Read Kambera 1 HAMUILU 6 Bible Online

1 HAMUILU 6 - Kambera bible

1 HAMUILU 6

¹Ba mbàda pihu mbua wula-naka la Pilitingu na Pàti Pa-ràndingu-na i MIRI,

²da tau Pilitingu da paaunja da ratu dàngu da tau manyura, hi da-paàra-nja, “Na Pàti Pa-ràndingu-na i Ala nggiki-ndanyaka bàdi? Jàka ta-pabeli-nya la pangia-na, nggikina wànaka bàdi na hurina?” wàdanja.

³Dahema nyuda, “Na Pàti Pa-ràndingu-na i Ala Ihirailu àmbi jia pabeli tu bia-minya nu, tàka màta kai pa-karia-nya maraku pa-palohu wàminja da njalami. Ba timi nu napa nyimi na-pamàlaru-kai, dàngu napa nyimi mipinya jàka nggikina hi na-panua - nuangu la pahuku-nggai paraïna Ala Ihirailu,” wàda.

⁴“Ka nggàraka bàdi pa-palohu wàngu pa-wuangu-ya,” hi wàda ba da-paàrangu da tau. Dahema da ratu, “Lima pongu àmahu rara dàngu lima kalaü àmahu rara, pa-jàngapu-nja na danguda da maràmba Pilitingu. Màla nda tunanggai pongu dàngu kalaü na ma-handauni-kai nyimi mbuu ndàbami ka rayatu-ya ka maràmba-ya-kai?

⁵Jia ba tuna, màtawa kai pandoi pahama-nja da pongu dàngu da kalaü da mabohu mbana eti la tanami. Ba wàngu patimi nu, wua-minya hunggu maraku-duka na Ala Ihirailu. Talànga wanguna napa na-pànjangu-ma duna pahuku-nggai nyimi, dàngu da marapu-mi hamanai na tanami.

⁶Nggàra lingu-naka bai pa-malihu-ha da katiku-mi hama tuna na hanganji dàngu na tau Mehiru àmangu. Àmbi maromba-dunya jàka nggikina ba na-pajulu wànja, hi lupa da-manjaria dàngu hi da-pahia-nja da tau Ihirailu pa-dunjaku-nya la Mehiru.

⁷Jia-duya nu pa-yemangu-wa hau kareta bidi dàngu dua ngiu hapi ma-pahuhu, da pandedi handàkangu ndoku pawàngu la payila kareta. Pakàna-nja nu da hapi la kareta, dàngu welinja da anada ka dabeli la okada.

⁸Tunaka nu pitiya na Pàti Pa-ràndingu-na i MIRI, wotuya dita la kareta, dàngu ka bànjalu-ya la karaha-na na kàpu kanaida da banda àmahu rara da pa-maraku wàminya, na pa-palohu wàminja da njalami. Màta-njaka na kareta dàngu da hapi ka dalaku wikida.

⁹Panau-maya na lakuda; jàka dangàndi hangganya la tana wikina na Pàti Pa-ràndingu, nu la paraingu Mbetu-Hemihu, nuna tanda-dunaka ba na Ala tau Ihirailu-maka na mambàda patàka-nya na ura pàda ma-mbàringu lai nyuta. Tàka nuna na kareta jàka nda na-hanggangu bia lai nàhu, napa pinda-nyaka nuna na handuka ba nda ma-pawelingu lai Ala Ihirailu-aya, tàka ma-talànga tàka-aya duna,” wàdaka.

¹⁰Na-patundungu na tau; dapiti-ha da hapi ba dua ngiuda ba talànga pahuhu-da, hàla hi da-pakàna-nja la kareta, tàka da anada hi dapàtu-ha la oka.

¹¹Hàla nuna na Pàti Pa-ràndingu hi dawotu-ya la kareta, dàngumbu na kàpu kanaida da kalaü àmahu rara dàngu da pongu àmahu rara.

¹²Nuda da hapi laku pangalangu-ma-adanya hanggangu la Mbetu-Hemihu, da banda nuda da-kamua dàngu laku pangalangu-da; nda da-hiliru la kalai jàka ndia la kawana welingu la ànda bokulu. Da maràmba Pilitingu tau malima ndutu pangala-madanja lundu tàka la padira Mbetu-Hemihu.

¹³La rehi nu na mangia-nya la Mbetu-Hemihu talànga mutina uhu nggàndumu la lolangu. Ba daita-yaka na Pàti Pa-ràndingu, nggaüru-danyaka ba dalua pa-tàbuku-ya.

¹⁴Na kareta na-ndàdiku la lihi hau watu bokulu la wokana i Yuhua, tau ma-ngiangu la Mbetu-Hemihu. Na tau mangia-nya la paraingu nuna dabera - beraha da ai kareta, hàla hi darupu-ha nuda da hapi dua ngiu ka tunya kameti maraku patunu i MIRI.

¹⁵Tunaka nu da tau Lewi hi da-papuru-nya na Pàti Pa-ràndingu-na i MIRI dàngu na kàpu kanaida da banda àmahu rara, hàla hi da-bànjalu-ya la pinu watu bokulu. Hàlaka nu na mangia-nya la Mbetu-Hemihu hi dangàndi kameti maraku patunu dàngu kameti maraku hawiangu lai MIRI.

¹⁶Ba daita hàla-yaka nuna paraï da maràmba Pilitingu tau malima, beli-danyaka la Ekurungu la lodu nunama.

¹⁷Ba wàngu patuna nuka na tau Pilitingu mbàda pangàndi-danyaka i MIRI maraku pa-palohu wàngu njala ndumana na tauka na mangia-nja da paraingu lima mbua da pa-pareta-da da maràmba Pilitingu tau malima. Da paraingu nuda jia-duhaka: la Àndutu, Nggaha, Àhakelungu, Nggàta dàngu Ekurungu. La hongada ningu maningu tindingu, ningu mandia. Hau parai - hau paraingu na-pangàndingu hau pongu àmahu rara dàngu heu kalaü àmahu rara. Na mbuti rukuna nuna na matumbu jia-duyaka na watu bokulu na ngia pa-bànjalu-danya na Pàti Pa-ràndingu-na i MIRI. Lundu nàhu na watu nuna ni-manyapa la wokana i Yuhua, tau Mbetu-Hemihu.

¹⁹Tàka rukuna ba dangadu da tau Mbetu-Hemihu daa la Pàti Pa-ràndingu-na i MIRI, pihu kambulu-ya na tau pa-pameti-na i MIRI. Ka hawina-nanyaka na rayatu rukuna ba na-patàka-nja ringu langu manda najaru paraïna i MIRI.

²⁰Ka panii-nanyaka na ma-ngiangu la Mbetu-Hemihu, “Nggamu-aka matara la hanggana i MIRI, na Ala Matua? Nggiaka bàdi talua patu niya na Pàti ka namarau welingu lai nyuta?” wàdaka.

²¹Hàla hi da-palewa-nya tau na tau mangia-nya la Kiriyàtu-Yiaarimu na mangàndi lii langu matuna yia, “Na tau Pilitingu na-pabeli-nyaka na Pàti Pa-ràndingu-na i MIRI. Maiwa nu nyimi papiti-ya kai ngàndiya la pangia-mi,” wàda.