Read Kanasi Matiu 14 Bible Online

Matiu 14 - Kanasi bible

Matiu 14

¹Erod Galili tawowa warerewaleidia walamawe Iesu ebowa debamaleidia benemawa eten, sa baiwa me nolawa apanawa diamone wanase, “Iesu ipa Ion Babatutu, mida imumba ne sorodiana tonapundeiena bo bedewe enenwisene muka wadene ginasa pokawaau dewamodio umanawa eteitana.”

³Me epe insedie, ipawa Ion wandia walamawe Erod manainapa ebowa Erodias Ion mampe nuawa kadiidalen, ipawa Ion kainokaino Erod diedie wadiase, “God emawe mai dodomana e tataa Pilip manainapa naisee nata wainilana.” Sa baiwa Erod sorodia waaubamono antone Ion wadane dibura bedewe ituiena.

⁵Erod Ion bosapona insaisawaleidie, tane me Ius apanawa saulen, ipawa mo sumanaintoia Ion ipa peroweta.

⁶Tane Erod mulena walamawa wiseno bedewe ema epe segalen: Erodias anoopa apana nisolala danauwo bialeidio Erod ewene nuawa eudidalen.

⁷Sa baiwa me i sanaa sauaidasan dima da me iririwalepia ideita wanepi.

⁸Tane i sanaa inawa diedia me insaisawa diepi, ita inawa diena rua alene Erod diene wanase, “Ne menaidanedia taumaida ema e sorodiaa waaubamowo antopue Ion Babatutu imumba topupundepi ita me uwawa laukai bedewe itupue ne neapu!”

⁹Erod aia ema etene nuaparelen, tane apana nisolala danauwo sauaidalena baiwa me sorodiawa diamona dima Erodias anoopa iririwalena ruawantopu.

¹⁰Ita Erod sorodiawa waaubamono antone dibura bedewe Ion imumba tonapundeiena.

¹¹Mo me uwawa laukai bedewe itune wadane wimone i sanaa waneiena, tane me wadene alene inawa wanen.

¹²Ita Ion wawe alala wimone etepa wadane awanene antone dobontoiena. Ema aupe mo ene antone dima segalena umanawa Iesu dieieno eten. Iesu apana 5,000 nana wanamode

¹³Tane Erod Iesu insakoasadia umanawa etene bola sa bedewe wandia ene waa asiasi meba alen sala dainalawo. Tane apana uaraia ema umanawa etane mo bolau emone Iesu wawe doa waiwainta antoiena.

¹⁴Ita Iesu doa waiwa dawo wisene waa ene nosene apana uaraia wawe wimona ewamone nuapareuidalen ita bedeuwo kerolala uduudu inamon.

¹⁵Rawi sawo wawe alala Iesu mampe wimone waienase, “Mape sala obasa, tane aitamana rawiidalena baiwa apana ema waaubamowo bola bedeuwointa antopue nanau gimarantopue napu.”

¹⁶Iesu sipoamone wanase, “Dia, mo mai antopu, e nana wanamono napu!”

¹⁷Mo leusane waienase, “No mainimbo bured 5 ita bouri nata winei, mai da, dia!”

¹⁸Ita Iesu diamone wanase, “Aitane, nana sa otene winlena ne mainawo.”

¹⁹Tane me apana uaraia diamone wanase, “Aisitane ina osowe waina.” Ita Iesu bured 5 ita bouri nata otene pisiwane uba ewene God auwasane bured ampuialene ita bouri dosane wawe alala wanamon. Ita mo nana sa wadane apana wanamoiena.

²⁰Tane mo uduudu nane pokamon. Ita wawe alala nana moawa eiena auwene posa uduudu 12 aimoieno nope wimon.

²¹Apana mona sape nana naiena wisiawa 5,000, tane ioto ita seda do nana naiena mai wisiamopona, dia. Iesu esa osowe aleide

²²Nana dialeno aupe Iesu wawe alala diamone wanase, “E waa bedewe odane nawane doa waiwa dawo aitonuno ne apana ema uaraia waaubamopo bolauwo antompo walawo wimpa.”

²³Iesu apana waaubamono antoieno aupe me raupari baiwa wadiwa odene alen. Meba wandio tadinaleidio wawe alala waa asiasi doa pouwe wimoio lanunu esa tepasane waa epaaubasadie, ipawa mo lanunu iediawo antoie.

²⁵Tane walama iwimpa bedewe Iesu esa osowainta winine wawe alala mampoleidie.

²⁶Ita mo Iesu esa osowainta iedio ewane saidantone siribabantone waienase, “Sa aleu, ba dewa dainea eweitana?”

²⁷Tane Iesu tauwadea mo mampo wane wanase, “Mai saitana, ne iedina, siribaba ena!”

²⁸Ita Pita leusane wanase, “Tatamba, naita e ebaida ne dianeawo esa osowainta manawo wimpa.”

²⁹Pita epe wano Iesu etene diene wanase, “Winea mainawo!” Ita Pita waa ene nosene esa osowainta a uwaalene Iesu mampe aleidie.

³⁰Tane me lanunu ewendewae saidalene ainsudeno esa numedio ka debama wane wanase, “Tatamba, saune inanea!”

³¹Tauwadea Iesu witapa aubene Pita wadendoe diene wanase, “E sumanaia keraulen! Bauta sumanaiten, tane dima baiwa eana?”

³²Mo nata waa bedewe odeieno lanunu dainalene dialen.

³³Tauma wawe alala waa bedewe wanwanlala Iesu wawa bumpe imimpu emmisimone wadaposisane waienase, “Ulaipa, e ipa God Otopaida!” Iesu apana kerolala bola Genesaret bedewe inamode

³⁴Iesu wawe alala do doa nawane waiwa dawo bola Genesaretiwa wimoiena.

³⁵Apana sape waimoia Iesu ewane atensaiena, sa baiwa mo bola uduudu bedewe gagalo waaubasane waienase, “Kerolala banlamone Iesu mampe winlena.”

³⁶Tane mo kerolala banlamone wimone Iesu iririsaiena me garawa moawa os wirasape inantopona. Ita kerolala uduudu mida me garawa wirasaiena inanton.