Read Kanasi 1 Korint 6 Bible Online

1 Korint 6 - Kanasi bible

1 Korint 6

¹E dewala ema epe: Sumanai sosola kadiwa manlawo dewasampo osowe wawaitonune kotu apanawa mai God atentoipona mampomoilana dodomanamompaa baiwa. E ambi epe dewaitilana, saitile malaitilana, ba dia? Dima baiwa e wawaitilana osowe mai sumanai sosola mampo aitipona dodomanaleipona baiwa?

²E dewala sa dewasailana mampe sabamoitilana e mai atenidaitipe wanleipona no sumanailala walama ompe tawo osowe wanwanlala uduudu kotumota. E ando apana uduudu kotumona, sa baiwa tauma anaana kerakera ampuiasailana bedewe eba dodomanasaipona rua.

³E ateiten ba dia, walama ompe no sumanailala mai apana os, tane ensel do kotumota. Sa baiwa tauma e bedelawo dima kadilempa eba dodomanasaipona rua os, mai saiwa da.

⁴E ando apana uduudu ita ensel do kotumona! Ita dima baiwa tauma anaana kerakera ampuiaitonune osowe wawaitonune kotu apanawa mai God atentoipona mo eueuwau da mai sumanailala mampo wineipona mampoitonuna menalede?

⁵Ne ema wadine e mala osolawo itudina! E bedelawo mai insaisa dodomana apanawa e sumanailala wawaitilana dodomanaleipona baiwa waimoipona, ba?

⁶Tane e bedelawo sumanailala isiwa sumanai sosou kotu apanawa mampesaio sumanaisiawaia danauwo mo wawumoia benemawantoio etei.

⁷E dima baiwa sumanai sosola do wawaitile kotuitilana, ba sosola kadiwa manlawo dewasaio kotu mampe sipoamoilana? E dewala sa dewamoilana mampe sumanaila bedewe omaidasailana. E mo mai kotu osowe teamopona, dia, tane e di pokawa saiwa eteipe eipona.

⁸E epe dewaitipona, tane e sumanai sosola mampo kadiwa dewasaile kotumoile ita laga dewawa mampe poka wanamoilano dauwa etei.

⁹E inseilana e kadiwa kainokaino dewasanune God gonaawa bedewe odana rua, ba? Mai epe insenakadisana! Mo kadi dewalala mai God gonaawa bedewe odapue wampu, diaida! Mo ninarebarebantoie laia, ita god lagawaau sumanaibulala, nainailala sosouida emoie ninantoia, ba apana mona muba ninantoia,

¹⁰ba poilala, ita do anaanata dewawa mampo winedia, ba esa badowa naie uwau koakoaleidia, do kutun ba wawu di wawalala, ba rasikoro apanawa God gonaawa ipa mai mo mampoa, di diaida!

¹¹E isiwa mapo kadiwa ema rua dewamoile wainilee. Tane tauma Tatamba Iesu Keriso ebowe ita no Godimba Aleupa kakaiwa mampe e kadila bedewe wainilano mitalene euleno God mampe dodomanaiten. Ita e God meba apanawaida wanaleno kakaiwaida wainilana. No etemba ipa Aleu kakaiwa duwa, mai kadisanta!

¹²E ne etaneilano wane wanase, “Ne rua os dewa uduudu dewamopatuwapi.” Ne epe wana ipawa ema epe: Dewa uduudu dewamoipona rua os, tane dewa isiwa dewamopina bedewe mai euwa da, dia. Ulaipa, ne rua os dewa uduudu dewamopatuwapi. Tane dewa uduudu ne os oniedina, mai dewa da mamba wananteapo banlakadisaneampo kadiwa dewasapina, dia.

¹³E isiwa waile wailanase, “Nana ipa bumba baiwa, ita bumba nana baiwa.” Tane ema epe: God nanamba ita bumba dewamona tauma os baiwa, ando dewa ema nata kadimopie diamopituwapio tawo sanaawo mai menanepi, dia. Ne waeuwana ema wana asiasi e isiwa naita inseilanase, “Nina etemba owawa, ita God etemba dewasana ninarebarebantontaa baiwa.” Tane sa ipa diaida, mai no ninarebarebantontaa baiwa God etemba dewasapona! No etemba ipa Tatamba os baiwa! Ita Tatamba no etemba baiwa. No etemba ipa Tatamba mampe debamawaida, me etepa amonalena no etemba do inalepie bo bedewe enepiwisepie wankasalepi.

¹⁴God mukawa mampe Tatamba bo bedewe inasano enenwisen, ita deawaa God no do bo bedewe inanepio enatawineta.

¹⁵E etela ita Keriso etepa ipa deaida, ema ipawaida e ateiten, ba dia? E inseilana e etela ita Keriso etepa do deaida wainilana bedewe epanake ene nolene i ninalala etepa do deaitana rua, ba? Sa ipa mai rua, di diaida!

¹⁶Buka bedewe wadi wadiase, “Apana mona i nata ete deaida waimompa.” E ateiten ba dia, me mida i ninala do ninantoia mo etepu deaidaleide. Apana mida Keriso do deaidantona mai i ninala do deantompa, diaida!

¹⁷Ita me mida Tatamba do deantoia mo nata aleu bedewe dea os.

¹⁸Nina dewawa nanlanepelempo dewasana sawa salawo tauwadea weuwane nambe aitana. Ipawa kadi uara apana dewamoia bedeuwo kadi dea os nina dewawa apana dewasaie muba etepu kadiidasai.

¹⁹E ateiten ba dia, etela ipa Aleu kakaiwa duwa wainilana. God Aleupa kakaiwa enaleno bedelawosalana. Ita e etela mai e ebalaida, dia!

²⁰E God mampea wainilana, me e malesa debamawa mampe gimaralene mebaawa wanalen. Sa baiwa e etela eueuwa euda mampe God simbiasanuno apana ewalempe God ebowa wadaposisampa.