Read Kanasi Aposel 9 Bible Online

Aposel 9 - Kanasi bible

Aposel 9

¹Saul bauta dewaleidia rua Ierusalem bedewe Tatamba wawe alala kadimodie wandie. Me epe dewaleidie wandie sumanailala bola dawo waimoia do kadimopia menasano pirisi ionoidoa mampe alene

²wanase, “Ne menanedia e leta girumamowo Iuswa gagalou dubu onionialala mampo Damaskas bedewe antopu. Ita leta sa bedewe girumaite diamoa ne muka wadana Damaskas bedewe apana mona ita iwoa uduudu mida Iesu waeuwa intawe antoia wadaitumope wimpe Ierusalem bedewe diburamopa.”

³Saul Damaskas bedewe aleidio awa nowe bola mampeleidio sapa debamawa uboe iene me osowe eintewano ewen.

⁴Sapa sa me osowe eintewano saidalene dogo osowe omene nosene aia etedio me diedi wadiase, “Saul, Saul, e dima baiwa ne onana eneie kadineiano poka etaidasadina?”

⁵Tane Saul aia sa etene mai atenlepona mida epe diedie ita waitaralene wanase, “Debamana, e mida epe waie dianeiana?” Saul epe wadio Iesu sipoasane wanase, “Ne ipa Iesu mida onana eneie kadineiana wadina!

⁶E dogo osowe enawie Damaskas bedewe aite dima dewasaa umanawa dieepu!”

⁷Tane apana mida Saul do antoia aia sa etane mida Saul diedia mai ewapona, dia. Ita mo sapa debamawa sa ewane ita aia do etane memesantone mai aiau da wapona.

⁸Saul dogo osowe omena enenwisene emawa lotone tane mai sala ewapona rua, dia. Me emawa potaleno baiwa sosowa do antoia me witapa wadane banlene Damaskas bedewe antone odeiena.

⁹Sape me wandio walama natadea bedewe mai nana ba esa da napona, dia, me emawa potaleno di wandie.

¹⁰Bola Damaskas bedewe sumanailala dea ebowa Ananaias wandie. Me sape wandie auwen rua ewedio Tatamba me ebowa Ananaias wane apasano eten. Ita me leusane wanase, “Tatamba, ne ema, dima dewasapaa meneede?”

¹¹Ananaias epe wano Tatamba me diadewasasane wanase, “E enawie, inta dea ebowa apana waiase, ‘Inta dodomana’ asiasi aite Iudas duwa bedewe odaa. Ita du sawo bola Tasus apanawa Saul waitarawaitee ewaa. Me sape rauparileidie wande.

¹²Me auwen rua ewena e me mampe wiene witaa me osowe ituano emawa potalena eulen.”

¹³Ananaias Tatamba sipoasane wanase, “Tatamba, apana sa e umanawa waiana Ierusalem bedewe e apanaa kakaibu mampo kadiwa daitada dewasadia umanawa etedine.

¹⁴Me pirisi debamau mampo muka wadene bola emawo wisena e eboawo sumanaintoie waimoia uduudu wadaitumopie diburamopia umanawa etana. Ne me mampe awa santedina, mai menaneipona, dia.”

¹⁵Me a dabualeidio Tatamba me diene wanase, “E aitaa me mampe! Ne me sonabena nolanalepie uwa daitada apanawa ita mo warereu mampo ne ebona wasabamosapio atentopu. Ita ne me sonabena Israelwa mampo do ne wasabamona wapio ateineapu.

¹⁶Tane me nolalempo ne ebona baiwa poka daitada etaidasampe dauwa etompa.”

¹⁷Tatamba Ananaias epe dieno etene Saul du wandiawo mampe alene me witapa Saul osowe itune diene wanase, “Sona Saul, Tatamba Iesu e into ieiano manawo sabamolena me ne waaubaneno manawo winen e emaa potalena eulepio sala ewaa, ita do Aleu kakaiwa e nopeepia baiwa.”

¹⁸Ananaias witapa Saul osowe ituno tauwadea os me emawa osowe nitu bouri etepa rua wineia nomoieno sala ewen. Ita me enenwisene babatutulen.

¹⁹Ema aupe me nana nane etepa rualeno muka waden. Saul Damaskas bedewe Gagalo euda amonaleide Saul Iesu wawe alala do walama isiwa Damaskas bedewe waimoie.

²⁰Me Iuswa gagalou dubu bedewe alene Gagalo euda benemamodie wadiase, “Iesu ipa God Otopa.”

²¹Mo uduudu me Gagalo euda amonaleidio etane memesantone waienase, “Me ambi ipa epe waeuwaleidio eteitana? Me Iesu ebowa sumanaiwalala Ierusalem bedewe waimoia kadimodio poka etaidasaia apanawa wisen! Me sumanailala mape waimoia wadaitumopie diburalala ruau banlamopie Ierusalem bedewe wisepie pirisi debamau mampomopio kotuntopu umanawa etatana. Tane me tauma Gagalo euda amonaleidio eweitana.”

²²Saul Gagalo euda amonaleidia mukawa debamalen ita badowa wasabamosadia Iesu ipa Keriso God sauawalena. Ita Iuswa Damaskas bedewe wanwanlala me Iesu wasabamowa wadio etane gagalowa sipoasape ampona mai rua, dia.

