Read Kanasi 2 Korint 13 Bible Online

2 Korint 13 - Kanasi bible

2 Korint 13

¹Tauma ne e manlawo walamana natadeawa iedina ewalepaa baiwa. Ne sape wineape mo mida kadi dewasaiena mampo dima buka bedewe girumalena wadia rua dewasapa. Ema epe wadi wadiase,“Naita apana da dima dewasapikadisapia baiwa wadapuo alepia apana nata ba natadea me kadiwa benemantopue saisaisapuo me kadiwa matangelawa wadepi. Naita dia, sa ipa me di nosepie alepi.”

²Ne walamana natawa e do wainite bautasane diaimaalena, tane tauma awoa wainedine deawaa osowesane wadina. Ne osowe leunteape wineape mo mida bauta kadi dewasaiena ita isiwa do matangelamopa, mai dea da epa, dia.

³Ne epe dewanteapa, ipawa e menaledia Keriso mukawa ne bedenawo nolaleidia gagalona wapina bedewe ewana. Keriso me ipa mai oauara e bedelawo, tane mukawa sabamosapie e saulepie dodomanalepia rua.

⁴Ulaipa, Keriso me etepa oauara do koros osowe bolen, tane me God mukawa debama mampe inasano enenwisene inawaa wande. No Keriso bowa bedewe deantena baiwa poka eteite oauara me do wainitana. Tane me bedewe ina wadate inawaa wainitana baiwa muka do e manlawo winete dodomanaletaa rua.

⁵Ne dialedina e eba nuala waitarasane etana e ulaipa sumanaila Keriso bedewe itule wainilana, ba dia? Keriso Iesu e bedelawo wandia dauwa etale ateiten, ba dia? Naita dia, sa ipa e sumanaila mai ipawanalepona, dia.

⁶Do ne insedina e ando daula etane ateitana no ipa sumanaimba bedewe ulaipa mampe eneite aposel nolawa dewasaitana.

⁷No e baila God mampe rauparintite iririsaitana me e saulepio mai kadi dewasanuna. Ema bedewe ne mai menaneipona apana no nolamba ewapue asowa wapue wapuase, “Paul ita me sosowa do nolau ipa ipuipua.” Ide no nolamba apana emauwo ewaewawa abo mai dodomana ipasiawaia, tane ne menanedia e dodomana os dewasanune wanlempa.

⁸Ne ema epe wadina, ipawa God no muka nenena me nolawa dewasataa baiwa. Mai inta da wineipona no dewa da dewasate ulaipa waeuwa amboitusata, dia. Tane no ulaipa gagalowa nolawantato inilepie debamalepia mukawa God nenen.

⁹E sumanaila bedewe badowa enonuna no nuaeu do etemba oauara rua aiaisiwa e bedelawo nolantonta, mai mukamba sabamosate badowa wasauleta, dia. No e baila rauparintitana e dewa uduudu bedewe dodomanaitana baiwa.

¹⁰Tatamba Iesu ne muka nena e dewalepo sumanaila bedewe badowa enonuna baiwa, mai dewalepo sumanaila ele omena baiwa. Ne mai menaneipona e manlawo wineape Tatamba muka nena mampe badowa enitulepe dialepa, dia. Sa baiwa ne awoa wainedine letana bedewe wasau gagalowa uduudu dialedina.

¹¹Tauma ne gagalona ompa osowe winene auwaledina, sosona niapo! Eba ewonunadewae dewa uduudu bedewe dodomana os dewasanune wanlempa! Wasaula gagalo ema girumantene dialena nualawo teamono winompo insamonune ruauitonuna. Do awodeaitonune insaisala dea os wadonuna. E epe dewaitonuna God, me mida nuawadawada ita wanwan euda bumpa, ipa e do wankasaitana.

¹²E eda nuawadawada mampe sosola do Keriso ebowe auwaitonune wanlempa. Do God mebaawa apanawa kakaibu mape wanwanlala e auwala waiaubei.

¹³Tatamba Iesu Keriso nuawadawadawa amonawa euwa enalempo wanlempa, ita God nuawadawadawa e nuala nopesampa. Ne do rauparintedina Aleu kakaiwa mukawa mampe e sumanai sosola do deaitonuna. Niapo, euda e manlawo winompa.