Read Kanasi Rom 9 Bible Online

Rom 9 - Kanasi bible

Rom 9

¹Ne ipa Keriso mampea, sa baiwa tauma dima ne insedina wapaa ipa ulaipaida, mai laganteapaa rua. Do Aleu kakaiwa insaisana badosadio insedina ne ulaipa wadina.

²Ne apananaida Israelwa baibu walama uduudu nuana polaida wadie pareleidio pokaida etedina.

³Ne insedina naita inta da wineipono ne baidasosona inantopona baiwa God ne kotuneape Keriso mampe empuianepe nambeneapona.

⁴Israelwa mo ipa God apanawaida, God mo dewamono obampa wanantono me do waimoie ita sapawaida mo mampo sabamosan. God me sauawa ita anaanawa Israelwa wanamon, do God meba mo simbiasapua dewawa euwamon. Ita do me mampe sau donsampaa gagalowa diamon.

⁵Mo ipa Israel apanawa debamau eboeboua nosinosiu. Tane do Keriso me ipa ete mampe Israelwa bedeuwo mulen. Me ipa God, nitu uduudu me atowe. Tauma ita ando me ebowa ipa wadaposilalaida! Ulaipa, amen.

⁶Mai insenase, dima God Israel mampo sauawalena ipasialen. Sa dia, ipawa mai Israelwa uduudu ipa God apanawaida, dia.

⁷Mai Abraam nosinosiwa uduudu me obampaida, dia. Tane God Abraam diene wanase, “E otoa Aisak bedewe nosinosia uara segantopu, mo ipa e obanaida ne sauaena rua.”

⁸Gagalo ema ipawa ema epe: Mai Abraam obampa uduudu me osinawa bedewe muntoia God obampa, dia. Tane Abraam obampa isiwa Aisak bedewee God sauawa asiasi muntoia, mo ipa Abraam nosinosiwaida.

⁹Ipawa God Abraam sauasane ema epe wane wanase, “Walama ne sonabedinawo leuntape wineapo e manainaa Sara oto mona gamosapi.”

¹⁰Mai sa os, tane mama dea bedewe i ebowa Rebeka obampa nata gamomon. Mo nata mambu ipa no atanosimba Aisak.

¹¹Tane God menasana me sonabawa ipa me insaisawa rua segalepi, mai dima apana euda ba kadiwa dewasaia asiasi, dia. Rebeka obampa ragaraga inau, bupa bedewe waimoia walamawe God Rebeka diene wanase, “Mai oto kerauwa tatawa tautua simbiasapi, tane tautua wamba kerauwa simbiasapi.” God epe wane me oto kerauwa sonaben. Sa ipa dima me bauta insaisawa ituna rua segalen, ipawa ragaraga walama sawo mai muntope euda ba kadiwa dewasapona, dia.

¹³Ema ipa dima buka bedewe girumalena segalen. God wane wanase, “Ne Iakob nuawadawadasana, tane Esau ne dabuasana.”

¹⁴Tauma no ambi wata? God dewasankadisan, ba? Sa dia!

¹⁵God me ipa dodomana os, ipawa me mapo Moses diene wanase, “Mida ne nuawadawada amonawa wanawanawa menanepia, ne ideita wanapaa rua. Ita mida ne nuaparewanteapaa menanepia, ne me ideita nuaparewanteapaa rua. Ne neba insaisana rua dewasadina.”

¹⁶Ema bedewe no eweite atenten: God sonabawa ipa mai apana dima menaidamodio inseie badowa nolawantoia bedewe segaleipona, dia. Tane God meba nuaparewa mampe sonabaleide.

¹⁷No ema atenten, ipawa buka bedewe Isibt warerewa Pero me nuawa anatene badosana umanawa God wane wanase, “Ne neba dewaeno warereiten ne e bedeawo mukana sabamosapaa baiwa, ita ema bedewe ne ebona debamalepio uwa daitada apanawa etapue atentopu.”