²³Saul walama uara sape wandie Gagalo euda amonaleidio Iuswa Damaskas bedewe wanwanlala eteie nuau kadiidalen. Ita auwene gagalontone insaisau deasaia Saul bosapu. Mo walama ita tadina bolau sa gonaawa moawa onieie Saul nosepono bosapona baiwa. Mo epe insaisantoia Saul umanawa etene atenlen.

²⁵Ita tadina dea Saul warorowa me wadane posa taiwa dola bedewe aine bola debama gonaawa nagawa bedewe noaneieno adiwe nosene ene alen. Saul Ierusalem bedewe aposel do deantoi

²⁶Saul Damaskas ene alene Ierusalem bedewe wisene menasana sumanailala do deantopona. Tane me dewawa mapo dewasadia mo inseie os waimoie. Me kadi bedewe insaisawa leusane Iesu bedewe sumanailene warorowa wanalena mai sumanaiwantopona. Sa baiwa mo uduudu me sawantone mai do deantopona, dia.

²⁷Mo Saul sawantoio Banabas me banlene aposel mampo antone me umanawa diadewasamono eteiena. Banabas Saul Damaskas bedewe aleidie Tatamba Iesu ewene do Tatamba me mampe gagalolena umanawa diamono atentoiena. Ita do Saul Damaskas bedewe mai sa ba mala do Gagalo euda Iesu ebowe amonaleidia umanawa diamon.

²⁸Banabas Saul umanawa diamono etane baiwa me wadane mamposane do deantoiena. Ita Saul mo bedeuwo wandi leidie Tatamba ebowe badowa malasia Ierusalem bedewe Gagalo euda amonaleidie.

²⁹Me Iuswa mida Girik aiawa wawala do gagalontoie wawantone osowe mo Saul bosapona baiwantoie.

³⁰Mo me bosapona intawa banusaio sumanai sosowa sape waimoia etane Saul banlene bola Sisaria bedewe iane antoiena. Ita sape mo me wanaaubeieno waa asiasi Tasusiwa alen.

³¹Tane walama sawo mai mida da ekelesia apanawa Iudia, Galili ita Samaria bedewe onau enape kadimopona, dia. Mo wanwan euda os waimoio Aleu kakaiwa saumodio sumanaibu bedewe badowa eneie. Ita mo sa mampe Tatamba aiawa ruawantoie os waimoio ekelesia inilene debamaleidie. Pita bola Lida bedewe Ainias inasade

³²Pita bola uara bedeuwointa aleidie God apanawa kakaibu ewamopia baiwa bola Lida bedewe wisen.

³³Sape apana ebowa Ainias, me etepa aiaisiwa mai eneipe aleipona enawa 8 dialena, wandio donsan.

³⁴Tane Pita me diene wanase, “Ainias, Iesu Keriso e inaede, enawie nogia nukudewaite wade aitaa!” Pita epe diedio me tauwadea os inalene enenwisene alen.

³⁵Lida ita Saron bedewe wanwanlala uduudu me inalene enenwisene aleidio ewane Tatamba sumanaiwantoiena. Pita i ebowa Dokas bo bedewe inasadio enediwisidede

³⁶Bola ebowa Iopa bedewe sumanai iwa ebowa Tabita wandie. Me ebowa Girik aiawe waia Dokas. I sa dewa euda dewamodie apana nuaparelala saumodie simbiamodie.

³⁷Tane Dokas kero wadeno bolen. Ita me sosowa bolena etepa duadisane du onapea bedewe itunadewae eiena.

³⁸Me bolawa Iopa bola Lida tampe naepe Pita walama sawo wandiawo. Sumanailala Iopa bedewe waimoia Pita Lida bedewe wandia umanawa etane sosou nata waaubamoieno me diapue banlepue wimpua awa antoiena. Ita mo wimone me iririsane waienase, “Somba niapo, no e aa winene menanedia tauwadea os e do ana Iopa bedewe!”

³⁹Mo Pita epe iririsaieno etene enenwisene mo do antoiena. Mo banlene antone sape wimone du onapea bedewe odeiena. Sape obuobu uduudu Iopa bedewe wanwanlala wimone nuaparepare kewa waie waimoie. Ita mo Pita wisene odeno ewane enane panane ke waie Dokas inawaa wandie garau uduudu poposamodia otamoie me euwasaie.

⁴⁰Tane Pita mo uduudu diamona Dokas bolene winedia epue nomopue antopu. Mo ene antoieno me imimpa emmisilene rauparilen. Me rauparileidie namba i bolala mampesane diene wanase, “Tabita, enawiea!” Pita epe diedio i bolena emawa lotone me ewene enenwisene wain.

⁴¹Ita Pita me witapa wadene sausano enaenaida enen. Me bo bedewe inalene enedio Pita sumanailala ita obuobu sape auweia apamono odane i inawaa euwamono eweiena.

⁴²Dewa ema gagalowa Iopa apanawa uduudu mampo debamaleno etane apana uara Tatamba bedewe sumanainton.

⁴³Ita Pita walama uara Iopa bedewe apana ebowa Saimon do waimoie nolaleidie. Saimon sa pue etepa sanaa lomoio nusamodie rakaumodia apanawa.