Read Kambera 1 HAMUILU 9 Bible Online

1 HAMUILU 9 - Kambera bible

1 HAMUILU 9

¹Ninya na haàtu na tau wulu na pa-mahumbarungu welingu la kabihu Mbanyamingu, na tamuna Kihiya. Nyuna angu biliku Mbekuhoràtu-ya, na kahanga-na na uma Apia. Na amana Ambialu-ya tàka na bokuna Heruru-ya.

²I Kihi ningu anana mini, Haulu-ya na tamuna, nyuna bidi mini hakapu kapànduku-ya. La nggubulu Ihirailu nda hili ningu haàtu marihi-nya nyuna la pa-hakapu. Najangga na tauna, pamenja-nya na janggana dàngu na tau Ihirailu-ka natoma hupu kundu-ana.

³La hau na lodu ba nda pira ngiuda da kalandai-na i Kihi da ma-maromba. Jia ba tuna i Kihi napanii-nya i Haulu, “Kariangu haàtu papalewa, kai laku pahimbu-ha nuda da kalandai,” wànanya.

⁴Ka laku-nanyaka i Haulu dàngu na papalewa-na ba danjada-nya la ngaba ma-palindingu la Epuraïmu dàngu la tana Haliha, tàka nda dahunggu-aha. Tunaka nu laku pangalangu-danyaka la tana Hahalimu, tàka nuda da kalandai nda nimbunja lai nu. Dahimbu-mbuha la ngaba Mbanyamingu, tàka kahewa-ana.

⁵Ba datàka-ka la tana Hupu, i Haulu napanii-nya na papalewa-na, “Màla biawa ka tabeli, napa i ama nabiti karia-ndapa nyuta welingu nuda da kalandai,” wànanya.

⁶Nahema na papalewa, “Napa pàku! La paraingu yiana ninya na haàtu na tauna i Ala. Nyuna nda uku tembi hàla-nanya tau, nadu jàka nggàra wàna nyuna ba na-padeningu langatàka mànuma. Màla ka talua lai nyuna, napa hi napi-anja jàka nggiha nuda da kalandai,” wàna.

⁷Napaya i Haulu, “Ka ni jàka talua tomaya nyuna, nggàraka bàdi pawua-ndanya? Da bàla pangàndi-anda njàpu-danyaka, dàngu nyuta nda nggàra maningu-nda ka tawua-nya nuna na tauna i Ala, màla ndia?” wàna.

⁸Nahema na papalewa, “Talànga ni pàkunya lai nyungga ba hauna na àmahu bara. Nuna napa ka kuwua-nya na tauna i Ala, ka peku orangu-na papeka-nda jàka nggiha nuda da kalandai,” wàna.

⁹“Hàmudu!” wànaka i Haulu. “Màla-ndawa ka talua,” hi wàna. Ka laku-danyaka la paraingu, la pangia-na na tauna i Ala. Ba da-katekalu-ka la palindi na ma-hanggangu nu la paraingu, hàmburu-danjaka ba mapira-ha da bidi kawini da malua pataku wai la humuru. Hi da-paàra-nja nuda da bidi kawini, “Màla na ma-manyura ninya la paraingu?” wàda. (La rehi nu na haàtu wunangu, ma-manyura, wàdanya, jia jàka ningu ma-mbuhangu pa-paàrangu ngga - nggàra lai Ala, “Màla ka talua la ma-manyura,” wàda.)

¹²“Wua, ninya,” wàda da bidi kawini, “bidi nàhu-maanya ba nalaku mangilu-nggai nyimi. Jàka mi-parenggangu, talànga wanguna mitoma-nya. Bidi maina la paraingu, nadu la lodu nàhu dita la ngia pawotu maraku la pinu tandula ngàndi-danya kameti maraku ndumana na rayatu. Da tau pa-dundangu ndedi jia ngangu-ada jàka ndedi natàka nyuna, nadu ba na-pakanyuru-dunyapa bàdi na kameti. Jàka milua nàhu, mitoma-manyapa ba ndedi natàka la pinu tandula la pangangu,” wàdanja.

¹⁴Ka laku-danyaka i Haulu dàngu papalewa-na la paraingu, dàngu ka matama-wa la pindu bokulu ba wàda, pa-tàbuku-danyaka dàngu i Hamuilu, ba talànga lakuna la ngia pa-lumungu la pinu tandula.

