautu datoma-nya na haàtu na anakeda mini Mehiru la maràda, ka karia-danyaka lai Ndautu. Hi dawua-nya pangangu pa-ngunungu,

¹²dàngu dawua-mbunya kanguta wua kapilitu, dàngu hi dua rangguda da angguru màdu. Ba nangangu-ka nu, hayandalu beli-nanyaka; hàla pi-danyaka ba mbàda tailu mbua lodu-naka la panda ngangu la panda ngunungu!

¹³Hàlaka i Ndautu hi na-paàra-nya, “Nggamuya na mirimu dàngu nggi welimu?” wànanya. Nahema na anakeda, “Nyungga tau Mehiru-ka, atana na haàtu na tau Amaliku. Nyungga na-dunjaku-mangga na miringgu la tailu modu-manaka, ba hidu-nggunya.

¹⁴Nyuma mbàda kangaburu-manyaka la ngaba tau Kareti la mbara luru Yahunda dàngu la ngaba biliku Kalipu, dàngu matunu hàla-yaka na paraingu Hikulàku,” wàna.

¹⁵Hàla i Ndautu hi na-paàra-nya, “Màla ubihu nu kau karia-ngga la pangia-da da juru ma-pakangaburu?” wànanya. Nahema na anakeda, “Kubihu, mili kau pa-ràndingu la tamuna i Ala, ba ndau pameti-ka jàka ndia ba ndau pabeli-ngga la miringgu,” wàna.

¹⁶Ka karia-nanjaka la pangia-da da juru ma-pakangaburu. La rehi nuna da juru ma-pakangaburu hau iha - hau ihada la nggubulu pa-ngiangu lai nu, ngangu-danya ngunungu-danya nadu ba mbabu pa-remingu-danya, ba dadangu-duka da malanja paramba-da, pangàndi welingu la tana Pilitingu dàngu Yahunda.

¹⁷Ba na-pabarahu-ka hadangu harii, kangaburu-nanjaka paraïna i Ndautu, nu ba da-paràkapu, pa-ngalangu-madanya lundu rudungu-na. Hinggilu-da da bidi mini da mapalai ba tau patu ngahuha da ma-kaliti ota, nda hili ningu haàtu muhu ma-tamàhiku.

¹⁸I Ndautu na-ngalangu pa-pahàla ndàbaha da paramba-da da tau Amaliku, hi jiaha da papaha-na ba dadua;

¹⁹nda ningu ana hawutu ma-maromba. Mbuu ndàbada da anakeda mini dàngu kawini hamanai mbuu ndàbada da malanja paramba-da da pambàda pitida da tau Amaliku, napiti beli hàla-maha paraïna i Ndautu.

²⁰La perada nuda i Ndautu nawàhi-mbuha mbuu ndàbada da mbimbi dàngu da banda hawiangu. Da banda nuda daweli-nja paraï da tau la wawana i Ndautu la mangilu,[72] da pa-manggawa-nja welingu la malanja pa-rambangu hawiangu, na paniida, “Yiada yia ndumana i Ndautu-ha!” wàda.

²¹Hàlaka nu beli-nanyaka i Ndautu la pangia-da da tau dua ngahu da malalu mànggilu-da la pakiku-nya nyuna, dàngu da pamàta-da la hingi Luku Mbehuru. Nyuda da-tàbuku-ya i Ndautu dàngu tau la wawana, tàka i Ndautu hi nalihi-nja ba napulu danja.

²²Tàka la hongada da tau la wawana i Ndautu da malaku karia pangala-nya ningu ma-akatu dàngu ma-manganga etina. Dapanii, “Da tau da manda kikungu, nda ningua hàkuda nyuda la pa-ngalangu ngga - nggàra welingu la malanja pa-rambangu. Nyuda jiaha da anada da papaha-ada da papiti-da, ka dalaku,” wàda.

²³Tàka nahema i Ndautu, “Angu dedinggu, àmbi timi nudu, ngerada jàka nggàraha da pawua-nanda i MIRI! Ka nda Nyuna na ma-katindi-ta tàka hi nawua-nda patalu wàngu la pajuru tau rambangu?

²⁴Jia ba tuna àmbu ningudu haàtu maora-nya na kareuku pa-jakaru-da! Mbuu ndàbana na-kawàra ngalangu bàdi ndumana ma-pahama dangu: na tau na ma-ndàdiku padai malanja màta ka na-pahama dàngu na pangala-na na tau na ma-ndàharungu pa-pabera,” wàna.

²⁵La malamiri na rukuna nuna jia-madua-yaka na patuna kalaratu i Ndautu, na pawàna na tau Ihirailu lundu nàhu.

²⁶Ba nabeli-ka i Ndautu la Hikulàku, pangàndi-nanjaka hawiangu da malanja la liku uruda da paraingu Yahunda ba hapajia-ha da mawai angunya, “Yiada pawotu lai nyimiha welingu la malanja pa-rambangu la lima muhuna i MIRI,” wànanja.

²⁷Da paraingu nuda jia-duhaka da paraingu: Mbetilu dàngu Rama la mbara luru Yahunda, Yatiru, Arowiru, Hipumutu, Etimua, Rakalu, dàngumbu da paraingu tau Yerameyilu, da paraingu tau Keni, Hòruma, Mbòru-Ahàngu, Ataku dàngu Hemburungu. Mbuu ndàbada da paraingu ngia pa-njadangu-na i Ndautu dàngu tau la wawana, na-pangàndi-nja pawotu-da.