Read Kambera 1 HAMUILU 4 Bible Online

1 HAMUILU 4 - Kambera bible

1 HAMUILU 4

¹La rehina nuna na tau Pilitingu wari hàla-nanyaka na pamba tanatara-na la pa-kangaburu-ya na Ihirailu; jia-duyaka[12] na pamba tanatara Ihirailu hi na-ndàharungu la ngia pa-pabera; nyuda da maü la Embinu Haehiru, tàka da tanatara Pilitingu damaü la Apiku.

²Da tanatara Pilitingu hadangu-danyaka patungu; tàka ba na-mbàringu-ka na pa-kangaburu-da kàku-danyaka da tanatara Ihirailu, dàngu ràkangu tau 4.000-ya na mameti la ngia pa-kangaburungu.

³Ba dabeli-ka da rihida da tanatara da makàku la ngia pamaü, panii-danyaka ba hapajia-ha da liku uru Ihirailu, “Nggikina ihu i MIRI hi napuli bianda pakàku la tau Pilitingu la lodu nàhu? Màla ka talua papiti-ya na Pàti Pa-ràndingu-na i MIRI la Hilu ka tangàndi-ya lai yiahu, ka peku ndulananda i MIRI[13] dàngu ka na-pamara-ta welingu la papanda,” wàda.

⁴Ka palewa-danyaka tau la Hilu la papiti-ya na Pàti Pa-ràndingu-na i MIRI ba beri jiaya na kanjàka-na i MIRI Mahupu-mbihaya. Da anana i Eli ba dadua, i Hòpuni dàngu i Pineha, dalaku karia-nya na Pàti Pa-ràndingu.

⁵Ba natàka-ka na Pàti Pa-ràndingu la ngia pamaü, kayaka-nanyaka na tau Ihirailu, dira pa-hàdirungu-ha hi lupa na-tandidu na tana.

⁶Na tau Pilitingu narongu-mbuya nuna na kayaka hi dapanii, “Nggikida ihu da tau Imbarani hi dakaya - yaka?” wàda. Tàka ba dapi-nyaka ba natàka-ka na Pàti Pa-ràndingu la ngia pamaü-na na tau Imbarani,

⁷mangàdatu-danyaka, hi dapanii, “Ningu marapu matàka la ngia pamaü-da nyuda! Uradu-ndanyaka! Ndedi ta-handàkangu paera-nya na ma-hamangu tungu nu!

⁸Ura langatàka-yaka! Nggamu-aka ma-pamara-ta welingu la marapu - marapu ma-kapàru tungu nu? Ka nda jiaha da marapu nudamai da mambàda pameti-ha da tau Mehiru la maràda wara àmangu?

⁹Patoru-nya nyuna na etimu ha tau Pilitingu! Pa-kangaburu nyuna jàka mini-dukai, jàka ndia, napa naata-nggaika tau Imbarani, hama tuna àmangu bai atanja nyuda. Jia ba tuna pa-kangaburu nyuna bai wàngu pambeni borangu!” wàda.

¹⁰Tunaka nu pabera-danyaka da tau Pilitingu ba dawàngu pa-mbàringu, hi datalu-ya na tanatara Ihirailu. Na tau Ihirailu palai-nanyaka la maüna haàtu - haàtu. Manda najaru-ya na pakàku wàda; tau 30.000-ya na tanatara Ihirailu na ma-yàmihu.

¹¹Na Pàti Pa-ràndingu-na i Ala nawàhi-yaka muhu Ihirailu, dàngu da anana i Eli ba dadua, dameti-ka.

¹²Na haàtu na tau Mbanyamingu napalai la Hilu welingu la ngia pa-kangaburungu hi natàka memangu-ma la lodu nu. Na tanda handuka-na, naba - bàriku-ha da pakina dàngu natunya tana na katiku-na.

¹³I Eli na mambana bàrangu-ya na etina la pa-kanandi-nya na marana na Pàti Pa-ràndingu-na i MIRI, mandapu-na-padua la kanjàka la hingi ànda, dàngu bitina. Ba na-bobaru-yaka na ruku kàkuna na tau Ihirailu paraïna nuna na tau, nggubulu-na na ma-ngiangu la paraingu kaladaku-nanyaka ba na-padudurungu na tau.

¹⁴Ba narongu-ka i Eli ma-padudurungu, paàrangu-nanyaka: “Nggàra kariwatu-ya nu?” wàna. Talànga tunaka nu nuna na tau kawai palai-nanyaka lai Eli, ba natàka-ka, wàlahu-nanyaka nuna na lii manda hàmu.

¹⁵Nyuna i Eli mbàda hiwa kambulu walu-naka na ndaungu lurina dàngu natika papoki-amaka.

¹⁶Na tau nuna napanii-nya i Eli, “Nyungga la lodu nàhu palai-nggunya welingu la ngia pa-kangaburungu dàngu hinama-a nu kutàka,” wàna. I Eli na-paàra-nya, “Ka màla nu na lii, ananggu?” wànanya.

¹⁷Nahema na mangàndi lii, “Napalai-ka na tau Ihirailu welingu la tau Pilitingu. Bokulu ailulu na pakàku wàngu na pa-hambeta-nda. Dangu tau mameti, da ana-mbumu ba dadua, i Hòpuni dàngu i Pineha, dameti-mbuka. Tàka na Pàti Pa-ràndingu-na i Ala nawàhi-yaka muhu!” wàna.

¹⁸Ba napanii-yaka paraïna tau nuna na rukuna na Pàti Pa-ràndingu, kanabu tawàlahu-madua-nanyaka i Eli welingu la kanjàka-na la tuba pindu bokulu. Padàkangu kaweda-mana-nyaka màlai na panjànji-na, ba na-kanabu-ka nu nambata na nggoruna, ka meti-nanyaka. Nyuna patu kambulu ndau-naka ba na-kapipi-ya na tau Ihirailu.

¹⁹La rehina nu, na rii anana i Eli, na papaha-na i Pineha, pakambu mbotu-mana-nyaka mareni habola-naka. Ba narongu-kiyaka ba mbàda wàhi-nanyaka muhu na Pàti Pa-ràndingu-na i Ala, dàngu ba nameti-ka na ama yenuna hamanai na leina, hi jia pàdangu biana pa-katiu habola, ndedi nggi tuna mandaina ka habola madua-nanyaka.

²⁰Ba mareni meti-ama-naka, da kawini da ma-patika-ya dapanii-nya, “Patoru-nya! Na anamu anakeda miniya!” wàdanya. Ba tuna nda nahema-ahapa dàngu nda na-tàngaru-mbuhapa.

²¹Na anakeda nuna natunya tamuna Ikambutu[14] wànanya, hi napanii, “Na tanda ba ninya i Ala Ma-mangarangu na-mbulangu-ka welingu la Ihirailu,” wàna, na pawuku-na jiaya na Pàti Pa-ràndingu-duka ba pawàhi-yaka dàngu na ama yenuna hamanai na leina ba meti-danyaka. Jia-duyaka hi napanii, “Na tandana ba ninya i Ala Ma-mangarangu na-mbulangu-ka welingu la Ihirailu, nadu na Pàti Pa-ràndingu-na i Ala ba pawàhi-yaka,” wàna.