Read Kambera 1 HAMUILU 7 Bible Online

1 HAMUILU 7 - Kambera bible

1 HAMUILU 7

¹Na tau ma-ngiangu la Kiriyàtu-Yiaarimu dalua papiti-ya na Pàti Pa-ràndingu-na i MIRI hi dangàndi-ya la umana na tau na ma-tamungu Ambinandapu, na uma nuna ditaya la pinu tandula. Tunaka nu hi da-katua-ya i Eliahàru, anana i Ambinandapu, la padaiya nuna na Pàti Pa-ràndingu.

²Mandai-madu na Pàti Pa-ràndingu-na i MIRI ba ninya la Kiriyàtu-Yiaarimu, ràkangu dua kambulu ndauna. Ba mandai tuna nu nggubulu-na na banjaru Ihirailu na-warangu lai MIRI ba nakarai pa-ndulangu.

³Ka panii-nanyaka i Hamuilu la banjaru Ihirailu, “Ka mabeli lai MIRI jàka wàmi dàngu kai lumu weli etinya, miwàru-nja bàdi mbuu ndàbada da marapu hangàdangu dàngu da kahala hada Ahitoritu. Huharu ailulungu wikimi lai MIRI kai lumunya Nyuna-a, napa nyimi na-pahàla-kai welingu la tau Pilitingu,” wànanja.

⁴Jia-duyaka da tau Ihirailu hi dawàru-nja da kahala hada marapu Mbaàlu dàngu Ahitoritu, hàla hi dalumu-nya i MIRI-a.

⁵Hàlaka nu panii-nanyaka i Hamuilu, “Pauhi hàlanya na banjaru Ihirailu la Mihipa, napa nyungga ka ku-hamayangu lai MIRI ndumami nyimi,” wànanja.

⁶Ka pauhi-danyaka mbuu ndàbada la Mihipa. Dataku wai hi daburi-ya ka pa-maraku wàdanya i MIRI-ya, hàlaka nu puaha-danyaka hau lodu pa-tumbukungu. Na paniida, “Njala-mama-nyaka lai MIRI,” wàda. (La Mihipa pakiringu-nanyaka i Hamuilu patimba-nya palakara-na na tau Ihirailu na maningu pahilitu-da.)

⁷Ba narongu-ka na tau Pilitingu ba pauhi-nanya na tau Ihirailu la Mihipa, hadangu-madua-danyaka da maràmba tau malima lai nàhu ba da-kariangu tanatara-da la pa-kangaburu-ya na tau Ihirailu. Ba darongu-yaka nuna da tau Ihirailu, mangàdatu-danyaka.

⁸Dapanii dànya i Hamuilu, “Àmbu pànjangu-du pa-hamayangu lai MIRI Alanda, ka na-pamara-ta welingu la tau Pilitingu,” wàdanya.

⁹Jia-duyaka i Hamuilu hi narupu heu ana kamboka mbimbi, hi nawotu-ya ka kameti maraku patunu-ya lai MIRI. Hàlaka nu hamayangu-nanyaka ka nandula-ya na tau Ihirailu paraïna i MIRI, tàka hi kataku-ya na hamayangu-na.

¹⁰Ba talànga wotu-nanya na kameti maraku patunu i Hamuilu, pakiringu-nanyaka patungu na tau Pilitingu; tàka hi jia pàkuyai duna i MIRI ba na-kangguruku-nja nyuda welingu la awangu. Ka riu raü-danyaka hi dapalai hora.

¹¹Ka luhu-nanyaka na tanatara Ihirailu welingu la Mihipa hi dakeha-nya na tau Pilitingu lupa mareni tàka la Mbetu-Kàru, hi da pa-làjaru-ha lai nu.

¹²Hàlaka nu i Hamuilu hi na-pandumuru-ya na hau na watu la padira Mihipa dàngu Hengu. Napanii, “I MIRI nandula palundu-manda,” wàna — hàla hi natunya tamuna nuna na watu “Watu Pa-ndulangu,” wànanya.

¹³Nuya ba pakàku-ya na tau Pilitingu. I MIRI nda nahili pahia-anjapa da tau Pilitingu la patama-nya na tana ngaba Ihirailu, ba talànga luri-napa i Hamuilu.

¹⁴Mbuu ndàbada da paraingu Ihirailu da pambàda panyàku-da da tau Pilitingu, piti welingu la Ekurungu lupa la Nggàta, pabeli hàla-njaka la Ihirailu. Jia-duya na Ihirailu nangala beli hàla-njaka da tana ngabana. Na tau Ihirailu dàngu tau Amori-mbu daluri dàngu hàmu-daka.

¹⁵I Hamuilu na-pareta-ya na Ihirailu lundu njàpu lurina.

¹⁶Nimbihu ndaungu ba na-hàlatu winggiru-nya la Mbetilu, la Ngginggalu, dàngu la Mihipa. Lai nu la hau pangia - hau pangiangu na-palànyapu-ya na palakara-na na tau na ma-pahilitu.

¹⁷Naingu-mana jàka nahàla-ka nu beli-mananya la umana la Rama. Lai nuya nyuna ba nanjadi hakimu la tau Ihirailu dàngu ba na-pahadangu ngia pawotu maraku ndumana i MIRI.