¹⁵Hama tuna kangeu Nyuna i MIRI mbàda puru peka-nanyaka i Hamuilu tuna yia,

¹⁶“Haromu la mbaru la rehi tuna ni, napa ku-paràha-nya na haàtu na tau welingu la kabihu Mbanyamingu pa-tàbuku-kau. Kau katua-ya bau wànya lii paminangu la panjadi hanganji-na na banjaru-nggu na Ihirailu. Nyuna napa na ma-pamara-ya na banjaru-nggu welingu la tau Pilitingu. Kuita-mayaka na ura dedina na banjaru-nggu dàngu kurongu-mayaka na kaladaku-na ba nakarai pa-ndulangu,” wànanya.

¹⁷Nu i Hamuilu ba naita-yaka i Haulu, i MIRI napanii-nya i Hamuilu, “Jia-duyaka yiana na tau ba wànggunggau. Nyunaka napa na ma-pareta-ya na banjaru-nggu,” wànanya.

¹⁸Ba talànga tunaka nu i Haulu hi nalihi-nya i Hamuilu la lihi pindu bokulu, hi na-paàra-nya, “Malangu-mu ama, nggiya ihu na umana na ma-manyura?” wàna.

¹⁹Nahema i Hamuilu, “Nyungga-maka yia ma-manyura ba wàmu. Lakuwa kai mangilu-ngga la ngia pa-lumungu la tandula, nadu la lodu nàhu nyimi napa ba nga pa-mataru dàmingga. Haromu la mbaru napa ka kuhema hàlaha da pa-paàra-mi, hàlaka nu kai mangu pabeli.

²⁰Jàka jiaha da kalandai da ma-maromba la tailu moduna, àmbi kadiku-dunja, nadu ba mbàda hunggu-danjaka. Hinggilu-nai, napa na marihi pa-wilingu la nggubulu Ihirailu pa-wuangu-kau nyumu dàngu kuru umana na amamu,”[17] wànanya.

²¹Nahema i Haulu, “Nyungga yia welinggu la kabihu Mbanyamingu, na kabihu na marihi kudu la Ihirailu, dàngu na kuru umanggu jia-mayaka na marihi nda palingu la kabihu nuna. Ka nggikina ama hi panii tumungga nu?” hi wàna.

²²Tunaka nu i Hamuilu hi nawànda-ya i Haulu dàngu papalewa-na patama daa la kuru bokulu, hi na-pamandapu-ha la mangia ngaba la hangga tau pa-dundangu, nggubulu-da ràkangu tau tailu kambulu-ha.

²³Tunaka nu i Hamuilu hi napanii-nya na tau na matanggu manahu, “Ngàndiya na tolungu kawai na pa-pahàmu ba wànggunggau,” wànanya.

²⁴Nu ka lua-nanyaka na matanggu manahu papiti-ya na tolu papindi welingu la tolu winju, hi na-bànjalu-ya la hanggana i Haulu. Napaya i Hamuilu,[18] “Yiana na tanggu pa-pahinggilu-nggunggau nyumu, kau nga pa-mataru dànja yiada da ariyaa hawiangu.[19] Màla ngangu-ndawa,” wànanya. Ka ngangu-nanyaka i Haulu. Jia la lodu nuna-maka i Haulu ba nanga pa-mataru dànya i Hamuilu.

²⁵Hàlaka nu puru-danyaka welingu la ngia pa-lumungu, hi datama la paraingu. I Haulu dawua-nya ngia pa-katuda[20] la kurungu mangia dita la uma,[21]

²⁶ka katuda-nanyaka.[22] Ba na-pabarahu-ka, i Hamuilu napaau-nya i Haulu ba ninya dita la kuru dita, “Hadangu-wa, ka kulua pa-kareni-nggau,” wànanya. Na-hadangu i Haulu hi dalaku kariangu dàngu i Hamuilu.

²⁷Ba datàka-ka la halinggi paraingu, panii-nanyaka i Hamuilu lai Haulu, “Paràha-nya na papalewa-mu ka na-mangilu-nda,” wànanya. Ka mangilu-nanyaka na papalewa; hi napanii i Hamuilu, “Ta-pànjangu hawutu yiahu, napa ba patàka-nggunggau lii welingu lai Ala lai nyumu,” wànanya.