Read Kanasi Matiu 15 Bible Online

Matiu 15 - Kanasi bible

Matiu 15

¹Ema aupe Parisi ita anaana waeuwalala isiwa Ierusalemwae Iesu mampe wimone waitarasane waienase,

²“Dima baiwa e waawo alala no apanamba eiau waeuwau ampuiasaie witapu mai mitamoipe nana naipona, tane di nana nai?”

³Iesu mo wawu gagalowa waieno etene sipoamone wanase, “E epe wailana, tane ne e diaidaledina e God anaanawaida ampuiasaile eueuwa onape os dewamoile apana banlakadisamoilana. E dima baiwa epe dewaitilana?

⁴God anaanawa bedewe wadi wadiase, ‘E mamaa ita inaa do oniadewasamona,’ ita do wadiase, ‘Mida me mamba ba inawa dabuamodie wakadisamodia, me epapubolepi.’

⁵God anaanawa epe wade, tane e God anaanawa waeuwakadisaitile apana banlakadisamoilana. Apana da mamba ba inawa oniadewasamopia baiwa nitu da mampe winedia wadedie mamba ba inawa wanepia menasade, tane e waeuwala asiasi meba wadi wadiase, ‘Ne nitu ema mai gombana enalepaa rua, dia, ne God baiwa pulonteapa.’ E apana epe insaisaleidio adiweitile wailanase dima me dewasapia mampe mai God anaanawa aneipapundeipona, dia. E epe dewaitile mampe apana banlakadisamoilano God aiawa eie e waeuwala wawentoi. E dewala sa mampe God aiawa ipasiasailana.

⁷E lagawaauida! God peroweta Aisaia bukawa bedewe e umanala wandewalene wanase,

⁸‘Apana ema aiau os mampe ne eunei, tane mo nuau ipa nambeido, mai ne mainawo.

⁹Mo ne di wadaposinei, mo apanaida anaanau waeuwantoia abo God anaanawa rua.’ ” Nitu dainea apana miramirasade?

¹⁰Tauma Iesu apana uara sape eneia apamono mampe wimono diamone wanase, “Parisi ita anaana waeuwalala wita mitamita dewawa baiwa nuau pola wade. Tane ema etane ateitana:

¹¹Mai nitu da apana moawe iepe apana miramirasaipona, dia. Tane dima apana nuawa bedewe winedie moawe nosedia, sa ipa apana miramirasade.”

¹²Mape wawe alala Iesu mampe wimone wane waienase, “E ateiten ba dia, epe waie Parisi apanawa nuau kadisaiana.”

¹³Me sipoamone wanase, “Nitu anala uduudu dima ne Mamana uboo wandia mai ampona me bowiamopi.

¹⁴Parisi apanawa emona, mo muba emau potau tane sosou banlamoi. Apana emawa potawa me sowa emawa potawa banlepia mo nata ampusue don bedewe antopu.”

¹⁵Ita Pita wane wanase, “Gagalo babawa ema ipawaida wadewasanea!”

¹⁶Iesu mo waitaramone wanase, “E do mai dima ateitipe wanleipona, ba?

¹⁷E eweilana, ba dia, dima apana nadio bupa bedewe iedia etepa edie nosedie nambe aleide.

¹⁸Tane dima apana nuawe winedie moawe nosedia, sa ipa apana miramirasade.

¹⁹Apana nuau bedewe insaisa kadiwa nosedia baiwa mo sosou bomoi, nina dewawa rebareba dewasai, pointoi, lagantoi ita kutuntoi.

²⁰Dewa ema uduudu apana miramirasade, tane mo waia rua apana witapa mitasiawaia nana wadepie napia, sa mai apana miramirasapia rua, dia.” I dea sumanaiwa debama gagalowa

²¹Tane Iesu Israel tawowa ene Taire ita Saidon bolau kerakera bedeuwointa alen.

²²Sape i dea wisene mukama Iesu apasane wane wanase, “Tatana, Dawid Otopa, nuaparenaitaa! Aleu kadiwa ne anona bedewe wandie dewasadio pokaida etede, mai rua!” Tane i sa mai Israel iwa, me bola Kanaan bedewe wanwanlala.

²³Tane Iesu mai i aiawa da sipoasapona, dia. Tauma wawe alala Iesu mampe wimone diane waienase, “I sa waaubewo alepi, me no wambo odedie aia uara wamode.”

²⁴Iesu sipoamone wanase, “Ne Israel apanawa os baibu waaubaneno winen, mo ipa sipsip rebalala ruau waimoi.”

²⁵Tauma i sa Iesu mampelene imimpa emmisilene wanase, “Tatana, saunea!”

²⁶Iesu leusane wanase, “Mai eulepona no seda nanau wadate mo elou wanamoto napu.”

²⁷I leusane wanase, “Tatana, sa ipa ulaipa, tane elo do mambu nana nadia karamba du atowe nosedia nai.”

²⁸Mape Iesu i diene wanase, “Anona, e sumanaia ipa debama! Dima e iririwaitena ideita segalepi.” Iesu epe diedioma me anoopa tauwadea os inalen. Iesu kerolala uara inamode

²⁹Ema aupe Iesu bola sa ene doa Galili tampeinta aleidie ita wadiwa odene aisidene wain.

³⁰Sape apana uaraia mo sosou kero daitada wadawadalala, mo isiwa tampu bobopa, da emau potau, da etepu kiokiou ita do moau potau banlamone wimone Iesu wawa bumpe teamoieno me inamon.

³¹Tane apana moau potau inantone gagalontoiena, etepu kiokiou euntoiena, tampu bobopa antoiena ita emau potau sala eweio apana sape eneia ewamone memesantone Israel Godiwa wadaposisaiena. Iesu apana 4,000 nana wanamode

³²Iesu me wawe alala apamono me mampe wimono diamone wanase, “Ne nuana pareleide apana ema baibu, ipawa walama natadea mo ne do lakasanten ita tauma mai nana da wineipona napu. Ne mai menaneipona mo omanaomanaua waaubamopo bolauwobolauwo antompe into emau dubalepi.”

³³Wawe alala Iesu diane waienase, “Bola sawanawaida, ambi dauwa ema bedewe bured donsate apana uaraia wanamoto napu?”

³⁴Iesu waitaramone wanase, “E manlawo bured uduudu ambi winei?” Mo sipoasane waienase, “No mainimbo bured 7 ita bouri kerakera nata os winei.”

³⁵Ema aupe Iesu apana diamono dogo osowe aisintone waimoiena.

³⁶Tauma me bured 7 ita bouri do otene God auwasano dialeno ampuialene me wawe alala wanamon, mo apana mampo amonantopuo napua baiwa.

³⁷Mo uduudu nana sa nane pokamon. Tane wawe alala nana moawa eiena posawa 7 aimoieno nope wimon.

³⁸Apana mona wisiawa uduudu 4,000, tane ioto obampu do sape nana naiena mai wisiamopona, dia.

³⁹Apana nana naieno dialeno tauma Iesu mo waaubamono anton ita me waa bedewe odene doa nawene bola Magadaniwa alen.