Read Kanasi Aposel 6 Bible Online

Aposel 6 - Kanasi bible

Aposel 6

¹Iuswa Girik aiawa wawalala isiwa bola dawoe wimone Iuswa Iudiawo wanwanlala bedeuwontone Iesu bedewe sumanaintoiena. Tane apana uaraia sumanai bedewe odeio walamawe Girik aiawa wawala sa mo obuobu osouwo Iudiawo wanwanlala diamone waienase, “E walama uduudu ruawaitile nana amonaitilana, tane no Girik aiawa wawalala obuobumba emoilana, mai nana wanamoipona, dia!”

²Mo epe waiena baiwa aposel 12 sumanailala uduudu diamoieno auweieno ita mo waienase, “Mai eulepona no God aiawa amonawa etee nana epentonte nanantonta.

³Sosomba, e bedelawo apana 7 Aleu kakaiwa nopemona do insaisau debama atembuida sonabamona ita nana nolawa sa mo mamposato oniepu.

⁴Tane no ipa insaisamba uduudu raupari ita God aiawa amonawa nolawa baiwa nanantata.”

⁵Aposel epe waieno mo uduudu etane nuau euleno apana 7 sonabamoiena. Dea ipa Sitiwin, me sumanaiidalala ita Aleu kakaiwa nopesana apanawa. Sosowa isiwa ebou ipa Pilip, Pokorus, Naikanoa, Timon, Pamenas ita Nikolas, me bautaido bolawa Antiok ene Ierusalemwa wisene Iuswa sumanaibu bedewelena.

⁶Mo sonabamone banlamone aposel mampo wimoieno mo baibu rauparintone ita witapu osouwo ituiena God sauwa euwa wadapua baiwa.

⁷Tane sape mo God aiawa amonantoio debamaleidio apana uara eteie. Ita Ierusalem bedewe sumanailala apanawa tauwadea uaranton. Do pirisi uaraia sumanaintoie God aiawa ruawantone simbianton. Sitiwin wadeiitudede

⁸Sitiwin God mukawa do sauwa euda nopesana baiwa me ginasa debamau daitada apana bedeuwo dewamon.

⁹Iuswa isiwa bola Sairini ita Alekisandiria, tane do bola Silisia ita Asia bedewe Ierusalemwa wimone sape gagalo duwa dea ebowa waia Tautaulala inantona gagalou duwa bedewe deanton. Ita mo Sitiwin wadabuasane do wawanton.

¹⁰Tane Aleu kakaiwa Sitiwin insaisa debama waneno gagaloleidie mo me aiawa mai nanausapona rua, dia.

¹¹Sa baiwa mo apana isiwa ensimoiena mo lagantope waponase, “No etatana me Moses anaanawa ita God wakadisamodie!”

¹²Gagalo ema mampe Ius apanawa eiau, anaana waeuwalala ita Iuswa uara nuau kadileno Sitiwin amboitusane wadabuasaiena. Mo Sitiwin wadanaitue banlene Iuswa eiau uduudu mampo anton.

¹³Sape mo laga benemasikiwa apanawa isiwa apamoieno wimone waienase, “Apana ema walama uduudu God duwa kakaila ita do Moses anaanawa wakadisamodie.

¹⁴No apana ema eteitano wanase, ‘Nasaret Iesuwa bolamba kakaiwa ema kadisapie do no dewamba Moses nenena leusapio sanaalepi.’ ”

¹⁵Tane Ius apanawa eiau uduudu gagalo bedewe waimoie Sitiwin emosaie eweio me namba ewaewawa ensel namba ruawalen.