Read Kanasi Mak 3 Bible Online

Mak 3 - Kanasi bible

Mak 3

¹Sabat walamawa dawo Iesu gagalo duwa bedewe alene apana witapa bobopa do wandio donsan.

²Tane apana isiwa Iesu wawusapua baiwa me ewaitusaie laia do sape waimoie. Mo menamodia atentopu Iesu Sabat anaanawa oniepidewalepi, ba dia, me apana kerolala Sabat walamawe inasapi ba mo anaanau asiasi epi.

³Mape Iesu apana witapa bobopa diene wanase, “Ne mainawo wine, apana nambunepe enaa.”

⁴Ita Iesu apana waitaramone wanase, “No anaanamba ambi wade, no Sabat walamawe dewa dainea os dewamonta? Walama sa bedewe apana kadilempo ewate eta ba sausata? Apana kerolala eto bolepi ba sausato inalepi?” Tane mo epe etane mai dima leusape wapona, dia.

⁵Iesu mo nuau badoleno ewedie nuawa kadiidalen mo mampo ita me nuawa pareidalen. Mape me apana witapa bobopa diene wanase, “Witaa aubea.” Ita Iesu diena rua me witapa aubeno inalen.

⁶Parisi dewa ema ewane tauwadea gagalo duwa ene Erod apanawa baibu antoiena. Ita mo dommone insaisau deasaie wawadiadiantoie inta banusaie Iesu bosapua baiwa. Apana uaraia doa Galili tampe auwei

⁷Iesu wawe alala do bola waimoia enee doa Galili tampe antoiena. Ita Galili apanawa uaraia Iesu wawe anton. Tane bola uduudu apanawa do Iesu ginasa dewamodia umanawa etane me mampe antoiena. Mo ipa Iudia, Ierusalem, Idumia, Taire, Saidon ita Ioadan waiwa da apanawa.

⁹Sape apana auweia uaraidanton. Iesu kerolala uaraia inamodia osowe mo uara bedeuwo kerolala uduudu ewaewasaaubantoie Iesu mampentopona baiwa. Mo inseia Iesu ibuwa wadape inantopona. Mo uaraia ewaewasaaubantoie Iesu bolawa dia naepe enapona. Sa baiwa me wawe alala diamona waa banuntopue wadapue wimopuo me bedewe odepie wampie waeuwalepi.

¹¹Apana bedeuwo aleu kadiu wanwanlala Iesu eweia walamawe mo me danawe muba siribabantoie aubaubantoie waie waiase, “E ipa God Otopa.”

¹²Tane Iesu mo badowa anaanamona me umanawa mai wapue sabamosapu me mida, diaida. Iesu aposel 12 sonabamode

¹³Ema aupe Iesu wadiwa odene alene apana mida me menasadia rua apamone mampemon.

¹⁴Ita apana 12 sa sonabamona me ebou Aposel itune ita diamone wanase, “Ne e sonabalena waroroneanuno do lakasantataa baiwa. Ita God aiawa amonawa baiwa ne waaubalepino aitonuna.

¹⁵Tane muka enalepa aleu kadiu tanamonuna baiwa.”

¹⁶Apana 12 sonabamona ebou ipa ema epe: Saimon, Iesu ebowa da ituna Pita,

¹⁷ita Sebedi obampa Iems wamba Ion nata, Iesu ebou da ituna Boaneages, aia ema ipawaida ipa uma obampa.

¹⁸Ita do Endru, Pilip, Batolomiu, Matiu, Tomas, Iems, me ipa Alpias otopa. Tane do Tadeus, Saimon me ipa apana uwau Selotiwa sou dea,

¹⁹ita Iudas Iskariot mida Iesu laga mampe nanalepia apanawa. Apana Iesu wawusai me aleu kadiwa mukawa mampe nolaleide

²⁰Iesu wadiwae iene alene duwa odeno tane apana uaraia bauta sape auweia rua osowe me baiwantone auweiena. Ita me wawe alala do bodamoieno mai nana napona rua.

²¹Me nola pokaidasadie, do wampadewae nana napona intawa dia gombawa umanawa etane me mampe antoie oniempaa baiwa. Mo waienase, “Dauwa me kainokaino nola os dewasadie wandia baiwa uwawa saiwa wano koakoalen. Ane, nuba wadate mainimbosate onieta.”

²²Tane anaana waeuwalala isiwa Ierusalemwae iane wimone waienase, “Me bedewe aleu kadiu mambu ebowa Belsebul wandio mukawa mampe aleu kadiu apana bedeuwo waimoia tanamodio nomoie antoi.”

²³Iesu mo gagalou etene baiwa apamono mampe wimoieno gagalo babau diamone wanase, “Ambi Seitan enepie tane me sowaida tanepi?

²⁴Naita tawo moawa dea mai insaisau dealepia muba onantopue empuempu bedeuwo segalepio deaantopuo bola sa ebowa dialepi.

²⁵Naita dan dea mai insaisau dealepia mo bedeuwo empuempu segalepio wanwambu kadiidalepio deaantopu.

²⁶Naita mo mida Seitan gonaawa bedewe waimoia muba adiananantompe empuempuntompa mo gonaau muba kadikadisapuo dialepi.

²⁷Apana kasawogala duwa bedewe mai apana poiwaa reba odepie puraiwawa otamopia rua, dia. Tane me ideita apana kasawogala bauta taupidoe muriwa puraiwawa duwa bedewe winamoia otamopia rua.

²⁸Ne ulaipa dialedina, apana mida God mampe dodomanalepona menasadia God me kadiwa uduudu insadabuamopie inasapi. Naita me God wakadisasana, kadi sa debama do insepidabuasapi.

²⁹Tane mida Aleu kakaiwa wakadisasadia, God me kadiwa mai insepidabuasapie inasapi, diaida, kadiwa sa winakasalepi.”

³⁰Iesu gagalo ema wana, ipawa mo isiwa me wakadisasane waienase, “Me bedewe aleu kadiwa wandie nolaleide!” Mida Iesu gombawaida waimoi?

³¹Iesu gagalo ema wamontuwano aupe me inawa wanwamba do me awa wimoiena. Tane apana uaraia sape auweieno baiwa mo mai du bedewe odape Iesu mampe wimopona rua, dia. Sa baiwa mo peloo enane gagalo os wanaaubeiena Iesu mo mampo nosepia baiwa.

³²Ita apana uaraia du bedewe Iesu waine paneiena benema sa etane waiasaieno alene Iesu mampe wisen ita gagalo sa wane waienase, “E inaa wanwana do peloo waimoi, menamodia eweepue do gagaloitana.”

³³Iesu mo uaraia waitaramone wanase, “Mida ne inana ita waiwaina umanau wailana?”

³⁴Tane me uaraia waine paneiena ewamodie diamone wanase, “Ema ipa ne inainana ita waiwaina waimoi!

³⁵Apana mida God insaisawa dewasadia me ipa ne waina, weanana ita inana wande.”