Read Kanasi Rom 10 Bible Online

Rom 10 - Kanasi bible

Rom 10

¹Sumanai sosona, ne nuana uduudu mampe menanedio ita God mampe rauparintedina ne apananaida Israelwa inantopona!

²Ne dialedina, mo nuau uduudu mampe God simbiasapua menamode, tane mo mai atenida intawa asiasi simbiantoipona, dia.

³God meba apana dodomanamodia intawa mo mai atentopona, sa baiwa mo muba inantopua intawa banusai. Ita ema bedewe God apana dodomanamodia intawa mo dabuasai.

⁴Ne ema epe wadina, ipawa Keriso Moses anaanawa mukawa ipasiasan ita sumanai bedewe apana God mampe dodomanantopua intawa wadenauben. Inaida God apana uduudu baibu imaasana gagalowa

⁵Apana anaana asiasi God mampe dodomanantopua intawa umanawa Moses wane wanase, “Apana mida anaana asiasi inaida donsapia menasampa, me uduudu dima anaana wadia ruawalepie dewasapi.”

⁶Ambi God mampe sumanai bedewe dodomanantataa intawa umanawa buka bedewe ema epe wadi wadiase, “Mai eba nuaawo insease, ‘Mida uboo odepi alepi?’ ” Sa ipa, mida odepi alepie ita Keriso banlepie iepi?

⁷“Do mai eba nuaawo insease, ‘Mida iepi bolala bolauwo tawo atowe alepi?’ ” Sa ipa, mida iepi alepie Keriso bolala bedeuwo banlepie odepi? Mai mida epe insepia rua, dia, ipawa Keriso aitamana iene wisene bolen ita bo bedewe enenwisen. No nuba mai dima dewasataa rua, dia.

⁸Tane buka bedewe ema epe wadi wadiase:“God aiawa amonantoio nosedia ipa tanlawoido, e moalawo ita nualawo winede.” Aia ema wadia, sa ipa Iesu Keriso bedewe sumanaintataa benemawa umanawa wade. Aia ipa sa no tauma amonantitana.

⁹Ipawa mida Iesu ebowa wasabamosapie wapiase, “Iesu, me ipa no Tatamba,” ita do nuawa bedewe sumanailepia God Keriso bo bedewe inasano enenwisen, apana sa ideita inaida donsapie inalepi.

¹⁰Ipawa apana mida nuawa bedewe sumanaileidia me ipa God mampe dodomanaleide. Ita mida moawe Iesu ebowa wasabamosadia me inaida donsadie inaleide.

¹¹Dima buka bedewe wadia rua segaleide. Epe wadi wadiase,“Apana uduudu mo mida me bedewe sumanaintoia ando mai malantopu, tane sumanaibu ipawaida ideita wadapu, mai di sumanaintoipona, dia.”

¹²Ema ipa apana uduudu umanau wade, ipawa God emawe Iuswa ita uwa daitada apanawa ipa deawaaida, mai nambenambe. God no Tatamba ipa dea os no uduudu baimba, ita mo mida sau baiwa iririntoia uduudu sau euda wanamode.

¹³Ipawa buka bedewe wadi wadiase,“Apana uduudu mo mida Tatamba mampe sau baiwa iririntoia inaida donsapue inantopu.”

¹⁴Mo ipa Tatamba mampe sumanai dia, ambi sau baiwa iririntopu? Tane mo Gagalo euda Tatamba umanawa etasiantopua mo ambi me bedewe sumanaintopu? Tane mai mida Gagalo euda amonalepia, ambi mo Gagalo euda etapue sumanaiwantopu?

¹⁵Tane Gagalo euda amonawa apana mai mida wapiaubepia ambi mo antopue Gagalo euda benemawa amonantopue diamopu? Buka bedewe girumalena wadia rua segaleide, wadi wadiase,“Gagalo euda amonalala apanawa wimoia ewaewau eudidalen no mainimbo.”

¹⁶Tane mai Israelwa uduudu Gagalo euda wadape mamposapona, dia, ipawa peroweta Aisaia wane wanase,“Tatamba, mida no Gagalo euda benemawa watano etene sumanaiwalen?”

¹⁷Sa baiwa no ewate atenten: Gagalo euda eteitana bedewe sumanai wadedi wisede, tane Gagalo euda etaetawa ipa Keriso benemawa amonantoia bedewe wisede.

¹⁸E inseilana Israelwa Gagalo euda benemawa mai etapona, ba? Sa dia, mo eteiena, ipawa buka bedewe epe wadi wadiase,“Mo aiau nosene tawo uduudu bedewe aleno eteiena, do mo gagalou tawo moa daitada bedewainta alentuwan.”

¹⁹Do inseilana Israelwa Gagalo euda etane atentoiena, ba dia? Moses waitara ema sipoasane God wana rua wane wanase,“Apana mida wankoalala ne dewamopo inantopuo e ewamone obumona, ita apana mida mo insakoalala bedeuwo ne euda dewasapo e ewamone nuala kadilepi.”

²⁰Tane do peroweta Aisaia malasia badowa uwa daitada apanawa umanau ema epe wane wanase,“Apana mida mai ne insaneape banuneapona, mo ne doineiena. Ita mo mida mai ne umanana waipona, ne mo mampo wineno ewaneiena.”

²¹Ita Israelwa umanau me wadi wadiase,“Ne walama uduudu nuana wadanaaubene menanedia mo ne mainawo wimopona, tane mo ne aiana etane mai menamopona, adiananasaiena.”