Read Kanasi Pilipai 1 Bible Online

Pilipai 1 - Kanasi bible

Pilipai 1

¹Ne Paul Timoti nata Keriso Iesu mebaawaida nolawa dewalala e auwaleitana. Niapo! Ne Paul leta ema girumantedina e God apanawaida kakaibu uduudu Keriso Iesu bedeweitene Pilipai bedewe wainilana manlawo. Do ekelesia oniamoilana ita sau apanau manlawo girumantedina.

²God no Mamamba ita Tatamba Iesu Keriso nuaeuwau amonawa ita wanwan euda e enalempo wanlempa. Paul ambi sumanailala baibu rauparileidia umanawa wade

³Ne insaledina walamawa osowe ne Godna auwasadina e baila, mai da eipona, dia.

⁴Rauparina uduudu bedewe ne nuaeu do e uduudu insaledine rauparintedina.

⁵Ne ema dewasadina, ipawa e ne sauneilano Gagalo euda nolawa bedewe awodea nolantite ne bauta e manlawo winenawo odene ita tauma.

⁶Tane ne atendewanten: God e bedelawo sumanai nolawa euda ema uwaalena, me nolawa sa dewasampo ideita Keriso Iesu wiwisawa walamawe diasapituwapi.

⁷Walama uduudu e ne nuana bedewe. Sa baiwa ne insedina ema ipa euda dodomana ambi ne dauna etedina e uduudu baila. E ne saunealano awodea nolanten God me nuaeuwa nolawa nena bedewe. Ne dibura bedewe wainedina walamawe e ne insaneile sauneile. Do ne Gagalo euda baiwa badowa enane gagalontedino, ba God apanawa sumanaibu bedewe inintompaa baiwa nolantedino e ne tainawoitene saina moawa awaneilee.

⁸God me atenlen, ne nuana uduudu mampe e bailantedina, tane nuawadawada ema ipa Keriso Iesu bedewee mainawo wisen.

⁹Ne rauparintedina e nuawadawadala, atenla ita insaisala euda dodomana do awodea inintompe debamantompo wanlempa.

¹⁰Dewa ema bedewe initonuna e dewa euda dodomana sonabene dewasana rua, ita Keriso Iesu wisepia walamawe e manlawo mai kadi da winepie wawulepi, dia.

¹¹Tane do rauparintedina e wanwanla bedewe dewa dodomana euda Iesu Keriso dewasampo inilempe nopelempa ita apana ewalempe God ebowa wadaposisampe debamasampa. Paul poka etedia, sa ipa Gagalo euda sausadie inisade

¹²Sumanai sosona, ne menanedia ema wapo ateitana: Poka ne mainawo segalena, sa ipa Gagalo euda sausadia inilepie debamalepia baiwa.

¹³Ne diburantene wainedina bedewe Rom warerewa ionoidoa duwa onieia sorodiawa uduudu, ita do apana isiwa mape waimoia mampo sabamolen ne ipa Keriso baiwa seni mampe tauneieno leidina.

¹⁴Ne diburantene wainedina bedewee sumanai sosona uara Tatamba bedewe muka wadeie nuau badoidasaie ita God aiawa sasia badowa gagalowantoi.

¹⁵Ne atenten sosona isiwa Keriso gagalowa waia, ipawa mo nuau bedewe obuneie muba ebou debamalepia insaisawantoi. Tane isiwa nuau euda dodomana mampe Gagalo euda amonantoi.

¹⁶Mo ipa nuawadawada mampe nolantoi, ipawa mo atenton ne mape dibura bedewe ituneiena Gagalo euda wasabamosape badosapaa baiwa.

¹⁷Tane sosona mida ne obuneie Keriso gagalowantoia mo muba insaisau baiwa nolantoi, mai nuau euda dodomana mampe, dia. Mo inseienase ne tauneieno wainedina bedewe saina debamalepi.

¹⁸Tane sa ide! Apana isiwa nuau euda dodomana mampe Keriso gagalowantoi, tane isiwa mai nuau dodomanaida mampe gagalontoipona, dia. Tane dea os debamawaida ipa mo inta daitada bedewe Keriso gagalowantompa. Keriso Gagalowa euda debamaleidia baiwa ne nuana euleide! Ulaipa, ema baiwa ne nuaeuntepina!

¹⁹Ne insedina e ne baina rauparitilana baiwa, ita do Iesu Keriso Aleupa kakaiwa sauwa mampe dima ne mainawo segaleidia bedewe ne ideita inanteapaa rua.

²⁰Ne nuana bedeweido insedine baiwantedina ipa ne nolana bedewe mai epe omepa, sa ipa malanepi. Tane ne walama uduudu ita tauma bedewe do menaidanedia ne nuana badolepio enapa ita ne etena uduudu mampe Keriso ebowa debamasapa, wainepina ba bonteapaa bedewe.

²¹Ne wainepina, sa ipa Keriso os baiwa wainepina. Tane ne bonteapa, sa ipa eudida, mai wainedine donsadina rua, dia.

²²Ne wainepina ne nolana ipuipua dewasapaa rua. Sa baiwa ne nuana ragaragaleide dainea sonabepa, wainepina ba bonteapa? Ne mai atenteapona.

²³Inta nata ne teinawadanei: Ne menanedia tawo ema wanwamba epe anteape Keriso nata wanta. Sa ipa eudida, ne menaidanede!

²⁴Tane e saulepina baiwa ne tawo ema osowe wainepina insedina.

²⁵Ne sauna e menalede, sa baiwa ne atenten ne ideita wainepina ita e uduudu do wainente saulepo nuaeula ita sumanaila osowesapo debamalepi.

²⁶Ne menanede epe segalepio ne e do osowe awodeantate ibunaida ewano saulepo e nuaeula Iesu Keriso bedewe nopeidolepio me asowa wana.

²⁷Tane ema insenuna: Keriso Gagalowa euda wadia ruawaitonune euda os wanlempa. Ne epe girumantedina, ipawa ne mai atendewanteapona ne wineape ewalepa, ba umanala os nowa dawo wainedina etapa e insaisala ita nuala dea badowa eneile ita do awodea enaena uduudusaile Gagalo euda sumanaiwa baiwa onaitilana.

²⁸Apana mida e amboituleia mai sauitane memesaitana inta daitada bedewe, dia. Tane nuala badowa enonuna. E epe dewaitonuno mo mida e amboituleia ewapue atentopu mo ando kadi donsapuo e inaitana. Tane e inaitana, sa ipa God mukawa mampe segalepi.

²⁹Ne epe wadina, ipawa God sauwa amonawa euda enalena e Keriso simbiawaitonune sumanaiwaitonuna baiwa. Tane mai sa os, do Keriso ebowa baiwa poka etonuna baiwa God amonawa euda e enalen.

³⁰Dewa ema bedewe e ne do awodea sapa onawa bedewe antitana. Ona ipa ne onantedino e ewanealana ita tauma ne awoa wainedine ona ipa deawaa dewasadino umanana eteilana.