Read Kanasi Aposel 3 Bible Online

Aposel 3 - Kanasi bible

Aposel 3

¹Walama dea Iuswa raupariu walamawa wiseno omo kekeraleidio Pita Ion nata God duwa bedewe odaoda baiwantoio apana tampa bobopa do muwalena donsaiena. Me sosowa walama ruawantoie awaneie God duwa moape ituie ei apana odeia mampo mane iririwalempaa baiwa. God duwa moawa sa apana ebowa waiase, ‘Du moa eudida.’

³Apana tampa bobopa sa Pita Ion nata God duwa bedewe odaoda baiwantoio ewamone me mane baiwa iririmon.

⁴Me epe iririleidio Pita Ion nata me ewanadoe ita Pita me diene wanase, “Pisiwae, no ewanea!”

⁵Me Pita diena rua mo ewadomone insedia mo mampo mane wadepi.

⁶Tane Pita wanase, “Ne mainawo mai silwa ba gold wineipona sauepa, dia! Tane dima mainawo winedia eneepa!” Me epe wane apana tampa aiaisiwa diene wanase, “Iesu Keriso Nasaretiwa ebowe dieedina enee aitaa!”

⁷Pita epe wane me witapa on wadene sausano enenwiseno tauwadea os me wawa ita wawa komempa do inantone eunton.

⁸Ita me enaroronaleidie leidie nuaeu debama do God ebowa wadaposisadie Pita Ion nata waroromono do God duwa bedewe odane antoiena.

⁹Tane apana uduudu God duwa bedewe waimoia me God ebowa wadaposisadie aleidio eweiena.

¹⁰Mo me ewane atentoiena me ipa kainokaino God duwa moawa ebowa waia Du moa eudida tampe wandie mane iririwaleidia apanawa tauma inalene wawe aleide. Ita apana me inalena ewane insakoantone memesaidanton, ambi ipa epe segalen. Pita ina bumpa gagalowaleide

¹¹Apana sa inalena Pita Ion nata etepu wadedio mo do laie, mai emopona, dia. Ita mo God duwa empuempulala dea ebowa waia Solomon bolawa bedewe antone waimoie. Tane apana uduudu mo ewamone memesantone weuwane mampo wimoieno

¹²Pita mo ewamone diamone wanase, “Sosona Israelwa, e dima baiwa ema segalena mampe insakoaitile memesaitilana? Dima baiwa badowaida ewaneilana? E inseilana no nuba mukamba mampe ba dewamba dodomana ita sumanaimba badowa baiwa apana ema inasatana, ba? Sa dia!

¹³Tane Abraam, Aisak ita Iakob Godiu, sa ipa no nosinosimba Godiu me nolawa dewalala Iesu sapaidasano mukamukaua wandia ebowa mampe apana ema inalen. Tane Iesu ipa sa e dabuasale Pailat witapesalana bosapona baiwa. Ita Pailat Iesu ewene menasana me wapaaubepono di alepona. Tane e laga mampe Pailat danawe me wawusale ituaisisalana.

¹⁴Iesu ipa kakaiwa dodomanaida. Tane e me dabuasale Pailat iririsalana e nuala eusapia baiwa me wita kadilala Barabas wapiaubepio dibura epie di alepio ita Iesu bosapi.

¹⁵E ina bumpa apanawaida bosalana, tane God me bo bedewe inasano enenwisen. No dima emamboido ewatana benemawantitana.

¹⁶Apana ema mape enedia e atenla me mida. Me sumanaiwa Iesu bedewe ituna baiwa inalene enedio eweilana. Me Iesu ebowe sumanailene inalen, mai no nuba mukamba mampe me inasapona, dia.

¹⁷Sosona, ne atenten e ita uwalala apanawa do Iesu mampe insakoala dewasale bosalana.

¹⁸God bauta me perowetawa uduudu diamono benemantoiena me Kerisowa tawo osowe wisepie nolalempe apana mampo poka etaidasapi. E dima Iesu mampe dewasalana, sa ipa dima mapo God perowetawa moauwoe gagalolena rua segalen.

¹⁹E insaisala leusane kadi ene dodomanaitane God mampe winleno me e kadila insepidabuasapi. E kadila ene dodomanaitano God Aleu nanawa enalempo nanune sumanai bedewe badowa wanlempa. Tane God Inawamba sauawalena e baila sonabene itun, me ipa Iesu.

²¹Me uboo waimpo ideita God dewa uduudu sanaasampaa walamawe me wapiaubepio leulepie tawo osowe wisepi, God mapoido perowetawa kakaibu mampo saualena rua.

²²Ne epe wadina, ipawa Moses Iesu umanawa wane wanase,‘Tatamba God e apanalaida bedeuwo peroweta dea ne ruana wapiaubepio e manlawo wisepi, me aiawa uduudu dialempo etanadewaitana.

²³Ita mida me aiawa mai etepie ruawalepia God meba apanawaida bedeuwo me nambesapie kadisapi.’

²⁴Samuel ita peroweta uduudu mida me wawe wimoiena do God aiawa benemantoie dima uduudu walama ande bedewe segantona gagalowantoiena.

²⁵Tane Keriso mida peroweta benemawantoiena e manlawo wisen ita dima God no nosinosimba mampo saualena e wadalana. God Abraam diene wanase,‘E danaida bedewee dan uwa daitada tawo osowe waimoia God sauwa euda donsapu.’

²⁶Tane God me nolawa dewalala sonabene wanaubeno bauta e Iuswa manlawo wisena e deadea saulepio kadi bedewe insaisala leusane dodomanaitana baiwa.”