Read Kambera 1 HAMUILU 31 Bible Online

1 HAMUILU 31 - Kambera bible

1 HAMUILU 31

¹Ba talànga tunaka nu da tau Pilitingu pa-kangaburu-danyaka dàngu tau Ihirailu la ma-palindingu la Nggilimbua. Dadangu da tau Ihirailu mameti lai nu, tàka hawiangu dapalai, jia-mbuha i Haulu dàngu da anana dapalai.

²Ba tuna dandutu-maha paraï tau Pilitingu, tàka da anana i Haulu da tau madua haàtu pa-pameti-haka, nu i Yunatàngu, i Ambinandapu dàngu i Màlikihua.

³Ma-mbàringu ailulu-ya na pa-kangaburu la weli winggiru-na i Haulu, dàngu nanggàna-mbuyaka nyuna panada da muhu hi lupa na-manua mandàkangu.

⁴Ka panii-nanyaka i Haulu na bidi mini na mangàndi-nya madàka-na, “Butuhu-ya na hapanda-mu kau hunjuka, ka àmbu pekuna ba da-hayidi wàngga la pa-pameti-ka paraï da tau da manda tandaya i MIRI,” wàna. Tàka na bidi mini nuna nda natoru mbeni pahunju-ya, nadu ba lalu tembi-nanya. Jia-duyaka i Haulu hi na-butuhu-maaya na hapanda wikina hi na-panggubu-nya na hupu dàka hapanda-na.

⁵Ba naita-yaka metina i Haulu paraïna bidi mini, panggubu-mana-nyaika duna la hupu dàka hapanda-na hi lupa nameti la karaha-na i Haulu.

⁶Tuna nuduka i Haulu angu da anana da madua haàtu, dàngu mbuu ndàbada da tau la wawana, lupa na bidi mini ba dameti parànja kahau lodungu.

⁷Ba darongu-ka da tau Ihirailu da ma-ngiangu la hapapa Lolangu Yihireyilu dàngu la pahunga lodu Luku Yorundangu ba mbàda palai-daka da tanatara Ihirailu, dàngu ba mbàda meti-daka i Haulu dàngu da anana, ka palai wàru-danjaka da paraingu-da. La malamiri ka mandapu-danjaka paraï tau Pilitingu nuda da paraingu.

⁸Hadangu harii ba damaika da tau Pilitingu pa-mangengga-nja da mameti, hunggu-danjaka i Haulu dàngu da anana da madua haàtu ba mbàda meti-daka la palindi Nggilimbua.

⁹Da-katiku-ya na katiku-na i Haulu tàka hi daàli-nja da kalembi pabera-na, ka palewa-danyaka tau da tau Pilitingu la nggubulu tana Pilitingu pa-pangàndi-nja langu hàmu la rayatu dàngu la marapu-da.

¹⁰Tunaka nu na kalembi pabera-na i Haulu hi da-pahàmu-ya la uma marapu kawini-da na Ahitoritu, tàka na kayumbu-na hi dapaku-ya la kangeli paraingu Mbetu-Hiangu.

¹¹Tàka ba darongu-ka da tau mangia-nya na Yambihu la Nggiliatu ba tudanya nu tau Pilitingu i Haulu,

¹²ka hadangu-danyaka da tau da marihi kaborangu welingu lai nu hi dalaku maru - rudungu la Mbetu-Hiangu. Da-papuru-nya na metina i Haulu dàngu da metida da anana welingu la kangeli paraingu, hi dangàndi-ha la Yambihu, hi datunu-ha.

¹³Mbuu ndàbada da rinada da-pauhi-nja hi datani-nja la lumbu ai tamarihuka la paraingu nuna, hàla hi da-puaha pihu mbua lodu mandai-na.