Read Kambera 1 HAMUILU 8 Bible Online

1 HAMUILU 8 - Kambera bible

1 HAMUILU 8

¹Ba nalua-yaka pa-kaweda i Hamuilu, wotu-nanjaka da anana la panjadi hakimu la Ihirailu.

²Na kawunga anana i Yoilu-ya na tamuna, dàngu na padua wàna i Ambia-ya na tamuna. Nyuda danjadi hakimu la Mbiruhemba.

³Tàka nyuda nda dakiku-anya na hurina na amada, ba tuna kehangu-danya kangeha wiki-maada. Nyuda dakei li hambeli dàngu dahuku-nya na rayatu la manda pa-deningu.

⁴Kirina nuna-duka mbuu ndàbada da liku uru la Ihirailu hi da-pauhi, hàla hi da-hurungu lai Hamuilu la Rama,

⁵hi dapanii dànya, “Rongu-kama ama, nyumu kaweda-munyaka tàka da anamu nda dakiku-nya na hurimu nyumu. Jia-duya nahàmu-pa nu ama kau wotu-nggama haàtu hanganji, ka ningui duma hanganji-ma hama tuna da banjaru hawiangu,” wàdanya.

⁶Tàka i Hamuilu nda nahàmu wànya na etina ba da-jakaru-nya nuna. Hàla hi na-hamayangu lai MIRI,

⁷tàka i MIRI hi napanii, “Pa-jàngapu bianya na pakarai-na na banjaru lai nyumu. Nadu ba nda jiakau nyumua pajukaru-da, tàka Nyungga duku. Nyuda nda dahili mbuha-anggapa Nyungga ba hanganji-dangga.

⁸Piti welingu ba ku-karia-nja paluhu welingu la Mehiru, da-taliuru-manggaka hi dalumu-nja da marapu, jàka nggikina wàdanggau nyumu nàhu, mbàda tudangga numaka Nyungga.

⁹Jia ba tuna pa-jàngapu bianya na pakarai-da; na nyuna panamu haha langata - tàka-manja, dàngu kau palara-nja tiangu jàka nggi - nggiki-nanja paraïna hanganji,” wàna.

¹⁰Mbuu ndàbana na puluna i MIRI na-palundu hàla-manya paraïna i Hamuilu lai nyuda da makarai hanganji lai nyuna, napanii-nja:

¹¹“Yiana-yaka napa jàka nggi - nggiki-nanggai na hanganji-mi,” wàna. Nuya i Hamuilu ba na-palara-nja. “Napa nyuna na-pambana-ha da anami patama tanatara; hawiangu mapamba la njara dàngu hawiangu natuha mapamba la wihi.

¹²Hawiangu nawotu-ha pa-parawira tau 1.000, dàngu hawiangu tau lima kambulu. Nuna na hanganji napa na-pambana-ha da anami la pa-kabànda-nya wokana, la pa-pauhi-nya ihi wokana, la pa-pandoi-nya madàka-na dàngu pakakahu la kareta pabera-na.

¹³Da anami kawini napa na-paràha-nja pa-pandoi-nya nyuna mina mbii kati dàngu la paràma matanggu manahu-nya pangangu dàngu matanggu pandoi-nya roti.

¹⁴Napa napiti-ha da wokami, da woka angguru-mi, dàngu da woka haitungu-mi da marihi hàmu halawàla hi nawua-nja da panggawi-na nyuna.

¹⁵Da wokami dàngu da woka angguru-mi napa na panggànanja hilu katiku-da, na pa-hakambulu wàda da ihina, hàla hi nawua-nja da parawira-na dàngu da panggawi-na nyuna.

¹⁶Napa napiti-ha da atami, da banda[16] mi, da marihi hàmu halawàla dàngu da kalandai-mi hi nawànja la paràma-na.

¹⁷Da pa-hakambulu wàda welingu la kabàba mbimbi kamàmbi-mi napa napiti-ha ndumana nyuna. Dàngu jiapa nyimi wiki napa natukai atana.

¹⁸Jàka natoma-ka na rehi nuna, napa nyimi pangodungu-minyaka paraï rukuna na hanganji na papindi-mi, tàka i MIRI nda nabihu parongu-ya na pangodungumi,” wànanja.

¹⁹Tàka na banjaru nuna nda dabihu-a pa-wàrihu-ya na papanii-na i Hamuilu, tàka hi dapanii, “Màlawa nyuna! Jiapa nda nggikina rinjungu-mama-nyaka paningu hanganjingu.

²⁰Nyuma rinjungu-mama-nyaka la pahama-nya na banjaru hawiangu, na hanganji-ma na-pareta-du-kama bàdi dàngu ka na-kapipi-kama la pabera,” wàda.

²¹Hàla ba narongu hàla-yaka paraïna i Hamuilu mbuu ndàbana na papanii-da nyuda, hi na-palundu hàlanya lai MIRI.

²²Nahema i MIRI, “Kiku bianya na pambuha-da nyuda dàngu wotunja haàtu hanganji ndumada nyuda,” wàna. Tunaka nu i Hamuilu paràha-nanyaka na tau Ihirailu pabeli la umada haàtu - haàtu.