Read Kanasi 1 Tesalonaika 2 Bible Online

1 Tesalonaika 2 - Kanasi bible

1 Tesalonaika 2

¹Sumanai sosomba, e ateiten no e manlawo winene nolantena, nola sa ipa mai ipasiawaia, dia.

²E ateiten bauta Pilipai bedewe apana no wadabuanene kadineiena. Ita do e manlawo God aiawa no amonantepona intawa enabodala winedie. Tane no mai santepona, dia. No ideita badowa enate God sauwa mampe me Gagalowa euda e manlawo amonanten.

³No epe dewantena, ipawa gagalo e manlawo watana, sa ipa mai waeuwa nambea wisepono dialepona. Do no Gagalo euda amonantitana bedewe mai dima da baiwantipona, ba laga mampe apana nuau teinetaa baiwa epe dewantipona, dia.

⁴Tane God no eueuwa osowe itunene ewanene ita Gagalo euda amonawa nolawa witambosan. Sa baiwa no dodomana os God insaisawa ruawa nolantitana mai apana no asomba wampaa baiwa, tane God, mida no nuamba bedewa ewedie atenleidia, me os no asomba wampa.

⁵E ateiten, no mai di waninantepe apana nuau teinepona, ba nitu da wadataa baiwa Gagalo euda amonantepona, dia. God atemba, no ulaipa waitana.

⁶Do no mai apana asomba wapua baiwa banunteipona, e manlawo ba apana isiwa mampo, dia. No ipa aposel Keriso waaubanena. Sa baiwa dima no osowe wampona saiwa e osolawo itupona rua.

⁷Tane no e bedelawo nuabibia mampe nolanten, ewaewawa oto gegelawa inawa amaamasaipona rua.

⁸No e nuawadawadalete baiwa God Gagalowa euda e manlawo amonanten. Ita do no inawamba nanantene enaletana. E no nuamba wadaidasalano baiwa epe dewanten.

⁹No e manlawo God Gagalowa euda amonantite bedewe no nuba wanwanimba saiwa wadate tadina ita walama badowa poka do nolanten. No epe dewantena, e no dima osowe wampona saiwa wadana sawa. Sumanai sosomba, e dewa ema ewalana inseilana, ba dia?

¹⁰E ateiten, do God atemba, no kakaiwaida dodomana os wainite ita mai dima da dewasapakadisapona e sumanailala manlawo, dia.

¹¹Do e ateiten, e deadea manlawo seda mambuida oniadewasamodia ruawa no dewasatana.

¹²No e wadodomanalete badoletana ita nuala ituite wanwan euda God menasadia rua wanlempa. Tane God e me gonaawa ita sapawaida bedewe waina baiwa apalen.

¹³Ita do ema baiwa no walama uduudu God auwasaitana: No God aiawa wadate wineno e gagalo sa mai apanaida gagalowa rua etape manlawosapona, tane God aiawaida rua etale manlawosalana. Ita dima no e manlawo gagalowantena, sa ipa ulaipa God aiawaida. Me aiawa sa e sumanailala bedelawo tauma nolaleidie ipawa naude.

¹⁴Sumanai sosomba, God ekelesiawa Iesu Keriso bedewea bola Iudiawo wanwanlala poka sa eteiena deawaa e manlawo segalen. E eba apanalaida mampo poka etalana rua deawaa mo Iudia bedewe wanwanlala apanauida mampo poka eteiena.

¹⁵Mapo mo perowetau epaboiamoiena, ita do mo Tatamba Iesu bosaiena. Tane tauma kadi daitada no mainimbo dewasaiena. No menaidanena mo mida mai Iuswa mampo do Gagalo euda amonantepono mo do inaida donsapona. Tane mo badowa rubusaie no enabodanepono nola sa epona baiwa. Ema bedewe mo God nuawa mai eusaipona ita apana uduudu dabuamoie emalawoamoi. Mo epe dewantoie kainokaino kadiu dewasaio debamaleidie nope wisede. Ita tauma ompa osowe God nuakadiwa matangelawa mo osouwo ien. Paul sosowa do Tesalonaika ekelesiawa ewamopua menamode

¹⁷Sumanai sosomba, no ipa walama kerauda os elete deaantene nuamba boidalen, ita inta uduudu bedewe no babiidasaitana ambi e ewalepona. No ete mampe ipa nambenambenten, tane nuamba bedewe ipa dea os.

¹⁸No menaidanedia e manlawo winepona. Sa baiwa ne neba osoweosowe rubusane inta banusana e manlawo wineapona baiwa, tane Seitan intamba enabodasan.

¹⁹No menanedia e manlawo wineta, ipawa Iesu iompo no me danawe enontaa walamawe no dima bedewe insaisamba ituta, ba nuaeuwantata? Ba nolamba dainea ipuipua asowa wata? Sa ipa e no sumanai sosomba!

²⁰Ulaipa, Iesu danawe enontaa walamawe no e osolawo asowawantate nuaeuntata!