Read Kanasi 2 Tesalonaika 3 Bible Online

2 Tesalonaika 3 - Kanasi bible

2 Tesalonaika 3

¹Tane do no gagalomba da wataa menanede. Sumanai sosomba no baimba rauparitonuna Gagalo euda Tatamba Iesu umanawa ideita debamalepie alepio apana uduudu etapue sapasapu, e bedelawo segalena rua.

²Do rauparitonuna God no apana dewa kadiwa rebareba dewalala mampo oniadewasanempa. Ipawa apana isiwa Gagalo euda mai sumanaiwantoipona, dia.

³Tane Tatamba, mida dewa dodomana ulaipa os dewasadia, e do muka enalepie gonaalempa, kadi mamba kadilepia sawa.

⁴Ita no Tatamba bedewe sumanaintite e baila badowa inseitana dima no e dialetano dewasailana ideita dewakasaitana.

⁵Tane no e baila rauparintitana Tatamba saulepie banlalepio e God nuawadawadawa ipawaida ateitana. Ita poka eteilana bedewe Keriso mukawa mampe badowa enonuna, mai dabuaitana, dia. Nola etedabualala wasaubu gagalowa

⁶Sumanai sosomba, e bedelawo sosola isiwa nola etedabuantoie di waimoie, ita do no waeuwamba e dialetana mai eteipe ruawantoipona, dia. Sa baiwa no Tatamba Iesu Keriso ebowe badowa dialeitana mo mida epe dewantoia emona, mai do deaitana, dia.

⁷Ipawa e ateiten dima no dewasatano ewalana e dewasana rua. No e do wainitana walamawe mai nola sawantepe etedabuantepona,

⁸ita do apana nanau mai di nakoantepona, dia. Tane no tadina ita walama nuamba pokaida do badowa nolanten, mai mida e bedelawo no saimba da wadapona, dia.

⁹No Gagalo euda amonantena baiwa dima osowe wampona saiwa e osolawo itupona rua. Tane no mai epe dewasapona, ipawa no menanena eueuwa euda dewasato e ewane ruawaitana baiwa.

¹⁰Walamaipa no e do wainite no ema epe dialeite waitanase, “Apana mida nola etedabualempa, me mai nana da wanapuo napi, dia.”

¹¹No etatana sumanai sosola isiwa e bedelawo nola sawantoie mai dima dewasaipona, di antoie sosou nolau bedewe surakaumoie lai. Sa baiwa no epe waitana.

¹²Apana inainambu ema ruau no Tatamba Iesu Keriso ebowa mampe badowa waite nuau ituitana mo wanwan rebareba epue ita dima mo muba osowe waimompaa baiwa nolawantompa.

¹³Tane e sumanai sosomba mai dewa euwa dodomana nolawa etedabuaitane ena, dia.

¹⁴Naita mida no waeuwamba leta ema bedewe ituite dialeitana mai etepie ruawalepia, me ewanadoe enaiana, mai do deaitana. Epe dewasano me ewepie malalepi.

¹⁵Ita e mai me wenawenala rua dewasana, tane sumanai sosola isiwa ruau me wasausana.

¹⁶Tatamba, mida wanwan euwa bumpaida walama uduudu ita do dewa uduudu bedewe wanwan euda enalempa. Tatamba Iesu e do wanlempa!

¹⁷Ne Paul auwana ema neba witanawo girumantedina. Ema epe inta ne letana uduudu bedewe ebona girumantedina ne letana ulaipalempaa baiwa.

¹⁸No Tatamba Iesu Keriso me nuawadawadawa amonawa e manlawo winompa, niapo!