Read Kambera 1 HAMUILU 5 Bible Online

1 HAMUILU 5 - Kambera bible

1 HAMUILU 5

¹Ba nawàhi-yaka tau Pilitingu na Pàti Pa-ràndingu-na i Ala, ngàndi-danyaka welingu la Embinu Haehiru la paraingu-da la Àndutu.

²Lai nu tama ngàndi-danyaka na pàti la uma marapu-da na Ndanggungu, dàngu hi da-bànjalu-ya la karaha kahala hadana nuna na marapu.

³Ba na-hadangu-ka la mba - mbaru na tau mangia-nya la Àndutu, mai-danyaka la uma marapu, daita-ya na kahala hadana na Ndanggungu, nanjoru pa-nggubulungu-ka la tana, la hangga Pàti Pa-ràndingu-na i MIRI! Dadanda-nya nuna na kahala hada hi datu beliya la pangia-na.

⁴Tàka hadangu harii la mba - mbaru, daita-ya na kahala hada ba mbàda hilu njoru-naika la hangga Pàti Pa-ràndingu. La rehina nu na katiku-na dàngu da limana ba dua mbunguda da-tambukalu-ka dàngu hi lua bia-haka la lata pindu; jiaya na kayumbu juaki-anaka na mamàtu. (

⁵Jia-duyaka na pakiri-na, lundu nàhu da ratu marapu Ndanggungu, dàngu mbuu ndàbana na ma-maraku-nya la Àndutu dawàngu pa-pànggatu-ya na lata pindu umana na Ndanggungu, nda daliti-aya.)

⁶Tunaka nu i MIRI nahuku-nya na tau mangia-nya la Àndutu dàngu la ngaba winggiru-na ba dawàngu papongu hàla nàhu da ihida[15]

⁷Ba daita-yaka na matuna nu la ihida, panii-danyaka, “Na Ala Ihirailu nahuku-ndaka nyuta dàngu na marapu-nda na Ndanggungu, àmbu tamàta-dunyapa pahilu pangia mandaingu lai yiahu,” wàda.

⁸Jia-duyaka hi dadunda-nja da malima maràmba Pilitingu la pa-pauhi, hàla hi da-paàrangu, “Na Pàti Pa-ràndingu-na i Ala Ihirailu Nggiki-ndanyaka bàdi?” wàda. Dahema da maràmba, “Paleli-nyawa la paraingu Nggàta,” wàda. Jia-duyaka, hi da-paleli-nya na Pàti Pa-ràndingu la paraingu Nggàta, na hili hau paraingu Pilitingu.

⁹Tàka ba natàka-ka na Pàti lai nu, i MIRI hilu huku-mananyai nuna na paraingu, nu ka tumbu-nanyaka na pa-kanyaüru wàngu na manda najaru. Na mangia-nya na paraingu nuna, ka bidi tauya ka ma-kaweda-yakai nahuku wànja hidu pongu nàhu na matumbu la ihida.

¹⁰Hàla nuna na Pàti Pa-ràndingu hi dalaku ngàndiya la Ekurungu, na hili hau paraingu Pilitingu. Ba natàka-ka na Pàti lai nu, kabàtingu-ma-adanya da mangia-nya na paraingu, “Na Pàti Pa-ràndingu-na i Ala Ihirailu hi ngàndiya yiahu ka pameti-kama nyumaka?” wàda.

¹¹Jia-duyaka hi dapaau ndàbanja da maràmba Pilitingu la pa-pauhi, hàla panii-danyaka, “Pabeli-nya na Pàti Pa-ràndingu-na i Ala Ihirailu la pangia memana, ka àmbu na-pameti-ta nyuta dàngu kuru umanda,” wàda. La nggubulu-na na paraingu tumbu-nanyaka na pariu raüngu, nadu i Ala ba huku pambotu-duna-nyaka na tau na mangia-nya.

¹²Na tauka na manda meti, na tuniya hidu pongu jia-duyaka na mangia-nya na paraingu hi da-warangu la marapu ba dakarai pa-ndulangu.