Read Kanasi 2 Korint 10 Bible Online

2 Korint 10 - Kanasi bible

2 Korint 10

¹Ne Paul menanedia neba baina nitu surakaunedia e manlawo dodomanasapa. Keriso me ipa etepa aiaisiwa ita molaaisiwa, epe rua deawaa ne nuawadawada mampe iririledina gagalonteapo aiana etana. Apana isiwa e bedelawo ne kutunna rua waie waiase, “Paul no do wainitana walamawe me ipa etepa aiaisiwa mala do wandie. Tane me no enedie nambe leidia me ipa apana badowa dea, wasau gagalowa nua enenla os wamode.” Tane e inseilana ne Paul ipa epe, ba?

²Tauma ne dialedina aiana etanadewaitana. Naita dia, sa ipa muka neilana manlawo wineape ibula empe badowa gagalonteapaa baiwa. Tane ne aitamana insaisantedina badowa gagalonteapa apana mampo mida mo waiase, “Paul sosowa do apanaida ete insaisawa asiasi waimoie nolantoi.” Tane no mai epe dewantipona, diaida.

³Ulaipa, tauma no tawo ema osowe duba bedewe wainitana ita Gagalo euda baiwa onantite duba nanausaitana. Tane no mai apanaida insaisawa tawo ema mampea asiasi onantipona, dia.

⁴Do no onamba puraiwawa ipa mai tawo ema ba apana insaisawa mampe onantipona, dia. Ona puraiwawa tawo ema mampea mukawa dia. Tane ona puraiwawa God no nenena, sa ipa mukamukauaida, mampe onantite ita dubawa mukawa apana wadadomodie gonaamodia nanausisaite aneitaboleide.

⁵Do ona puraiwawa mukamukaua ema mampe no onantite apanaida insaisau gagalowa ipasiasaitana. Apana asowawa gagalowa mampe God aiawa amboitusaie ita apana God atensapona intawa enabodasai. Mo segarau aiawa ema no inta deawaa bedewe ansisisaite diasaitana. Tane waeuwa insaisawa daitada wisedia no wadeite Keriso insaisawa atowesaite eite ulaipa aiawa os eteite ruawantitana.

⁶Tane e sosomba Korintiwa no aiamba ruawaitanatuwapio tauma no rua os e manlawo winete mo mida eueuwa kadiwa mampe no aiamba mai ruawantoipona matangelamota.

⁷Ewanadewaitana, mai dewa onapea ewonune insaisawaitonuna, tane ipawaida bedewea insaisawa wadonuna. E bedelawo apana mida insedie wadiase, “Ne ipa Keriso mampea me nolawa dewalala!” Apana sa mai insepiase, “Ne os Keriso mampea wainedina!” Ipawa ne do Keriso mampea waaubaneno nolawa dewasadina.

⁸Ne epe wadina, ipawa Tatamba Iesu e onialepina mukawa nen. Ne nolana ipa e sumanaila bedewe saulepino badowa enonune initonuna baiwa, mai teinaaisilepo omena baiwa, sa dia. Tane naita Keriso e onialepina mukawa nena asowawaidantepina, sa ide. Ema baiwa ne mai malawanteapa, dia.

⁹God ne e saulepina nolawa nen, sa baiwa e mai insenase, ne letana girumamodina mampe dewalepo e saitonune inguguraitonuna baiwa. Sa dia!

¹⁰Ne epe wadina, ipawa apana isiwa ne umanana waie waiase, “Paul letawa bedewe gagalo pokawaaida nua enenla wamode. Tane meida mainimbo wisedia walamawe me ewaewawa apana oauara, ita me gagalowa wamodia ipa etadabuala.”

¹¹Tane apana mida ne umanana epe wadia me ewepidewalepi. Ne e manlawo wineape do badowa wape dialepe eueuwa osowe itupa ambi awoa wainedine letana girumantedine dialedina rua deawaa.

¹²Apana isiwa e bedelawo mo muba ebou wadaposila waimoi. Mo inseiase, “No ipa ionoido sosomba nanaumotana.” Tauma ne Paul ambi dewantape mo do ewaewamba dealepi? Tane mo mai insaisa da euwa mampo wineipona, diaida. Mo muba dewau eweie asou waie waiase, “No ipa apana eubuida!” Ita do muba nolau eweie waiase, “No ide, noladewanten!” Mo epe asowawantoi.

¹³No do nuba asomba wataa rua, tane no mai somba da God nolawa waneno nolalena bopawa osowe enate asomba wata, dia. Tane no nolamba God neneno nolawantitana asowa waitana, mai di. E Korintiwa bedelawo nolantena, sa ipa God no nolamba moawa nenena ruawa nolawanten.

¹⁴Naita no e manlawo mai Gagalo euda wadape winepono, sa ipa no mai e onialepona mukawa wadapona. Tane no e Korintiwa bedelawo Gagalo euda Keriso umanawa amonantena nolamba makawa winedia rua osowe nolantene ita onialentaa mukawa wadatana.

¹⁵Ema bedewe no mai somba da nolalena wawa aupawa osowe enape segarawantipona, dia. Tane no insaisamba e baila ituite inseitana e sumanaila inilempo rua no nolamba e bedelawo God nenena rua nolawantitana do inilepie debamaidalepi.

¹⁶No menaidanedia e sumanaila bedewe badoidaitano tauma no e adilawo bola isiwa potawa bedeuwo ane nolantata. No epe dewantitana, ipawa no mai menaneipona apana da bautalene inta deulena asiasi ana.

¹⁷Apana da meba nolawa ewedie wadiase, “Ne ipa nola apanawa euda!” Tane God emawe me asowawa ipasia. Me mida nolawa Tatamba ewedie asowa wadi wadiase, “Me ne emanawo ewedina nola dewaleide!” Me ipa sa God menasadia rua nolaleide. No menanedia dima buka bedewe girumalena rua segalepi. Ema epe wadi wadiase,“Apana mida me nolawa asowa wapia menasampa, euda ipa me dima Tatamba dewasadia asowa wapi!”