¹⁸God epe wano no atenten: Mida me nuaparewa wanawanawa menasapia me apana sa nuaparewalepi. Ita God menasapia apana dewasapio nuawa anatepie badosapia, me epe dewasapia rua.

¹⁹Naita apana da ne dianepi wapiase, “Uduudu ipa me insaisawa rua segaleide, no mai God insaisawa amboitusataa rua. Dima baiwa God no wawunepi? No mainimbo mai sai da wineipona, dia.” God sonabawa gagalowa

²⁰Ne apana sa diape wapaase, “Sona, e apanaida, dima baiwa e God aiawa sipoa epe leusaiana?” Eueuwa ema insea: Onta mai apana mida dewasadia diepie wapiase, “Dima baiwa epe dewaneiana?”

²¹Onta mai apana me dewasadia epe diepia rua, dia. Ipawa onta dewalala dogo moawa deawaa mampe onta inainambu daitada dewamode. Isiwa walama debama os bedewe otamompe nolawantompa, tane isiwa walama uduudu otamompe nolawantompaa baiwa winamoi.

²²Ema epe rua deawaa God dewasade. God menasadia nuakadiwa sabamosapio apana me mukawa ewapue atentopu. Sa baiwa God apana mida mampo me nuawa kadileidia kadimopona mai tauwadea matangelamopona, tane nua aiaisiwa mampe oniamodie.

²³Do God menasadia me sapawaida debama apana mida me nuapareuleidia mampo sabamosapona. Apana sa God bauta sonabamona me sapawaida wanamopona wana,

²⁴sa ipa no Iesu Keriso sumanaiwalala umanamba wan. Tane God mai Iuswa os apamopona, dia. Me uwa daitada apanawa do apamon me sapawaida donsapona baiwa.

²⁵God peroweta Osea buka bedewe ema epe wadi wadiase,“Apana mida bauta mai ne mainawoa ne diamope wapaase, ‘E ipa ne apananaida.’ Ita apana mida bauta mai ne nuanawoa ne diamope wapaase, ‘E ipa ne nuawadawadana apanawaida.’ ”

²⁶Ita do God wadi wadiase,“E ipa mai ne apanana.” Tane bola ipa deawaa bedewe me apanawa diamope wapaase,“E ipa Godida wanwankasalala obampa.”

²⁷Peroweta Aisaia Israelwa umanau aiawa debama mampe wadi wadiase,“Israel apanawa uaraia waimoi, owa nelawa rua. Tane mo bedeuwo nata os God empuiamone nambemona, mo os inantopu.

²⁸Ipawa Tatamba God tawo ema apanawa tauwadea kotumopie matangelamopi.”

²⁹Dima peroweta Aisaia wana rua segaleide. Me ema epe wane wanase,“Tatamba God mukamukauaida no nosinosimba isiwa empuiamone nambemono inanton. Tane diaewo no Sodom ita Gomora apanawa ruau uduudu kadi donsape bontepatuwapona.”

³⁰Dewa ema ipawaida dima? No ema epe eweitana: Uwa daitada apanawa God mampe dodomanantopona mai banuwa inseipe, tane ideita mo inta donsane sumanai bedewe God mampe dodomananton.

³¹Tane Israelwa badowa anaana asiasi inta banusaiena God mampe dodomanantopona baiwa, tane dia.

³²Dima baiwa Israel apanawa inta mai donsapona? Ipawa mo mai sumanai intawa asiasi God do dodomanantopona baiwa rubusapona, tane dima anaanawa wadia rua dewasaia asiasi rubusaiena. Sa baiwa seu apana intau osowe winedia bagoramono omeiena.

³³Seu sa umanawa buka bedewe wadi wadiase,“Ewana, ne seu bola Saion bedewe itudina. Seu ipa sa apana bagoramopio omepu, ita seu ema osowe mo ampupare kadi donsapu.Tane mida me bedewe sumanaileidia ando mai malalepi, tane sumanaiwa ipawaida ideita donsapie wadepi, mai di sumanaileipona, dia.”